ଭୁବନେଶ୍ବର: ଗତକାଲି କଟକ ଜଗତପୁରରେ ହୋଇଥିବା ମର୍ମନ୍ତୁଦ ସଡକ ଦୁର୍ଘଟଣାରେ ନିଖୋଜ ଯୁବକଙ୍କୁ ଆଜି ସକାଳେ ଠାବ କରାଯାଇଛି। ତାଙ୍କ ନାମ ହେଲା ଉଦିତ ନାରାୟଣ ସାହୁ, ଘର ଭୁବନେଶ୍ବର ଲିଙ୍ଗିପୁର ଏବଂ ତାଙ୍କର ବୟସ 22 ବର୍ଷ ହେବ। ଗତକାଲି ଅପରାହ୍ନରେ ତାଙ୍କର ଇଭି ଗାଡି ବିରୂପା ନଦୀ ଗର୍ଭକୁ ଖସିପଡିଥିଲା। ଫଳରେ କାରଟି ପାଣି ଭିତରେ ବହୁ ଦୂରକୁ ଭାସି ଯାଇଥିଲା। ସେହି କାରରେ ଥିବା ତାଙ୍କର ସାଙ୍ଗ ସେହି ଲିଙ୍ଗିପୁରର ଅଂଶୁମାନ ପଣ୍ଡାଙ୍କୁ ସ୍ଥାନୀୟ ଲୋକମାନେ ନଦୀରୁ ଉଦ୍ଧାର କରିଥିଲେ। ଅଂଶୁମାନଙ୍କ ଅବସ୍ଥା ଗୁରୁତର ରହିଛି. ତାଙ୍କୁ କଟକ ଏସସିବିରେ ଚିକିତ୍ସିତ କରାଯାଉଛି।
ଘଟଣାରୁ ଜଣାପଡିଛି ଯେ, ଉଦିତ ଏବଂ ତାଙ୍କର ଆଉ ଚାରିଜଣ ସାଙ୍ଗ କଟକ ଚାଉଳିଆଗଂଜ ରେ ଏକ ରେଷ୍ଟୁରାଣ୍ଟ ଉଦଘାଟନ କାର୍ଯ୍ୟକ୍ରମରେ ଯୋଗଦେବାକୁ ଆସିଥିଲେ। ସେମାନେ ସେଥିରେ ଯୋଗଦେବା ପରେ ସଂଧ୍ୟା 6 ଟାରେ ଜଗତପୁର ବିରୂପା ନଦୀକୂଳରେ ପହଞ୍ଚିଥିଲେ। ସେଠାରେ ତିନିଜଣ ସାଙ୍ଗ ଓହ୍ଲାଇ ପଡିଥିବା ବେଳେ ଉଦିତ ଏବଂ ଅଂଶୁମାନ ନାରାୟଣବିହାର ଯାଇଥିଲେ। ସେଠାରୁ ପୁଣି ତାଙ୍କ ସାଙ୍ଗଙ୍କ ପାଖକୁ ଆସିବା ବେଳେ କାରଟି ଭାରସାମ୍ୟ ହରାଇ ନଦୀ ଭିତରକୁ ପଶି ଯାଇଥିଲା।
ନଦୀରେ ପ୍ରବଳ ପାଣି ପ୍ରବାହିତ ହେଉଥିବାରୁ କାରଟି ହଠାତ ନଦୀ ଭିତରେ ଭାସିଯାଇଥିଲା। ଏହି ଘଟଣା ପରେ ସ୍ଥାନୀୟ ଲୋକେ ସେଠାରେ ରୁଣ୍ଡ ହୋଇଯାଇଥିଲେ। ନଦୀରେ ଭାସୁଥିବା ଅଂଶୁମାନଙ୍କୁ ଲୋକେ ଉଦ୍ଧାର କରିଥିଲେଷ ହେଲେ କାରଟିର କୈଣସି ପତ୍ତା ମିଳି ନ ଥିଲା କି ଉଦିତ କେଉଁଠି ତାହା ଜଣାପଡି ନ ଥିଲା। ଏହାପରେ ଅଗ୍ନିଶମ, ଓଡ୍ରାଫ ଟିମ ଏବଂ ସ୍କୁବା ଡ୍ରାଇଭର ଏହାର ଉଦ୍ଧାର କାର୍ଯ୍ୟରେ ସାମିଲ ହୋଇଥିଲେ ମଧ୍ୟ ବହୁ ସମୟ ଧରି କାରଟି ପତ୍ତା ପାଇ ନ ଥିଲେ।
ରାତି ପ୍ରାୟ 10 ଟା ବେଳେ କାରର ପତ୍ତା ମିଳିଥିଲା ଏବଂ ଦଉଡିରେ ବାନ୍ଧି କାରକୁ କୂଳକୁ ଅଣାଯାଇଥିଲା। ହେଲେ କାର ଭିତରେ ଉଦିତ ନ ଥିବାର ଦେଖିବାକୁ ମିଳିଥିଲା। ଏହାପରେ ପୁଣି ସମସ୍ତେ ଖୋଜାଖୋଜି କରିଥିଲେ ମଧ୍ୟ ଉଦିତର କୌଣସି ପତ୍ତା ମିଳି ନ ଥିଲା। ଆଜି ଉଦିତର ମରଶରୀର ଉଦ୍ଧାର କରାଯାଇଥିଲା। ଏହା ଘଟଣା ପରେ ଲିଙ୍ଗିପୁର ଅଞ୍ଚଳରେ ଶୋକର ଛାୟା ଖେଳିଯାଇଛି।
