କେଦାର ମିଶ୍ର
ରଫାଲର ଲେମ୍ବୁ ପୂଜା ବିଷୟରେ ଲେଖିବା ବେଳେ ଦୁଇ ଦିନ ତଳେ ଆମେ ଲେଖିଥିଲୁ- “ତେବେ ପାକିସ୍ତାନ କିଛି କମ ପୂଜା ପାଠରେ ବିଶ୍ଵାସୀ ନୁହଁ। ତାଙ୍କ ମନ୍ତ୍ରୀମାନେ ବି ତାବିଜ, ଟୁଣୁ ଟୁଣୁକା ରେ ବିଶ୍ଵାସ କରନ୍ତି। ରଫାଲ ତିଆରି କରିଥିବା “ଦାସଲ୍ଟ” କମ୍ପାନୀରୁ ପାକିସ୍ତାନ ମଧ୍ୟ ମିରାଜ-୩ ଓ ମିରାଜ-୫ ବିମାନ କିଣିଛି। ଏବେ ଚୀନ ପାଖରୁ ପାକିସ୍ତାନ କିଛି ଲଢୁଆ ବିମାନ କିଣିବାର ଯୋଜନା କରୁଛି। ସେଠିକି ସେମାନେ ମଧ୍ୟ ମୌଲବୀ ନେଇ ତାବିଜ ବାନ୍ଧିବାକୁ ଯିବେ”।
ତେବେ ଏ ଲେଖା ପଢି ମୁଣ୍ଡ ନଥିବା ଭକ୍ତମାନେ ହଠାତ ଆମ ପାଖକୁ “ପାକିସ୍ତାନ ଚାଲି ଯାଅ’ ବୋଲି ତାଙ୍କର ଚିରାଚରିତ ପ୍ରଳାପ ଆରମ୍ଭ କରିଥିଲେ। ତେବେ ସେହି ଭକ୍ତଙ୍କ ପାଇଁ ପାକିସ୍ତାନ ସେନାବାହିନୀର ଗୋଟେ ଭଲ ବାର୍ତ୍ତା ଆସିଛି। ରାଜନାଥ ସିଂ ରଫାଲ ପୂଜା କରିବାକୁ ପାକିସ୍ତାନ ସେନା ବାହିନୀ ଉଚ୍ଛ୍ଵସିତ ପ୍ରଶଂସା କରିଛି। ପ୍ରଶଂସା କରିଥିବା ଲୋକ ଖୋଦ ପାକିସ୍ତାନ ସେନାବାହିନୀର ମୁଖପାତ୍ର ଆସିଫ ଗଫୂର। ଗତ ୧୧ ଅକ୍ଟୋବର ଠିକ ରାତି ୧୨ ଟାରେ ଆସିଫ ଗଫୁର ଏକ ଟୁଇଟ କରି ଲେଖିଛନ୍ତି ଯେ “ରଫାଲ ପୂଜାରେ କୌଣସି ଅସୁବିଧା ନାହିଁ। ଏହା ଏକ ଧାର୍ମିକ ପ୍ରଥା ଓ ଏହାକୁ ସମ୍ମାନ କରିବା ଉଚିତ।” ପାକିସ୍ତାନ ସେନାବାହିନୀ ସହିତ ମୁଲ୍ଲା ଓ ୱାହାବି ଭାବନାର ପୁରୁଣା ସମ୍ପର୍କ ରହିଛି। ତେଣୁ ଧର୍ମ ଆଧାରରେ ସାମରିକ ଶାସନ ଚଳାଇବାକୁ ପାକିସ୍ତାନ ସେନା ବାହିନୀ ସବୁବେଳେ ସୁଯୋଗ ଖୋଜିଥାଏ।
ଆମ ପାଇଁ ଚିନ୍ତାର ବିଷୟ ହେଉଛି, ଗଣାତାନ୍ତ୍ରିକ ପରମ୍ପରାରେ ବିଶ୍ଵାସ କରୁଥିବା ଓ ସବୁ ଧର୍ମକୁ ସମାନ ବୋଲି ବିଚାର କରି ରାଷ୍ଟ୍ରକୁ ଧର୍ମରୁ ଦୂରେଇ ରଖୁଥିବା ଆମର ସେନାବାହିନୀକୁ ପାକିସ୍ତାନ ସେନା ଭଳି କରି ଦିଆଯାଉଛି। ଆମେ ଭୁଲିଯିବା ଉଚିତ ନୁହଁ ଯେ ଆମର ସେନାବାହିନୀ କୌଣସି ଧାର୍ମିକ ଅନୁଷ୍ଠାନ ନୁହେଁ ଓ ସେନାର ପରମ୍ପରାରେ ଭାରତର ଏକତା ସବୁବେଳେ ପ୍ରତିଫଳିତ ହୋଇ ଆସିଛି।
ସେ ଯାହା ବି ହେଉ, ପାକିସ୍ତାନ ଆଉ କାହାକୁ ପ୍ରଶଂସା କଲେ, ଭକ୍ତ ମାନେ ସେମାନେ ପାକିସ୍ତାନ ଚାଲି ଯାଆନ୍ତୁ, ପାକିସ୍ତାନୀ ଦଲାଲ ଇତ୍ୟାଦି ଅଳଙ୍କାର ଯୋଡିଥାନ୍ତି। ଆଜି ପାକିସ୍ତାନ ସେନାବାହିନୀ ଖୋଦ ଭାରତର ରଫାଲ ପୂଜାକୁ ସମର୍ଥନ କରି ଟୁଇଟ କଲାପରେ- ଏବେ କୁହନ୍ତୁ, ପାକିସ୍ତାନ ଯିବ କିଏ???
