ଭୁବନେଶ୍ବର, ଜଣେ ଶ୍ରମିକଙ୍କ ପାଖକୁ ବର୍ଷକର ଆୟ ବାବଦରେ 2 ଲକ୍ଷ 59 ହଜାର ଟଙ୍କା ଆୟକର ବା ଆଇଟି ବାବଦକୁ ଜମା କରିବା ପାଇଁ ଏକ ନୋଟିସ ମିଳିଛି। ଏହି ନୋଟିସଟି ଆୟକର ବିଭାଗ ଦେଇଛି। ସେଥିରେ ଉଲ୍ଲେଖ ରହିଛି ଯେ, ତାଙ୍କ ବ୍ୟାଙ୍କ ଆକାଉଣ୍ଟରେ 1 କୋଟି 47 ଲକ୍ଷ ଟଙ୍କାର କାରବାର ହୋଇଛି। ସେହି କାରବାର ବାବଦର ଆୟକର ହେଉଛି 2.59 ଲକ୍ଷ ଟଙ୍କା। ଏହି ନୋଟିସ ପାଇବା ପରେ ସେହି ଶ୍ରମିକ ଜଣଙ୍କ ହତବାକ ହୋଇପଡିଛନ୍ତି। ଯାହାର ଦୈନିକ ରୋଜଗାର ମାତ୍ର ଦୁଇରୁ ତିନିଶହ ଟଙ୍କା ଥିବା ବେଳେ ସେ କେଉଁଠୁ ଏତେ ଟଙ୍କା ପଇଠ କରିବ ବୋଲି ମୁଣ୍ଡରେ ହାତ ଦେଇ ବସିଛନ୍ତି।
ଏହି ଘଟଣାଟି ଓଡିଶାର ନବରଂଗପୁର ଜିଲ୍ଲାର ପୁଜାରୀଭରଣ୍ଡି ଗାଁରେ ଘଟିଛି। ଏହି ଗାଁର ସାନଧର ଗଣ୍ଡଙ୍କୁ ମିଳିଛି ଏହି ନୋଟିସ। ତାଙ୍କୁ କୁହାଯାଇଛି ଯେ, ତାଙ୍କର ଆଇସିଆଇସିଆଇ ବ୍ୟାଙ୍କରେ ଯେଉଁ ଆକାଉଣ୍ଟ ଅଛି ସେଥିରେ 2014-15 ମସିହାରେ 1 କୋଟି 47 ଲକ୍ଷ ଟଙ୍କା ଜମା ହୋଇଛି। ବିଭିନ୍ନ ସମୟରେ ଏହି ଟଙ୍କା ଉଠାଯାଇଛି। ସେହି କାରବାରର ଆୟକର ବାବଦରେ ଅଢେଇ ଲକ୍ଷ ଟଙ୍କା ଜମା କରିବା କଥା।ହେଲେ ତାହା ଜମା ହୋଇ ନ ଥିବାରୁ ତୁରନ୍ତ ଜମା କରିବାକୁ ନିର୍ଦ୍ଦେଶ ଦିଆଯାଇଛି।
ପ୍ରକୃତରେ ଘଟଣାଟି ସତକଥା। ଗଣ୍ଡଙ୍କ ଆକାଉଣ୍ଟରେ 1 କୋଟି 47 ଲକ୍ଷ ଟଙ୍କା ଜମା ଓ ଉଠାଣ ହୋଇଛି। ମାତ୍ର ସେ ଟଙ୍କା ତାଙ୍କର ନୁହେଁ। ଗଣ୍ଡଙ୍କ କହିବା କଥା ହେଲା ଯେ, ତାଙ୍କ ନାମରେ ସେହି ଗାଁର ପପୁ ଅଗ୍ରୱାଲା ନାମକ ଜଣେ ବ୍ୟକ୍ତି ଏକ ଆକାଉଣ୍ଟ ଖୋଲିଥିଲେ। ଗଣ୍ଡ ତାଙ୍କ ଘରେ ଦୀର୍ଘ ବର୍ଷ ଧରି କାମ କରୁଥିବାରୁ ସେହି ବିଶ୍ବାସରେ ପପୁଙ୍କୁ ଭରସା କରି ଏକ ଆକାଉଣ୍ଟ ଖୋଲିଥିଲେ। ଏଥିସହିତ ତାଙ୍କ ଜମିର ପଟ୍ଟା ମାଗିବାରୁ ତାହା ମଧ୍ୟ ପପୁଙ୍କୁ ଦେଇଥିଲେ। ସେତେବେଳେ ସେ ଏକ ଧଳାକାଗଜରେ ଦସ୍ତଖତ ମଧ୍ୟ କରି ନେଇଥିଲେ। ହେଲେ ତାପରେ କଣ ହେଲା ସେ ଜାଣନ୍ତି ନାହିଁ।
ଘଟଣାରୁ ଅନୁମାନ କରାଯାଇଛି ଯେ, ପପୁ ଅଗ୍ରୱାଲା ଗଣ୍ଡଙ୍କ ନାମରେ ଏକ ଆକାଉଣ୍ଟ ଖୋଲି ସେଥିରେ କୋଟି କୋଟି ଟଙ୍କାର କାରବାର କରିଛନ୍ତି। ଆୟକର ଫାଙ୍କିବା ପାଇଁ ପପୁ ଗଣ୍ଡଙ୍କୁ ମୋହରା ବନାଇ ଏପରି କାମ କରିଛନ୍ତି। ଗରିବ ଶ୍ରମକ ଜଣଙ୍କ ଏତେ କଥା ଜାଣିପାରି ନାହିଁ। ହେଲେ ଯେତେବେଳେ ଆଇଟି ନୋଟିସ ଆସିଲା ଘଟଣାଟି ପଦାକୁ ଆସିଲା।
ଏହି ଘଟଣାକୁ ନେଇ ବର୍ତ୍ତମାନ ସେହି ଅଞ୍ଚଳରେ ଏକ ଚର୍ଚ୍ଚାର ବିଷୟ ପାଲଟିଛି। ଅନ୍ୟପଟେ ଆଇଟି ବିଭାଗ କଣ କରିବ ସେ ନେଇ ମଧ୍ୟ ଚିନ୍ତାରେ ପଡିଯାଇଛି। ଏନେଇ ବିଭାଗ ପୋଲିସରେ ଖବର ଦେବ ବୋଲି ଜଣାପଡିଛି। ଏହି ଟଙ୍କା କିଏ କିପରି ଜମା କଲା ଏବଂ ଟଙ୍କା କୁଆଡେ ଗଲା ତାହାର ତଦନ୍ତ କରାଯିବ ବୋଲି ଜଣାପଡିଛି।
