ସମୀକ୍ଷା ବ୍ୟୁରୋ
ଓଡିଶା ସରକାରଙ୍କ ବିଦ୍ୟାଳୟ ଓ ଗଣଶିକ୍ଷା ବିଭାଗକୁ ଲଜ୍ଜା ଲାଗିବା କଥା, କାରଣ ଏହା ଭାରତର ସବୁଠୁ ଜଘନ୍ୟ ହତ୍ୟାକାଣ୍ଡକୁ ଏକ “ଆକସ୍ମିକ ଘଟଣାକ୍ରମ” ବୋଲି କହିଛି। ଏକଥା କହିବାର ଅଧିକାର ଗଣଶିକ୍ଷା ବିଭାଗକୁ ଦେଲା କିଏ? ଆଜି ଯାଏ ଆମେ ପଢି ଆସୁଥିଲୁ ୩୦, ଜାନୁଆରୀ, ୧୯୪୮ ରେ ନାଥୁରାମ ଗଡସେ ନାମକ ଜଣେ ଆତତାୟୀ ଜାତିର ପିତା ମହାତ୍ମା ଗାନ୍ଧୀଙ୍କୁ ଗୁଳି କରି ହତ୍ୟା କରିଥିଲା। ଆଜି ଓଡିଶା ସରକାର କହୁଛନ୍ତି- “୩୦, ଜାନୁଆରୀ,୧୯୪୮ରେ ଦିଲ୍ଲୀ ବିରଳା ଭବନରେ ଏକ ଆକସ୍ମିକ ଘଟଣାକ୍ରମେ ଗାନ୍ଧୀଜୀଙ୍କର ଦେହାବସାନ ହୋଇଥିଲା।” ଇତିହାସକୁ ବିକୃତ କରି ଗାନ୍ଧୀ ହତ୍ୟା ପ୍ରସଙ୍ଗକୁ ଓଡିଶା ସରକାର ପିଲାଙ୍କ ପାଖରେ ଲୁଚାଇବାକୁ ଚେଷ୍ଟା କରୁଛନ୍ତି କାହିଁକି?
ଗୋଟେ ପକ୍ଷରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ “ଅହିଂସା” କୁ ସମ୍ବିଧାନର ମୁଖବନ୍ଧରେ ସ୍ଥାନିତ କରିବାକୁ ଦାବି କରୁଛନ୍ତି ଓ ଗାନ୍ଧୀଙ୍କ ବାଣୀ ଓ ବିଚାର ଉପରେ ସର୍ବାଧିକ ଗୁରୁତ୍ଵ ଦେଉଛନ୍ତି, ହେଲେ ତାଙ୍କ ସରକାର ଗାନ୍ଧୀଜୀଙ୍କ ଜୀବନୀକୁ ବିକୃତ କରି ଛାତ୍ରଛାତ୍ରୀଙ୍କୁ ପଢିବାକୁ ଦେଉଛନ୍ତି। ଏହା ଅତ୍ୟନ୍ତ ନିନ୍ଦନୀୟ। ବିଦ୍ୟାଳୟ ଓ ଗଣଶିକ୍ଷା ବିଭାଗ ଏଥି ପାଇଁ କେବଳ ନିନ୍ଦିତ ହେଲେ ଚଳିବ ନାହିଁ, ଯେଉଁମାନେ ଏଥିପାଇଁ ଦାୟୀ, ସେମାନଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ହେବା ଜରୁରୀ।
ଅନେକ ସମୟରେ ବିଜେପି ଶାସିତ ରାଜ୍ୟଗୁଡିକରେ ଗାନ୍ଧୀଙ୍କ ଜୀବନୀକୁ ବିକୃତ କରି ପଢାଇବାର ଉଦାହରଣ ରହିଛି। ଗୁଜରାଟ ସରକାରଙ୍କ ବହିରେ ଗାନ୍ଧୀ ଆତ୍ମହତ୍ୟା କରିଥିଲେ ବୋଲି ଲେଖା ଯାଇଥିଲା। ତେବେ ଓଡିଶାରେ ବିଜେପି ସରକାର ଚାଲିଛି କି? ଗାନ୍ଧୀଙ୍କ ଅନୁଗାମୀ ବୋଲି କହୁଥିବା ବିଜେଡି ଗାନ୍ଧୀ ବିଚାରକୁ ନେଇ ବିକୃତ ତଥ୍ୟ ପ୍ରସାରିତ କରୁଛି କାହିଁକି?
ଗାନ୍ଧୀଙ୍କ ୧୫୦ତମ ଜୟନ୍ତୀ ପାଳନ ଅବସରରେ ରାଜ୍ୟ ସରକାର ବହୁ କାର୍ଯ୍ୟକ୍ରମ ଆୟୋଜନ କରିଛନ୍ତି। ତେବେ ସେସବୁ ଆୟୋଜନ ଏ ପ୍ରକାର ବିକୃତି ଯୋଗୁଁ ଫିକା ପଡିଯାଇଛି। ଏହା ସହିତ ସାମାଜିକ ଉତ୍ସବ ଗୁଡିକରେ ମଦ ବିକ୍ରି କରିବା ଲାଗି ରାଜ୍ୟ ସରକାର ଅନୁମତି ଦେବା ପ୍ରସଙ୍ଗକୁ ମଧ୍ୟ, ଗାନ୍ଧୀଙ୍କ ଜନ୍ମର ୧୫୦ ବର୍ଷରେ ଏକ ଶ୍ରଦ୍ଧାଞ୍ଜଳି ବୋଲି ଆମେ ଭାବିବା କି? ବାପୁଙ୍କ ଜୀବନରେ ନିଶା ନିବାରଣ ଏକ ପ୍ରମୁଖ ଲକ୍ଷ୍ୟ ଥିଲା। ଅନ୍ତତଃ ଏକଥା ରାଜ୍ୟ ସରକାର ଜାଣି ନାହାନ୍ତି ବୋଲି ଆମେ କହିପାରିବା ନାହିଁ।
ବାପୁଙ୍କ ପ୍ରତି ରାଜ୍ୟ ସରକାର ଏ ପ୍ରକାର ଆଭିମୁଖ୍ୟ ରଖିବା ଅତ୍ୟନ୍ତ ନିନ୍ଦନୀୟ।