ସମୀକ୍ଷା ବ୍ୟୁରୋ
ଭୁବନେଶ୍ବର: କରୋନା କବଳରେ ଏବେ ସାରା ବିଶ୍ବ କବଳିତ। ଚୀନ୍ରୁ ବୁହାନ ସହରରୁ ଏହି ମାରାତ୍ମକ ଭାଇରସ୍ ଏବେ ଦେଶର 100ଟି ଦେଶରୁ ଉର୍ଦ୍ଧ୍ବ ଦେଶକୁ କବଳିତ କରି ସାରିଲାଣି। ଭାରତରେ ଏହି ରୋଗରେ ଜଣକର ମୃତ୍ୟୁ ଘଟିଥିବାବେଳେ 76ଜଣ ଆକ୍ରାନ୍ତ ହୋଇଥିବାର ସୂଚନା ମିଳିଛି। କରୋନାର ଭୟାବହତାକୁ ଦେଖି ସମସ୍ତ ରାଷ୍ଟ୍ର କରୋନା ପାଇଁ ସତର୍କତା ଅବଲମ୍ବନ କରୁଛନ୍ତି। ବିଶ୍ୱ ସ୍ୱାସ୍ଥ୍ୟ ସଂଗଠନ COVID-19କୁ ଏକ ବିଶ୍ୱ ମହାମାରୀ ବୋଲି ଘୋଷଣା କରିଛି। ମହାମାରୀର ପ୍ରସାରକୁ ରୋକିବା ପାଇଁ ସମସ୍ତ ସଦସ୍ୟ ରାଷ୍ଟ୍ରମାନଙ୍କୁ ଜରୁରୀ ଏବଂ ଆକ୍ରମଣାତ୍ମକ ପଦକ୍ଷେପ ନେବାକୁ ଅନୁରୋଧ କରିଛନ୍ତି। ଏହି ପରିପ୍ରେକ୍ଷୀରେ ଆଜି ଓଡ଼ିଶାର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ କରୋନାକୁ ରାଜ୍ୟ ବିପର୍ଯ୍ୟୟ ଘୋଷଣା କରିଛନ୍ତି। ଏନେଇ ଆଜି କ୍ୟାବିନେଟ ବୈଠକରେ ନିଷ୍ପତି ହୋଇଥିବା ବେଳେ ଗୃହରେ ବିବୃତି ରଖିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ। କରୋନାର ମୁକାବିଲା ପାଇଁ ୨୦୦ କୋଟି ଟଙ୍କାର ପାଣ୍ଠି ଘୋଷଣା କରିଛନ୍ତି ରାଜ୍ୟ ସରକାର
ଆଜି ସକାଳେ ରାଜ୍ୟ କ୍ୟାବିନେଟ୍ ମିଟିଂରେ କରୋନାକୁ ବିପର୍ଯ୍ୟୟ ପରିଚାଳନା ଅଧିନିୟମ, 2005 ଅନୁଯାୟୀ କୋବିଦ-19ର ବିସ୍ତାରକୁ ମୁକାବିଲା କରିବା ପାଇଁ ଆମ ସରକାରୀ କର୍ମଚାରୀଙ୍କୁ ଯଥେଷ୍ଟ ସଶକ୍ତ କରିବାକୁ ରାଜ୍ୟ ପାଇଁ ଏକ ବିପର୍ଯ୍ୟୟ ବୋଲି ଘୋଷଣା କରିଛି।
