ବାଦ ବିବାଦ ମଧ୍ୟରେ ଶେଷ ହେଲା 2018 ମସିହା, ଏବେ ପ୍ରଶ୍ନ ଉଠିଛି 2019 ମସିହା ନେତାଙ୍କ ଆଖିରୁ ନିଦ ହଜାଇ ଦେବ କି ?

ଚାଲିଯିବ ୨୦୧୮  । ଦେଇଯିବ କିଛି ଅଧୁରା ଟାସ୍କ  । ୨୦୧୯ ର ନିର୍ବାଚନ ବର୍ଷରେ ନେତାଙ୍କ ପାଇଁ କସରତର ସମୟ ପାଲଟିବ  । ଓଡିଶା କଥା ବିଚାରକୁ ନେଲେ କଂଗ୍ରେସ, ବିଜେପି,ବିଜେଡିର ମୁଖିଆମାନେ ନେଇପାରନ୍ତି କିଛି ଏଭଳି ସବୁ ସଙ୍କଳ୍ପ  । ବିଜେଡି ପାଇଁ ହୁଏତ ସଙ୍କଳ୍ପ ରହିପାରେ, କିଭଳି ୨୦୧୯ ନିର୍ବାଚନ ମଇଦାନରେ ବିଜୟ ବାନା ଉଡାଇ ହେବ । ଆଉ ୧୧୯ ଆସନକୁ କିଭଳି ବୃଦ୍ଧି କରିହେବ  । କାରଣ ବିଜେଡି ମୁଖିଆ ବୁଝିଛନ୍ତି ଏବେ ବି ଲୋକଙ୍କ ସମର୍ଥନ ରହିଛି  ।କେବଳ ଲୋକଙ୍କ ସମର୍ଥନ ନାହିଁ ବରଂ ଅନ୍ୟ ଦଳର ନେତାଙ୍କର ମଧ୍ୟ ନିଜ ଦଳ ଅପେକ୍ଷା ଅଧିକ ଭରସା ରହୁଛି  । ତା ପରେ ବି ୨୦୧୮ରେ ବିଜୁ ସ୍ୱାସ୍ଥ୍ୟ କଲ୍ୟାଣ ଯୋଜନା ସହ ସଫଳ ହକି ବିଶ୍ୱକପ ଆୟୋଜନ ଓଡିଶାକୁ ଏକ ନୂଆ ପରିଚୟ ଦେଇଥିଲା  । ଆଉ ଏହାକୁ ଭୋଟର ନିଶ୍ଚିତ ମନେ ରଖିବେ  । କାରଣ କେନ୍ଦ୍ରର ଆୟୁଷ୍ମାନ ଯୋଜନା ସହ ଟକ୍କର ଦେଇ ଆରମ୍ଭ ହୋଇଥିଲା ବିଜୁ ସ୍ୱାସ୍ଥ୍ୟ କଲ୍ୟାଣ ଯୋଜନା  । ଏହାକୁ ଓଡ଼ିଶାବାସୀ ବି ଗ୍ରହଣ କରିଥିବାର ଦେଖିବାକୁ ମିଳିଛି ।

ଆଉ ବିଜେପି କଥା କହିବାକୁ ଗଲେ ୧୨୦ ମିଶନ ପାଇଁ ଦଳ ଏବେ ଚିନ୍ତାରେ  । କାରଣ ବିଜେପୁର ହେଉ କି ହିନ୍ଦୀ ହାର୍ଟଲାଣ୍ଡରେ ଦଳ ଚକମା ଖାଇଛି  । ୨୦୧୯ ରେ ଓଡ଼ିଶାରେ ବିଜେପି ବିଜୟ ହେବାର ସ୍ୱପ୍ନ ଦେଖାଇ ଜାତୀୟ ନେତୃବର୍ଗଙ୍କ ସାହାଯ୍ୟରେ ୨ କେନ୍ଦ୍ର ମନ୍ତ୍ରୀ ପଦବୀ ମିଳିଛି  । ତାହା ପୂରଣ ହେବ ତ ! କାରଣ ଜଣେ ସାଂସଦ ଥିଲେ ବି ୨୦୧୯ରେ ବିଜେପି କାଳେ ପାଇଯିବ ଭାବି କେନ୍ଦ୍ରମନ୍ତ୍ରୀ ଭାବେ ୨ ଜଣଙ୍କୁ ଦାୟିତ୍ୱ ଦିଆଯାଇଥିଲା । କିନ୍ତୁ ବରିଷ୍ଠ ନେତା ଦିଲ୍ଲୀପ ରାୟ ଓ ବିଜୟ ମହାପାତ୍ରଙ୍କ ଦଳରୁ ବାହାରିଯିବା ବୁମେରାଙ୍ଗ ଭାବେ କାମ କରିବନି ତ ! ଆଉ ଓଡ଼ିଆ ଭୋଟରଙ୍କୁ କିଭଳି ପଦ୍ମ ପ୍ରତି ଆକୃଷ୍ଟ କରିହେବ ସେଥିପାଇଁ ଦିନରାତି ଏକ କରିବାକୁ ପଡିବ  । କାରଣ ବିଜେପି ବି ବୁଝିସାରିଲାଣି କେବଳ ପୋଷ୍ଟର ବୟଙ୍କୁ ପ୍ରମୋସନ କଲେ ହେବ ନାହିଁ  । ବରଂ ଲୋକଙ୍କ ପାଖକୁ ଯିବାକୁ ହେବ  । ଏବେ ସେଥିପାଇଁ ବିଜେପିର ନୂଆ ନେତ୍ରୀ ଅପରାଜିତା ଷଢଙ୍ଗୀ ବି କ୍ୟାମେରାରେ ମୁହଁ ଦେଖାଇବା ଅପେକ୍ଷା ଲୋକଙ୍କ ପାଖକୁ ଯାଉଛନ୍ତି ।  ଆଉ ରାଜ୍ୟ ବିଜେପି କାର୍ଯ୍ୟାଳୟରେ କେବଳ ସାମ୍ବାଦିକ ସମ୍ମିଳନୀ କରି ଅଭିଯୋଗର ତାଲିକା କହୁଥିବା ନେତ୍ରୀମାନେ ହୁଏତ ସେତିକି ଲୋକପ୍ରିୟ ନ ହୋଇପାରନ୍ତି  । କାରଣ ଭୋଟର ବୁଝନ୍ତି କିଏ ଆସି ପାଖରେ ଠିଆ ହେଉଛି ଆଉ କିଏ କେବଳ ମୁହଁ ଦେଖାଉଛି ।

