ନୂଆଦିଲ୍ଲୀ: ଅଯୋଧ୍ୟାର ରାମ ଜନ୍ମଭୂମି ମନ୍ଦିର ନିର୍ମାଣରେ ମୁସଲିମ ପକ୍ଷକାର ଇକବାଲ ଅନସାରୀଙ୍କ ଭୂମିକା ଅତ୍ୟନ୍ତ ଗୁରୁତ୍ୱପୂର୍ଣ୍ଣ। ମନ୍ଦିର ନିର୍ମାଣର ସମସ୍ତ ମାମଲାରେ ଇକବାଲ ଅନସାରୀଙ୍କ ସହଯୋଗ ଏହାର ସମାଧାନ କରିବାରେ ସଫଳ ହୋଇଛି। ଇକବାଲ ଅନସାରୀଙ୍କ ଘର ଅଯୋଧ୍ୟା ସହରରେ ପ୍ରବେଶ କରିବା ପରେ ପ୍ରଥମେ ପଡ଼ିଥାଏ। ରାମ ମନ୍ଦିର ପରିସର ନିକଟରେ ରହୁଥିବା ଇକବାଲ ପିଲାବେଳୁ ମନ୍ଦିର ଆନ୍ଦୋଳନର ପ୍ରତ୍ୟେକ କାର୍ଯ୍ୟକଳାପ ଦେଖିଆସିଛନ୍ତି। ଇକବାଲ ପିତା ହାମିଦ ଅନସାରୀଙ୍କଠାରୁ ଆଇନଗତ ଜଟିଳତା ମଧ୍ୟ ଶିଖିଛନ୍ତି। ପିତାଙ୍କ ଦେହାନ୍ତ ପରେ ସେ ରାମ ଜନ୍ମଭୂମି ମନ୍ଦିର ନିର୍ମାଣ ସପକ୍ଷରେ ଯିବାକୁ ନିଷ୍ପତ୍ତି ନେଇଥିଲେ, ଯାହାକୁ ସର୍ବଦା ପ୍ରଶଂସା କରାଯାଇଛି ଏବଂ ପ୍ରଶଂସା ଜାରି ରହିବ।
ଅଯୋଧ୍ୟା ଜମି ବିବାଦ ମାମଲାରେ ଇକବାଲ ଅନସାରୀ ଅନ୍ୟତମ ପକ୍ଷଭୁକ୍ତ ଥିଲେ। ତାଙ୍କ ବାପା ହାସିମ ଅନସାରୀ ଜମି ବିବାଦ ମାମଲାରେ ସବୁଠାରୁ ବୟସ୍କ ପକ୍ଷବାଦୀ ଥିଲେ। ୨୦୧୬ରେ ୯୫ ବର୍ଷ ବୟସରେ ହାସିମ ଅନସାରୀଙ୍କ ମୃତ୍ୟୁ ହୋଇଥିଲା, ଯାହା ପରେ ଇକବାଲ କୋର୍ଟରେ ମାମଲା ପରିଚାଳନା କରିଥିଲେ। ଉଲ୍ଲେଖଯୋଗ୍ୟ, ଅଯୋଧ୍ୟା ବିବାଦର ବିଚାର କୋର୍ଟ ବାହାରେ ହୋଇପାରିବ ବୋଲି ଇକବାଲ ଅନସାରୀ, ହାଜି ମେହବୁବ ଓ ମହମ୍ମଦ ଉମର ଅସ୍ୱୀକାର କରିଥିଲେ। ଏ ନେଇ ଅଯୋଧ୍ୟାରେ ସ୍ଥାନୀୟ ମୁସଲମାନମାନଙ୍କର ଏକ ବୈଠକ ମଧ୍ୟ ଅନୁଷ୍ଠିତ ହୋଇଥିଲା।
ମୁସଲମାନମାନେ ମସଜିଦକୁ ଅନ୍ୟ କୌଣସି ସ୍ଥାନକୁ ସ୍ଥାନାନ୍ତର କରିବେ ନାହିଁ ବୋଲି ଏକ ସଂକଳ୍ପ ପାରିତ କରିଥିଲେ । ୯ ନଭେମ୍ବର ୨୦୧୯ରେ ସୁପ୍ରିମକୋର୍ଟ ଅଯୋଧ୍ୟାର ବିବାଦୀୟ ସ୍ଥାନରେ ଏକ ସରକାରୀ ଟ୍ରଷ୍ଟ ମାଧ୍ୟମରେ ରାମ ମନ୍ଦିର ନିର୍ମାଣକୁ ସମର୍ଥନ କରିଥିଲେ। ଅଯୋଧ୍ୟାରେ ମସଜିଦ ପାଇଁ ହିନ୍ଦୁ ପକ୍ଷ ମୁସଲମାନ ପକ୍ଷକୁ ୫ ଏକର ଜମି