ସ୍ୱାସ୍ଥ୍ୟ ଏବଂ ପରିବାର କଲ୍ୟାଣ ବିଭାଗ ଏବଂ ଏହାର ନିର୍ଦ୍ଦେଶାଳୟ, ତଥା କଲେକ୍ଟର ଏବଂ ମ୍ୟୁନିସିପାଲିଟି କମିଶନରଙ୍କୁ କରୋନାକୁ ରୋକିବା ତଥା ହ୍ରାସ କରିବା ପାଇଁ ଆବଶ୍ୟକୀୟ ଔଷଧ ଏବଂ ଉପଯୋଗୀ ସାମଗ୍ରୀ ଯନ୍ତ୍ରପାତି ଏବଂ ଅନ୍ୟାନ୍ୟ ଆବଶ୍ୟକୀୟ ସେବା ଇତ୍ୟାଦି ଜରୁରୀକାଳୀନ କ୍ରୟ ପାଇଁ ଅନୁମତି ଦିଆଯାଇଛି।
ମହାମାରୀ ରୋଗ ଅଧିନିୟମ 1897 ଓ ଅପରାଧିକ ପ୍ରକ୍ରିୟା, 1973 ଅନୁଯାୟୀ ଏହି ମହାମାରୀଠାରୁ ‘ସାମାଜିକ ଦୂରତା’ ଲକ୍ଷ୍ୟରେ ସଭା, ମଣ୍ଡଳୀ, ଅନୁଷ୍ଠାନ ଏବଂ ପ୍ରତିଷ୍ଠାନ ଉପରେ ଆବଶ୍ୟକ ପ୍ରତିବନ୍ଧକ ଲଗାଇବାକୁ ଦକ୍ଷ ଅଧିକାରୀମାନଙ୍କୁ ଅନୁମତି ଦିଆଯାଇଛି। ।
କରୋନାର ବିସ୍ତାରକୁ ରୋକିବା ତଥା ହ୍ରାସ କରିବା ସମସ୍ତ ଆବଶ୍ୟକୀୟ ପଦକ୍ଷେପ ନେବାକୁ ମୁଖ୍ୟ ସଚିବଙ୍କ ଅଧ୍ୟକ୍ଷତାରେ ଏକ ସଚିବ କମିଟି ଗଠନ କରାଯାଇଛି । ମହାମାରୀର ବିପଦକୁ ମୁକାବିଲା କରିବା ପାଇଁ ଦୁଇଶହ କୋଟି ଟଙ୍କାର ପାଣ୍ଠି ରଖାଯାଇଛି ।
ଏହି ଅବସରରେ ମୁଖ୍ୟମନ୍ତ୍ରୀ କହିଛନ୍ତି ଯେ, ଚୀନ୍ ଏବଂ ସିଙ୍ଗାପୁର ଏବଂ ଇଟାଲୀର ଅଭିଜ୍ଞତା ଆମକୁ କ’ଣ କରିବାକୁ ହେବ ଏବଂ କଣ ନକରିବାକୁ ଏକ ଶିକ୍ଷା ଦେଇଛି । ସମଗ୍ର ବିଶ୍ବ ଏହି ବିପର୍ଯ୍ୟୟର ମୁକାବିଲା କରୁଛନ୍ତି । ଏପରି ସ୍ଥିତିରେ ଆମେ ଚାରି କୋଟି ଓଡିଆ ଏକାଠି ହୋଇ ଏହି ବିପଦପୂର୍ଣ୍ଣ ପରିସ୍ଥିତିର ମୁକାବିଲା କରିବା । ସମସ୍ତଙ୍କର ନିଜ ପାଇଁ, ନିଜ ପରିବାର ଓ ଆମେ ରହୁଥିବା ସମ୍ପ୍ରଦାୟ ପାଇଁ ଦାୟିତ୍ବ ରହିଛି । ଏହାକୁ ସଠିକ୍ ଭାବରେ ନିର୍ବାହ କରିବା । ଏହି ମହାମାରୀରୁ ରକ୍ଷା ପାଇଁ ଏପର୍ଯ୍ୟନ୍ତ ଏକମାତ୍ର ପ୍ରଭାବଶାଳୀ ପଦକ୍ଷେପ ହେଉଛି ସାମାଜିକ ଦୂରତା । ତେଣୁ, ଆମେ ସାମାଜିକ ଦୂରତା ଅଭ୍ୟାସ କରିବା ଉଚିତ୍ ବୋଲି କହିଛନ୍ତି ।
