ସମୀକ୍ଷା ବ୍ୟୁରୋ
ଆମ ଦେଶରେ କିଛି ବି ହୋଇପାରେ। ଯେମିତିକି ପୁଅ ଉପ ମୁଖମନ୍ତ୍ରୀ ହେବା କ୍ଷଣି ଦୁର୍ନୀତି ଅଭିଯୁକ୍ତ ବାପାକୁ ଜେଲରୁ ଛୁଟି ମିଳିଯାଇପାରେ। ଯେମିତିକି ମହାରାଷ୍ଟ୍ରରେ ଅଧରାତିଆ ସରକାର ଗଠନ ହେବାର ୪୮ ଘଣ୍ଟା ଭିତରେ ୭୨ ହଜାର କୋଟି ଟଙ୍କାର ଜଳସେଚନ ଦୁର୍ନୀତିର ଫାଇଲ ବନ୍ଦ ହୋଇଯାଇପାରେ। ଯେଉଁ ଅଜିତ ପାୱାର ବିରୋଧରେ ବିଜେପି ସରକାର ତଦନ୍ତ କରି ତାଙ୍କୁ ଦୁର୍ନୀତିର ସବୁଠୁ ବଡ ପ୍ରତୀକ ବୋଲି କହୁଥିଲା, ଆଜି ମାତ୍ର ୪୮ ଘଣ୍ଟାରେ ତାଙ୍କ ଦେହରୁ ସବୁ ଦାଗ ପୋଛିଦେଲା।
ଦେବେନ୍ଦ୍ର ଫଡନବିସ ଓ ଅଜିତ ପାୱାର ଦୁଇ ଦିନ ତଳେ ମହାରାଷ୍ଟ୍ରରେ ସରକାର ଗଢିଛନ୍ତି। ତାଙ୍କ ସରକାର ବିଧାନସଭାରେ ଏ ପର୍ୟନ୍ତ ବହୁମତ ସାବ୍ୟସ୍ତ କରିନାହିଁ। ଅଥଚ ଉପ ମୁଖ୍ୟମନ୍ତ୍ରୀଙ୍କ ନାଁରେ ରହିଥିବା ଦୁର୍ନୀତି ମାମଲାର ରଫା ଦଫା ହୋଇ ସାରିଛି। ଆଗରୁ ସରକାର ଗଠନ ପରେ ଲୋକେ କିଛିଟା ଦାୟିତ୍ଵବାନ ହେଉଥିଲେ। ବିଜେପି ଦଳରେ କିନ୍ତୁ ଦାୟିତ୍ଵବାନ ହେବାର ଅର୍ଥ ହେଉଛି, ସବୁ ପ୍ରକାର ଭ୍ରଷ୍ଟାଚାରକୁ ଛାତି ପିଟି ଭଲ ହୋଇଛି ବୋଲି କହିବା।
ମାତ୍ର ୪୮ ଘଣ୍ଟାର ଏକ ସରକାର, ଦୁର୍ନୀତିକୁ ପ୍ରୋତ୍ସାହିତ କରିବାର ଏହି ବିରାଟ ଉଦାହରଣକୁ ଦେଶବାସୀ ସବୁଦିନ ପାଇଁ ମାନେ ରଖିବେ। ଦୁର୍ନୀତି ବିରୋଧରେ ବଡ ବଡ ଭାଷଣ ଦେଇ ସରକାର ଗଢିଥିବା ନରେନ୍ଦ୍ର ମୋଦୀଙ୍କ ଦଳ, ଆଜି ଦୁର୍ନୀତିଖୋରଙ୍କ ଆଶ୍ରାରେ କ୍ଷମତା ଦଖଲ କରୁଛି। ଅଜିତ ପାୱାରଙ୍କ ବିରୋଧରେ ରହିଥିବା ୨୦ ଟି ମାମଲାରୁ ୯ ଟିକୁ ବନ୍ଦ କରି ଦିଆଯାଇଛି। ସୁପ୍ରିମ କୋର୍ଟରେ ଗୋଟେ ସରକାରର ଭାଗ୍ୟ ଝୁଲିକି ରହିଥିବା ବେଳେ ଏ ପ୍ରକାର ନିଷ୍ପତ୍ତି ଆମର ଗଣତନ୍ତ୍ରକୁ ଉପହସିତ କରୁଛି।
ସବୁଠୁ ବିଡମ୍ବନାର କଥା ହେଉଛି, ଯିଏ ବି ସରକାର ଗଢୁ, ଆଗକୁ ଅଜିତ ପାୱାରଙ୍କୁ କେହି ଆଉ ଧରିବେ ନାହିଁ। ତେବେ ଏହି ଘଟଣା ପରେ ବି ବିଜେପି ନିଜକୁ ସ୍ବଚ୍ଛ ଓ ପବିତ୍ର ବୋଲି କହି ଭାଷଣ ଦେବା ଏବଂ ଭକ୍ତମାନେ ସେହି କଥାକୁ ବିଶ୍ଵାସ କରି ତାଳି ମାରିବେ ଓ ଏକଥା ସାମ୍ନା କୁ ଆଣିଥିବା ଲୋକଙ୍କୁ ଗାଳି କରୁଥିବେ!