ବଡ ଟେନସନରେ ବୋଧେ ରହିଛି କଂଗ୍ରେସ କାରଣ ଦଳକୁ ନିର୍ବାଚନରେ ଜିତିବା ଚିନ୍ତା ଯେତିକି ନାହିଁ ଦଳୀୟ କନ୍ଦଳକୁ ନେଇ ଚିନ୍ତା  । ବିଶେଷ କରି ଗଣମାଧ୍ୟମରେ ହେଉଥିବା ଚର୍ଚ୍ଚା ଅନୁସାରେ ଦଳର ୩ରୁ ୪ ବିଧାୟକ ଅନ୍ୟ ଦଳକୁ ଯିବାକୁ କୁଆଡେ ଗୋଡ କାଢି ବସିଛନ୍ତି । ଏଭଳି ସ୍ଥିତି ହେଲେ ବିରୋଧୀ ଦଳ ନେତା ଯେଭଳି ୨୦୧୪ ମସିହାରେ ହଠାତ ଦଳ ଛାଡିଦେଲେ ଆଉ ଲୋକଙ୍କ ଇମ୍ପ୍ରେସନରେ ଦଳ ଆହୁରି ତଳକୁ ଚାଲିଗଲା ତାହା ଏବେ ପିସିସି ସଭାପତିଙ୍କୁ ନିହାତି ଘାଣ୍ଟୁଥିବ  । କାରଣ ପରିବର୍ତନର ସ୍ୱରରେ ତାଳ ମିଶାଇ ରାହୁଲଙ୍କୁ କହି ପିସିସିରେ ସିନା ପରିବର୍ତ୍ତନ ହୋଇଗଲା, କିନ୍ତୁ ରାହୁଲଙ୍କୁ ପୁଣି ତ ରେଜଲ୍ଟ ଦେଖାଇବାକୁ ପଡିବ  । ଆଉ ପ୍ରସଙ୍ଗକୁ ଆଧାର କରିବା ଅପେକ୍ଷା ନିଜ ଦଳର ବିବାଦକୁ ପ୍ରସଙ୍ଗ କରି ପରିବେଷଣ ପିସିସି ସଭାପତିଙ୍କୁ କଲବଲ କରିଦେଉଥିବ  । ତେବେ ସିଏ ଯାହା ହେଉନା କାହିଁକି ନିଦ ଲାଗୁ ବା ନ ଲାଗୁ, କିନ୍ତୁ ମନେ ରଖିବାକୁ ହେବ ଏ ଜୀବନ ଏକ ରଙ୍ଗମଞ୍ଚ  । ହୋଇପାରେ ୨୦୧୯ ବଦଳାଇପାରେ ରାଜନୀତିର ରଙ୍ଗ ଓ ଢଙ୍ଗ । କାରଣ ୨୦୧୯ରେ ହେବାକୁ ଥିବା ନିର୍ବାଚନରେ ଲୋକଙ୍କ ଅସନ୍ତୋଷ ଓ ନେତୃତ୍ୱ ପ୍ରତି ବିଶ୍ୱାସ ହିଁ କାମ ଦେବ । ଇଭିଏମରେ ଲୋକ ପରଖିବେ କାମ ଓ ଭାଷଣ ଭିତରର ଫରକ ।