କେଦାର ମିଶ୍ର
ପଞ୍ଜାବ-ମହାରାଷ୍ଟ୍ର ସମବାୟ ବ୍ୟାଙ୍କରେ ଟଙ୍କା ରଖିଥିବା ହଜାର ହଜାର ଗ୍ରାହକ ଏବେ ମୁଣ୍ଡରେ ହାତ ଦେଇ ବସିଛନ୍ତି। ନିଜେ ଜମା କରିଥିବା ଟଙ୍କା ଉଠାଇବାକୁ ତାଙ୍କୁ ବାରଣ କରାଯାଇଛି। ସାଧାରଣ କୃଷକ, ଶ୍ରମିକ, ଗୃହିଣୀ ଓ ଛୋଟ ବ୍ୟବସାୟୀ( ଏମାନେ ହିଁ ସମବାୟ ବ୍ୟାଙ୍କ ରେ ସର୍ବାଧିକ ଜମା କରିଥାନ୍ତି) ଏବେ ଜାଣନ୍ତି ନାହିଁ ତାଙ୍କ ଟଙ୍କାର ଭବିଷ୍ୟତ କଣ? ଏହି ବ୍ୟାଙ୍କରେ ଜମାଖାତା ଥିବା ଗ୍ରାହକମାନେ ଅତି ବେଶୀରେ ମାତ୍ର ହଜାରେ ଟଙ୍କା ଉଠାଇ ପାରିବେ ବୋଲି ରିଜର୍ଭ ବ୍ୟାଙ୍କ ଅଫ ଇଣ୍ଡିଆ ନିର୍ଦ୍ଦେଶ ଦେଇଛନ୍ତି। ପରେ ତାହାକୁ ଦଶ ହଜାର ଓ ପଚିଶ ହଜାରକୁ ବଢା ଯାଇଛି। ମାତ୍ର ୧୦ ଲକ୍ଷ ଟଙ୍କାର ପୁଞ୍ଜି ନେଇ ୧୯୮୪ରେ ଆରମ୍ଭ ହୋଇଥିବା ଏହି ବ୍ୟାଙ୍କରେ ଆଜି ସବୁଠୁ ବଡ ଘୋଟାଲା ସମ୍ଭବ ହୋଇଛି। ୨୧ ହଜାର ଜାଲ ଜମାଖାତା ଖୋଲି ରାକେଶ ୱାଧାବନ ଓ ଦେୱାନ ପରିବାରକୁ ସର୍ବାଧିକ ଋଣ ପ୍ରଦାନ କରାଯାଇଛି।
ରିଜର୍ଭ ବ୍ୟାଙ୍କ ଅଫ ଇଣ୍ଡିଆ ସମେତ ନେସନାଲ ରେଜିଷ୍ଟ୍ରାର ଓଫ କୋ ଅପରେଟିଭ,ମହାରାଷ୍ଟ୍ର ଓ ପଞ୍ଜାବ ରାଜ୍ୟ ସରକାର ଏହି ବ୍ୟାଙ୍କର ନିୟମିତ ସମୀକ୍ଷା କରୁଥିବା ସତ୍ତ୍ୱେ ଏହା ଏକ ନିର୍ଦ୍ଦିଷ୍ଟ କମ୍ପାନୀର ବ୍ୟକ୍ତିଗତ ସମ୍ପତ୍ତି ପାଲଟିଗଲା କେମିତି? ଗତ ପାଞ୍ଚ ବର୍ଷ ଧରି ମହାରାଷ୍ଟ୍ରରେ ବିଜେପି ସରକାର ରହିଥିବା ବେଳେ ଆଜି ପର୍ୟନ୍ତ ଏକଥା ଛପିକି ରହିଥିଲା କେମିତି? ତେବେ କେବଳ ପଞ୍ଜାବ ମହାରାଷ୍ଟ୍ର ସମବାୟ ବ୍ୟାଙ୍କ ନୁହଁ, ଏବେ ଲକ୍ଷ୍ମୀ ବିଳାସ ବ୍ୟାଙ୍କ ଉପରେ ମଧ୍ୟ ରିଜର୍ଭ ବ୍ୟାଙ୍କ ଅଙ୍କୁଶ ଲଗାଇଛି। ପୂର୍ବରୁ ପଞ୍ଜାବ ନ୍ୟାସନାଲ ବ୍ୟାଙ୍କରୁ ୧୫ ହଜାରରୁ ଅଧିକ କୋଟି ଟଙ୍କା ଗାୟବ କରି ନୀରବ ମୋଦୀ ଫେରାର ହୋଇଯାଇଥିବା କଥା ସମସ୍ତେ ଜାଣନ୍ତି।
