ମୁମ୍ବାଇ,26/11: ଶେଷରେ ମହାରାଷ୍ଟ୍ରର ମୁଖ୍ୟମନ୍ତ୍ରୀ ହେବେ ଶିବସେନା ଅଧ୍ୟକ୍ଷ ତଥା ମହା ବିକାଶ ଅଗାଡି ବା ମହା ବିକାଶ ମେଣ୍ଟର ସଭାପତି ଉଦ୍ଧବ ଠାକରେ। ଆଜି ମେଣ୍ଟ ତରଫରୁ ବିଧାୟକମାନେ ରାଜ୍ୟପାଳଙ୍କୁ ସାକ୍ଷାତ କରି ସରକାର ଗଠନ ପାଇଁ ନିଜର ସଂଖ୍ୟା ଗରିଷ୍ଠତା ପ୍ରମାଣ ଦେଇଥିଲେ। ରାଜ୍ୟପାଳ ତାହା ଗ୍ରହଣ କରିବା ସହିତ ସରକାର ଗଠନ ପାଇଁ ନିମନ୍ତ୍ରଣ କରିଥିଲେ। ସେହି ଅନୁସାରେ ମେଣ୍ଟର ଏକ ବୈଠକ ବସି ଆସନ୍ତା 28 ତାରିଖ ଗୁରୁବାର ଦିନ ଉଦ୍ଧବ ଠାକରେ ମୁଖ୍ୟମନ୍ତ୍ରୀ ଭାବେ ଶପଥ ନେବା ପାଇଁ ନିଷ୍ପତି କରାଯାଇଛି। ରାଜ୍ୟପାଳ ଗୁରୁବାର ଅପରାହ୍ନ 5ଟା 30 ମିନଟରେ ଶପଥ ଗ୍ରହଣ ଉତ୍ସବ କରିବା ପାଇଁ ସମ୍ମତି ଦେଇଛନ୍ତି। ଫଳରେ ମେଣ୍ଟ ତରଫରୁ ମୁମ୍ବାଇର ଶିବାଜୀ ପାର୍କରେ ଏହି ଶପଥ ଗ୍ରହଣ ଉତ୍ସବ କରିବା ପାଇଁ ସବୁ ପ୍ରକାରର ଆୟୋଜନ କରାଯାଉଛି।
ତେବେ ଏହି ଉତ୍ସବରେ ଅନ୍ୟମାନେ କିଏ ମନ୍ତ୍ରୀ ଭାବେ ଶପଥ ନେବେ ସେ ନେଇ କିଛି ସ୍ଥିର କରାଯାଇ ନାହିଁ। ଆସନ୍ତାକାଲି ମେଣ୍ଟର ଆଉ ଏକ ବୈଠକ କରି ସେଥିରେ କେଉଁମାନେ ମନ୍ତ୍ରୀ ହେବେ ତାହା ନିର୍ଦ୍ଧାରଣ କରାଯିବ ବୋଲି ଜଣାପଡିଛି। ତେବେ ଏଥର ଉପମୁଖ୍ୟମନ୍ତ୍ରୀ ପଦ ରଖାଯିବ କି ନାହିଁ ତାହା ମଧ୍ୟ ଜଣାପଡି ନାହିଁ। ତେବେ ପୂର୍ବରୁ ମୁଖ୍ୟମନ୍ତ୍ରୀ ପଦ ଯେପରି ଭାଗ ବଣ୍ଟା ଯିବାର ସମ୍ଭାବନା ଥିଲା ତାହା ହେବ ନାହିଁ। ଉଦ୍ଧବ ଠାକରେ ପୁରା ପାଞ୍ଚ ବର୍ଷ ମୁଖ୍ୟମନ୍ତ୍ରୀ ରହିବ ବୋଲି ମେଣ୍ଟ ତରଫରୁ ଘୋଷଣା କରାଯାଇଛି।
ସଂଖ୍ୟା ଗରିଷ୍ଠତାର ପ୍ରମାଣ ଦେଇ ନ ପାରିବାରୁ ଅପରାହ୍ନରେ ବିଜେପି ତଥା ପୂର୍ବତ୍ତନ ମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନାବିସ୍ ରାଜ୍ୟପାଳଙ୍କୁ ଭେଟି ତାଙ୍କର ଇସ୍ତଫା ପତ୍ର ପ୍ରଦାନ କରିଥିଲେ। ଏହାପରେ ଶିବସେନା, କଂଗ୍ରେସ ଓ ଏନସିପି ଏକାଠି ବୈଠକ କରି ମେଣ୍ଟର ନାମ “ମହା ବିକାଶ ଅଗାଡି” ବା ମହା ବିକାଶ ମେଣ୍ଟ ହେବ ବୋଲି ଘୋଷଣା କରିଥିଲେ। ଏହି ମେଣ୍ଟର ନେତା ଉଦ୍ଧବ ଠାକରେଙ୍କୁ ମନୋନିତ କରାଯାଇଥିଲା। ନିଜର ସଂଖ୍ୟା ଗରିଷ୍ଠତା ସହିତ ଉଦ୍ଧବ ଠାକରେ ମେଣ୍ଟର ନେତା ଭାବେ ରାଜ୍ୟପାଳଙ୍କୁ ଅବଗତ କରାଯାଇଥିଲା। ତାହାକୁ ଗ୍ରହଣ କରି ରାଜ୍ୟପାଳ ସରକାର ଗଠନ ପାଇଁ ମେଣ୍ଟର ଅନୁରୋଧକୁ ଗ୍ରହଣ କରିଛନ୍ତି। ଗୁରୁବାର ଦିନ ଆକର୍ଷଣୀୟ ଭାବେ ଶପଥ ପାଠ ଉତ୍ସବ କରାଯିବ ବୋଲି ମେଣ୍ଟ ତରଫରୁ ନିଷ୍ପତି କରାଯାଇଛି।