କରୋନା ମୁକାବିଲା ପାଇଁ ରାଜ୍ୟର ସମସ୍ତ ଶିକ୍ଷାନୁଷ୍ଠାନକୁ ଆସନ୍ତା 31 ତାରିଖ ପର୍ଯ୍ୟନ୍ତ ବନ୍ଦ ରଖିବା ନିର୍ଦ୍ଦେଶ ଦିଆଯାଇଛି । ଯେଉଁ ସବୁ ଶିକ୍ଷାନୁଷ୍ଠାନରେ ପରୀକ୍ଷା ଚାଲିଛି, ସେହି ଶିକ୍ଷାନୁଷ୍ଠାନ ବନ୍ଦ ରହିବ ନାହିଁ । ସେହିପରି ସରକାରୀ ସମାବେଶ ଯେପରିକି ସେମିନାର, କର୍ମଶାଳା, ସମ୍ମିଳନୀକୁ ମଧ୍ୟ ବାତିଲ୍ କରିବାକୁ ନିର୍ଦ୍ଦେଶ ରହିଛି । ସିନେମା, ହଲ୍, ସୁଇମିଂ ପୁଲ୍ ଏବଂ ଜିମ୍ଗୁଡିକ ମଧ୍ୟ ଆସନ୍ତା 31 ତାରିଖ ପର୍ଯ୍ୟନ୍ତ ବନ୍ଦ ରଖିବାକୁ ନିର୍ଦ୍ଦେଶ ଦିଆଯାଇଛି।
ସମାବେଶଠାରୁ ଦୂରରେ ରହିବା ସତର୍କ ରହିବାକୁ ନିର୍ଦ୍ଦେଶ ଦିଆଯାଇଛି । ବାରମ୍ବାର ହାତ ଧୋଇବା ସହିତ ସାନିଟାଇଜେସନ୍ ବ୍ୟବହାର କରିବାକୁ ନିର୍ଦ୍ଦେଶ ଦିଆଯାଇଛି । ସେହିପରି ଛିଙ୍କିବା ତଥା କାଶିବା ସମୟରେ ରୁମାଲ୍ ବ୍ୟବହାର କରିବା ଅନ୍ୟ ସହିତ ହାତ ମିଳାଇବାରୁ ନିବୃତ୍ତ ରହିବାକୁ କୁହାଯାଇଛି । ସେହିଭଳି ବାହାରେ ଛେପ ନ ପକାଇବାକୁ ସାଧାରଣ ଲୋକଙ୍କୁ ଅପିଲ କରିଛନ୍ତି ମୁଖ୍ୟମନ୍ତ୍ରୀ । କୌଣସି ବିବାହ, ବତ୍ର କିମ୍ବା କୌଣସି ଉତ୍ସବରେ ଏକାଠି ନହେବାକୁ ଅନୁରୋଧ କରିଛନ୍ତି ନବୀନ । ସେହିଭଳି କରୋନାର ମୁକାବିଲା ପାଇଁ ଲୋକଙ୍କୁ ସଚେତନ କରାଯିବ ବୋଲି କହିଛନ୍ତି ନବୀନ ।
କରୋନା ଭାଇରସ୍ ମୁକାବିଲା ପାଇଁ ରାଜ୍ୟ ସରକାର ମିଶନ ମୋଡରେ ପ୍ରସ୍ତୁତ ବୋଲି କହିଛନ୍ତି ନବୀନ ପଟ୍ଟନାୟକ । ସେହିପରି କରୋନା ସମ୍ପର୍କିତ ଗୁଜବ ପ୍ରଚାର ଓ ପ୍ରସାର କଲେ କାର୍ଯ୍ୟାନୁଷ୍ଠାନ ନିଆଯିବ ବୋଲି ସୂଚନା ଦେଇଛନ୍ତି ମୁଖ୍ୟମନ୍ତ୍ରୀ ।