ଦେବାକୁ ପଡ଼ିବ ବୋଲି ରାୟରେ ଦର୍ଶାଯାଇଛି। ରାମ ଜନ୍ମଭୂମି-ବାବ୍ରି ମସଜିଦ ଜମି ମାମଲାମାମଲାର ପୂର୍ବତନ ପକ୍ଷବାଦୀ ଇକବାଲ ଅନସାରୀଙ୍କୁ ଜାନୁଆରୀ ୨୨ରେ ଅଯୋଧ୍ୟାରେ ରାମ ମନ୍ଦିର ଉଦ୍ଘାଟନ ସମାରୋହରେ ଯୋଗ ଦେବା ପାଇଁ ନିମନ୍ତ୍ରଣ କରାଯାଇଛି।
ଶ୍ରୀରାମ ଜନ୍ମଭୂମି ତୀର୍ଥ କ୍ଷେତ୍ର ଟ୍ରଷ୍ଟ ପକ୍ଷରୁ ଏହି ନିମନ୍ତ୍ରଣ ଦିଆଯାଇଛି। ଇକବାଲ ଅନସାରୀ ବାବ୍ରୀ ମସଜିଦ୍ର ପ୍ରମୁଖ ସମର୍ଥକ ଥିଲେ। ୫ ଅଗଷ୍ଟ, ୨୦୨୦ରେ ଅନୁଷ୍ଠିତ ରାମ ମନ୍ଦିରର ଭୂମି ପୂଜନ ସମାରୋହରେ ଯୋଗଦେବା ପାଇଁ ତାଙ୍କୁ ନିମନ୍ତ୍ରଣ ମଧ୍ୟ ମିଳିଥିଲା। ଡିସେମ୍ବର ୩୦ ରେ ଅଯୋଧ୍ୟାରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ସ୍ୱାଗତ କରିବା ପାଇଁ ଧାଡ଼ିରେ ଠିଆ ହୋଇଥିବା ଶତାଧିକ ଲୋକଙ୍କ ମଧ୍ୟରୁ ଅନସାରୀ ମଧ୍ୟ ଥିଲେ। ଉତ୍ତରପ୍ରଦେଶରେ ଏକ ପୁନଃବିକଶିତ ରେଳ ଷ୍ଟେସନ ଏବଂ ନବନିର୍ମିତ ବିମାନବନ୍ଦରର ଉଦ୍ଘାଟନ କରିବା ସହ ଅନେକ ପ୍ରକଳ୍ପର ଶିଳାନ୍ୟାସ କରିଥିଲେ ମୋଦି।
ଏକ ଭିଡିଓରେ ଇକବାଲ ପ୍ରଧାନମନ୍ତ୍ରୀଙ୍କ ଗାଡ଼ି ଉପରେ ଫୁଲ ବର୍ଷା କରୁଥିବା ଦେଖିବାକୁ ମିଳିଛି। ମନ୍ଦିର ସହରରେ ରୋଡ୍ ସୋ’ବେଳେ ପାଞ୍ଜିଟୋଲା ଅଞ୍ଚଳ ଦେଇ ମୋଦିଙ୍କ କାଫିଲା ଅତିକ୍ରମ କରିବା ପରେ ଇକବାଲ କହିଥିଲେ, ସେ (ମୋଦୀ) ଆମ ଘରକୁ ଆସିଛନ୍ତି। ସେ ଆମର ଅତିଥି ଏବଂ ଆମର ପ୍ରଧାନମନ୍ତ୍ରୀ। ଜମି ବିବାଦ ମାମଲାର ସବୁଠାରୁ ବୟସ୍କ ପକ୍ଷକାର ଇକବାଲଙ୍କ ବାପା ହାସିମ ଅନସାରୀ୨୦୧୬ରେ ୯୫ ବର୍ଷ ବୟସରେ ମୃତ୍ୟୁବରଣ କରିଥିଲେ। ଜାନୁଆରୀ ୨୨ ତାରିଖରେ ମନ୍ଦିରରେ ରାମଲାଲାଙ୍କ ପ୍ରାଣପ୍ରତିଷ୍ଠା ସ୫ମାରୋହ ପାଇଁ ଅଯୋଧ୍ୟାକୁ ସଜ୍ଜିତ କରାଯାଉଛି। ଏଥିରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସାମିଲ ହେବେ। ଯେଉଁଠାରେ ଇକବାଲ ଅନସାରୀଙ୍କୁ ମଧ୍ୟ ନିମନ୍ତ୍ରଣ କରାଯାଇଛି।