ବ୍ୟାଙ୍କ ଗୁଡିକର ଋଣ ତଥା ଫେରି ପାରୁନଥିବା ପୁଞ୍ଜିର ପରିମାଣ ୧୫ ଲକ୍ଷ କୋଟି ଟଙ୍କାରୁ ଅଧିକ ହେଲାଣି। ଏ ସମ୍ପର୍କରେ କୌଣସି ବାସ୍ତବ ତଥ୍ୟ ଲୋକଙ୍କୁ ଜଣା ଯାଉନାହିଁ। ରିଜର୍ଭ ବ୍ୟାଙ୍କର ନିଜ ତଥ୍ୟ କହୁଛି ଗତ ବର୍ଷେ ଭିତରେ ବ୍ୟାଙ୍କରେ ଘୋଟାଲା ସଂଖ୍ୟା ଦେଢ ଗୁଣ ବଢିଛି। ଆଜି ନିଜେ ନିଜ ପଇସା ଉଠାଇବାକୁ ସାଧାରଣ ଲୋକ ପାଖରେ ଅଧିକାର ନାଇଁ। ଅଥଚ ଲୋକପ୍ରିୟତାରେ ମୋଦୀ ସରକାର ଆଜି ମଧ୍ୟ ଏକ ନମ୍ବର। କୁହାଯାଉଛି, ମହାରାଷ୍ଟ୍ରରେ ବିଜେପି ସରକାର ପୁଣିଥରେ ନିଶ୍ଚୟ ଜିତିବ।ବାସ୍ତବରେ ଏ ଗଣିତ ବୁଝା ପଡୁନାହିଁ। ସାଧାରଣ ଲୋକ ମୋଦୀ ସରକାରର ଆର୍ଥିକ ପରିଚାଳନାରେ ରହିଥିବା ତ୍ରୁଟି କାରଣରୁ ବାରମ୍ବାର ଅସୁବିଧାର ସମ୍ମୁଖୀନ ହେଉଥିଲେ ମଧ୍ୟ, ବାରମ୍ବାର ମୋଦୀଙ୍କ ନାମରେ ଭୋଟ ଦେଉଛନ୍ତି କେମିତି?
ଏହାର ଗୋଟେ ସରଳ ଉତ୍ତର ଏୟା ହୋଇପାରେ ଯେ, ଭ୍ରଷ୍ଟାଚାର ଏହି ସମୟରେ ଏକ ଗ୍ରହଣୀୟ ବ୍ୟବସ୍ଥା ହୋଇଯାଇଛି। ଲକ୍ଷାଧିକ କୋଟି ଟଙ୍କାର ବ୍ୟାଙ୍କ ଘୋଟାଲା ପରେ ମଧ୍ୟ ଦେଶରେ ଦୁର୍ନୀତି ବିରୋଧୀ କୌଣସି ଆନ୍ଦୋଳନ ଉଧେଇ ପାରୁନାହିଁ। ଏହାର ଏକମାତ୍ର କାରଣ ହେଉଛି, ରାଷ୍ଟ୍ରୀୟ ସୁରକ୍ଷା ଆଳରେ ଭ୍ରଷ୍ଟାଚାର ଏକ ସାଧାରଣ ଗ୍ରହଣୀୟ ବ୍ୟବସ୍ଥା ବୋଲି ଆମ ଲୋକ ଧରି ନେଇଛନ୍ତି।
ବର୍ତ୍ତମାନ ସମୟରେ ଯାହା ବ୍ୟାଙ୍କ ଘୋଟାଲା ହେଉଛି ହେଉ, ଦେଶରେ ସବୁ ଠିକ ଚାଲିଛି ବୋଲି ଆମେ ବିଶ୍ଵାସ କରିବାକୁ ବାଧ୍ୟ!!