ଭୁବନେଶ୍ୱର: ବିଧାନସଭାର ବିଶ୍ୱସନୀୟତା ଏହାର ସଦସ୍ୟମାନଙ୍କ ଶୃଙ୍ଖଳା ଓ ଆଚରଣ ସଂହିତା ପାଳନ ଉପରେ ନିର୍ଭର କରେ। ବିଧାନସଭାର ମୁଖ୍ୟ କାର୍ଯ୍ୟ ଆଇନ ପ୍ରଣୟନ ହୋଇଥିବାବେଳେ କାର୍ଯ୍ୟନିର୍ବାହୀ ବିଭିନ୍ନ କାର୍ଯ୍ୟର ଯାଞ୍ଚ ଓ ତର୍ଜମା କରିଥାଏ।
ତେବେ ଗତ କିଛି ବର୍ଷ ମଧ୍ୟରେ ବିଧାୟକଙ୍କ ବିଶୃଙ୍ଖଳିତ ଆଚରଣ ବୃଦ୍ଧି ହେତୁ ବିଧାନସଭା କାର୍ଯ୍ୟରେ ବାଧା ସୃଷ୍ଟି ହେଉଛି। ଅଧିବେଶନ କାର୍ଯ୍ୟବିଧି ସମୟରେ ଗୃହକାର୍ଯ୍ୟରେ ବାରମ୍ବାର ବ୍ୟାଘାତ ଅର୍ଥପୂର୍ଣ୍ଣ ଏବଂ ଫଳପ୍ରଦ ଆଲୋଚନାକୁ ବ୍ୟାହାତ କରିଥାଏ ଓ ଅନୁଷ୍ଠାନର ଭାବମୂର୍ତ୍ତିକୁ ମଧ୍ୟ କ୍ଷୁଣ୍ଣ କରିଥାଏ। ବାରମ୍ବାର ସ୍ଥଗିତାଦେଶ ଏବଂ ବାଧା ଯୋଗୁ ଗୃହକାର୍ଯ୍ୟର ବହୁ ସମୟ ମଧ୍ୟ ନଷ୍ଟ ହୁଏ ବୋଲି ଓଡ଼ିଶା ବିଧାନସଭାର ବାଚସ୍ପତି ଶ୍ରୀମତୀ ପ୍ରମିଳା ମଲ୍ଲିକ ପ୍ରକାଶ କରିଛନ୍ତି।
ମହାରାଷ୍ଟ୍ରର ମୁମ୍ବାଇଠାରେ ଆୟୋଜିତ ୮୪ତମ ସର୍ବଭାରତୀୟ ପ୍ରଜାଇଡିଂ ଅଫିସରଙ୍କ ସମ୍ମିଳନୀ ଓ ଆଇନ ପ୍ରଣୟନ ସଂସ୍ଥାର ସଚିବମାନଙ୍କର ୬୦ତମ ସମ୍ମିଳନୀରେ ଯୋଗଦେଇ ବାଚସ୍ପତି ଶ୍ରୀମତୀ ମଲ୍ଲିକ କହିଲେ ଯେ ଯଦିଓ ବିଧାୟକଙ୍କ ଆଚରଣକୁ ନିୟନ୍ତ୍ରଣ କରିବା ପାଇଁ ଅନେକ ଗାଇଡ଼୍ଲାଇନ୍ ଏବଂ ନିୟମାବଳୀ ସମୟ ସମୟରେ ପ୍ରସ୍ତୁତ ହୋଇଛି, ତଥାପି ଆମେ ଚାହୁଁଥିବା ଫଳାଫଳ ମିଳିବାରେ ସକ୍ଷମ ହୋଇନାହୁଁ। ବରଂ ସମୟର ଗତି ସହିତ ପରିସ୍ଥିତି ବିଗିଡ଼ି ଯାଉଛି।
ଏହି ଭବ୍ୟ ସମ୍ମିଳନୀରେ ଲୋକସଭାର ବାଚସ୍ପତି ଶ୍ରୀ ଓମ୍ ବିର୍ଲା ଓ ରାଜ୍ୟସଭାର ଉପାଧ୍ୟକ୍ଷ ଶ୍ରୀ ହରିବଂଶ ଅଧ୍ୟକ୍ଷତା କରିଥିଲେ। ଏହି ଅବସରରେ ଓଡ଼ିଶା ବିଧାନସଭାର ବାଚସ୍ପତି ଶ୍ରୀମତୀ ମଲ୍ଲିକ ‘ଗଣତାନ୍ତ୍ରିକ ଅନୁଷ୍ଠାନଗୁଡ଼ିକରେ ଲୋକମାନଙ୍କର ବିଶ୍ୱାସକୁ ଦୃଢ଼ କରିବା-ଦେଶର ସାଂସଦ, ରାଜ୍ୟ ଓ କେନ୍ଦ୍ର ଶାସିତ ବିଧାନସଭାରେ ଆଇନ ଶୃଙ୍ଖଳା ଓ ଶିଷ୍ଟାଚାର ବଜାୟ ରଖିବା ଆବଶ୍ୟକ’ ଉପରେ ନିଜର ବକ୍ତବ୍ୟ ଉପସ୍ଥାପନ କରିଥିବାବେଳେ ଓଡ଼ିଶା ବିଧାନସଭାର ସଚିବ ଶ୍ରୀ ଦାଶରଥି ଶତପଥୀ ଆଇନ ପ୍ରଣୟନ ସଂସ୍ଥାର କାର୍ଯ୍ୟପଦ୍ଧତିରେ ଟେକ୍ନୋଲୋଜିର ବ୍ୟବହାରର ପ୍ରାସଙ୍ଗିକତା ସଂପର୍କରେ ଆଲୋକପାତ କରିଥିଲେ।
ଏହି କାର୍ଯ୍ୟକ୍ରମରେ ଓଡ଼ିଶା ବିଧାନସଭାର ଉପବାଚସ୍ପତି ଶ୍ରୀ ସାଲୁଗା ପ୍ରଧାନ ମଧ୍ୟ ଯୋଗଦେଇ ଆଲୋଚନାରେ ଅଂଶଗ୍ରହଣ କରିଥିଲେ।