ଭୁବନେଶ୍ବର: ଆଜି କିଟ୍ ବିଶ୍ୱବିଦ୍ୟାଳୟ ସ୍ଥିତ ସମ୍ମିଳନୀ କକ୍ଷରେ ପୂର୍ତ୍ତ ବିଭାଗ ଓ ଗ୍ରାମ୍ୟ ଉନ୍ନୟନ ବିଭାଗରେ ନୂତନଭାବେ ଯୋଗଦେଇଥିବା ୧୯୭ ଜଣ ସହକାରୀ ନିର୍ବାହୀ ଯନ୍ତ୍ରୀଙ୍କ ପାଇଁ ଆରମ୍ଭ ହେଲା ପ୍ରଶିକ୍ଷଣ କାର୍ଯ୍ୟକ୍ରମ। ଏହି କାର୍ଯ୍ୟକ୍ରମ ଏକ ମାସ ଧରି ଚାଲିବ। ଏହି ପ୍ରଶିକ୍ଷଣ କାର୍ଯ୍ୟକ୍ରମକୁ ପୂର୍ତ୍ତ,ଆଇନ ଓ ଅବକାରୀ ମନ୍ତ୍ରୀ ପୃଥୀରାଜ ହରିଚନ୍ଦନ ଏବଂ ଗ୍ରାମ୍ୟ ଉନ୍ନୟନ, ପଞ୍ଚାୟତିରାଜ ଓ ପାନୀୟ ଜଳ ବିଭାଗ ମନ୍ତ୍ରୀ ରବି ନାରାୟଣ ନାଏକଙ୍କ ସହ ଯୋଗଦେଇଥିଲେ।
ଏହି ଅବସରରେ ମନ୍ତ୍ରୀ ହରିଚନ୍ଦନ ନୂତନ ଯନ୍ତ୍ରୀମାନଙ୍କୁ ରାଜ୍ୟର ଭୂମିକାଗତ ଉନ୍ନୟନରେ ତାଙ୍କର ଦାୟିତ୍ୱ ଓ ଭୂମିକା ସମ୍ପର୍କରେ ସ୍ପଷ୍ଟ ଦିଗଦର୍ଶନ ଦେଇଛନ୍ତି। ରାସ୍ତା, ସେତୁ ଓ ଭବନ କେବଳ ଢାଞ୍ଚା ନୁହେଁ, ସେଗୁଡ଼ିକ ହେଉଛି ଉନ୍ନତିର ମୂଳ ଭିତ୍ତି—ଏହି ବିଷୟରେ ଉଲ୍ଲେଖ କରି ଗୁଣମାନ, ସମୟବଦ୍ଧ କାର୍ଯ୍ୟସମ୍ପାଦନ ଓ ପାରଦର୍ଶିତାକୁ ସର୍ବୋଚ୍ଚ ପ୍ରାଧାନ୍ୟ ଦେବାକୁ ପରାମର୍ଶ ଦେଇଛନ୍ତି।
ରାଜ୍ୟରେ ବର୍ତ୍ତମାନ ୩୫,୫୦୦ କିମିରୁ ଅଧିକ ସଡ଼କ ନେଟୱାର୍କ ପରିଚାଳନା ହେଉଥିବା ବେଳେ ୨୦୨୯ ସୁଦ୍ଧା ୧୫,୦୦୦ କିମି ବିଶ୍ୱସ୍ତରୀୟ ସଡ଼କ ନିର୍ମାଣର ଲକ୍ଷ୍ୟ ନିର୍ଦ୍ଧାରିତ। ଏହି ଲକ୍ଷ୍ୟ ପୂରଣରେ ପ୍ରତ୍ୟେକ ଯନ୍ତ୍ରୀଙ୍କ ସକ୍ରିୟ ଓ ନିଷ୍ଠାପୂର୍ଣ୍ଣ ଅବଦାନ ଆବଶ୍ୟକ ବୋଲି ସେ ଉଲ୍ଲେଖ କରିଛନ୍ତି।
ଗତ ବର୍ଷ ଭୂମିକାଗତ କ୍ଷେତ୍ରରେ ହୋଇଥିବା ଅଗ୍ରଗତି—ସଡ଼କ, ସେତୁ, ରେଳ ଓଭର୍ ବ୍ରିଜ୍ ଓ ଚେକ୍ଡ୍ୟାମ ନିର୍ମାଣ—ରାଜ୍ୟର ଦ୍ରୁତ ଉନ୍ନୟନର ପ୍ରମାଣ। ବିଶେଷ କେନ୍ଦ୍ରୀୟ ସହାୟତା ଅଧୀନରେ ୧୦୦% ବ୍ୟୟ ସାଧନ ଓ ୯୯% ରୁ ଅଧିକ ପ୍ରୋଗ୍ରାମ ବ୍ୟୟ ସଫଳତା ଆମ ବିଭାଗର କାର୍ଯ୍ୟନିଷ୍ଠାକୁ ପ୍ରତିଫଳିତ କରୁଛି ବୋଲି ମନ୍ତ୍ରୀ କହିଛନ୍ତି।
ଆର୍ଥିକ ବର୍ଷ ୨୦୨୫–୨୬ ପାଇଁ ₹୧୩,୦୬୯ କୋଟି ମୂଲ୍ୟର ଜାତୀୟ ରାଜପଥ ପ୍ରକଳ୍ପଗୁଡ଼ିକୁ Ministry of Road Transport and Highways (MoRT&H) ଦ୍ୱାରା ଅନୁମୋଦନ ମିଳିଥିବା ତଥ୍ୟ ଉପସ୍ଥାପନ କରି ଆଗାମୀ ଦିନରେ ରାଜ୍ୟର ସଂଯୋଗ ବ୍ୟବସ୍ଥା ଅଧିକ ସୁଦୃଢ଼ ହେବ ବୋଲି ସେ କହିଛନ୍ତି।
ଏହି ଅବସରରେ ଉକ୍ତ କାର୍ଯ୍ୟକ୍ରମରେ ପୂର୍ତ୍ତ ବିଭାଗର ଇଆଇସି ସିଭିଲ ଇଂ ସତ୍ୟବ୍ରତ ବେହେରା,ଗ୍ରାମ୍ୟ ଉନ୍ନୟନ ବିଭାଗରେ ଯନ୍ତ୍ରୀ-ମୁଖ୍ୟ (ଗ୍ରାମ୍ୟ ନିର୍ମାଣ-୧) ଇଂ ପ୍ରଦୀପ କୁମାର ଜେନାଙ୍କ ସମେତ ବିଭାଗୀୟ ଅନ୍ୟାନ୍ୟ ପ୍ରମୁଖ ଅଧିକାରୀ ଗଣ ଉପସ୍ଥିତ ଥିଲେ।