ସମୀକ୍ଷାବ୍ୟୁରୋ
ଭୁବନେଶ୍ୱର: ପୂର୍ବତଟ ରେଳପଥ କରୋନା ଭୂତାଣୁ (କୋଭିନ୍-୧୯) ସଂକ୍ରମଣକୁ ରୋକିବା ନିମନ୍ତେ ତାହାର ସମସ୍ତ କଳକବ୍ଜା ଓ ଶକ୍ତି ବିନିଯୋଗ କରି ବ୍ୟାପକ ବ୍ୟବସ୍ଥା କରିଛି। ରେଳବାଇର ମହାପ୍ରବନ୍ଧକ ବିଦ୍ୟାଭୂଷଣ ରେଳବାଇ ସ୍ୱାସ୍ଥ୍ୟକେନ୍ଦ୍ର ଏବଂ ମଣ୍ଡଳ ରେଳ ପ୍ରବନ୍ଧକମାନଙ୍କୁ ଏହି ଭୂତାଣୁ ସଂକ୍ରମଣରୁ ରକ୍ଷା କରିବା ନିମନ୍ତେ ସମସ୍ତ ରେଳପଥରେ ପର୍ଯ୍ୟାପ୍ତ ପ୍ରତିଷେଧକ ବ୍ୟବସ୍ଥା ନେବାକୁ ନିର୍ଦ୍ଦେଶ ଦେଇଛନ୍ତି। କାର୍ଯ୍ୟକାରିତାକୁ ନିୟମିତ ଭାବେ ଯାଞ୍ଚ କରିବା ସହ ଆବଶ୍ୟକୀୟ ବ୍ୟାପକ ପଦକ୍ଷେପ ଗ୍ରହଣ କରି ସଂକ୍ରମଣକୁ ରେଳ ପରିସରରେ ରୋକିବାକୁ ସମସ୍ତ ଉଦ୍ୟମ କରିବା ପାଇଁ ବିଦ୍ୟାଭୂଷଣ ପରାମର୍ଶ ଦେଇଛନ୍ତି। ଏହି ରେଳପଥର ବିଭିନ୍ନ ଗୁରୁତ୍ୱପୂର୍ଣ୍ଣ ସ୍ଥାନରେ ନିୟନ୍ତ୍ରଣ କକ୍ଷ ଖୋଲିବା ସହ ହେଲପ୍ଲାଇନ୍ ନମ୍ବର ମଧ୍ୟ ପ୍ରଦାନ କରାଯାଇଛି। ଏହାସହିତ କର୍ମଚାରୀମାନଙ୍କୁ ସୂକ୍ଷ୍ମାନୁଭୂତି ସଂପନ୍ନ ଓ ଶିକ୍ଷିତ କରାଯାଉଛି। ରାଜ୍ୟ ଓ କେନ୍ଦ୍ର ସରକାରଙ୍କ ସ୍ୱାସ୍ଥ୍ୟ କର୍ତ୍ତୃପକ୍ଷମାନଙ୍କ ସହ ସହଯୋଗିତା ଓ ସଂଯୋଗ ରଖାଯାଇଛି।
ପୂର୍ବ ତଟ ରେଳପଥ ପକ୍ଷରୁ ନିଆଯାଇଥିବା ପଦକ୍ଷେପ ଗୁଡ଼ିକ ମଧ୍ୟରେ :-
* ନିୟନ୍ତ୍ରଣ କକ୍ଷ ଏବଂ ଟେଲିଫୋନ୍ ହେଲ୍ପଲାଇନ୍ ବୁଥ୍ ପୂର୍ବ ତଟ ରେଳପଥର ପରିସୀମା ଭିତରେ ବିଭିନ୍ନ ଗୁରୁତ୍ୱପୂର୍ଣ୍ଣ ସ୍ଥାନମାନଙ୍କରେ ଖୋଲା ଯାଇଛି ଏବଂ ଏହା ଉପରେ କର୍ମଚାରୀମାନଙ୍କୁ ସୂକ୍ଷ୍ମାନୁଭବୀ ଏବଂ ଶିକ୍ଷିତ କରାଯାଇଛି।
* ରେଳ ସ୍ୱାସ୍ଥ୍ୟକେନ୍ଦ୍ରଗୁଡ଼ିକୁ ଏହି ଆହ୍ୱାନକୁ ସମ୍ମୁଖୀନ ହେବାକୁ ସଂପୂର୍ଣ୍ଣଭାବେ ପ୍ରସ୍ତୁତ କରାଯାଇଛି।
* ରେଳ ଷ୍ଟେସନ ଏବଂ ଟ୍ରେନ୍ ଗୁଡ଼ିକରେ ବ୍ୟାପକ ସଚେତନତା ଅଭିଯାନ ଆରମ୍ଭ ହୋଇଛି।
* ବିଭିନ୍ନ ଟ୍ରେନ୍, ଷ୍ଟେସନ, ଷ୍ଟେସନ ପରିସର, ରେଳ କଲୋନୀ, କାର୍ଯ୍ୟାଳୟ ଓ ସ୍ୱାସ୍ଥ୍ୟକେନ୍ଦ୍ରମାନଙ୍କରେ ଜନସାଧାରଣ ଓ ରେଳ ଯାତ୍ରୀମାନଙ୍କୁ ସଚେତନ ଓ ଶିକ୍ଷିତ କରିବା ନିମନ୍ତେ ସ୍ଥାନୀୟ ଭାଷାରେ ପୋଷ୍ଟର ଓ ବ୍ୟାନରମାନ ଲଗାଯାଇଛି ଏବଂ ପ୍ରଚାରପତ୍ରଗୁଡ଼ିକ ବଣ୍ଟା ଯାଉଛି। ସ୍ଥାନୀୟ ଭାଷାରେ ଅଡ଼ିଓ ଭିଜୁଆଲ୍ ମାଧ୍ୟମରେ ବିଭିନ୍ନ ରେଳ ଷ୍ଟେସନ୍ଗୁଡ଼ିକରେ ପ୍ରଚାର କରାଯାଉଛି ଏବଂ ଷ୍ଟେସନମାନଙ୍କରେ ଥିବା ପବ୍ଲିକ ଆଡ୍ରେସ୍ ପଦ୍ଧତିରେ ଏହି ଅଡ଼ିଓ ପ୍ରତିଷେଧକ ସଚେତନତା ବାର୍ତ୍ତା ଘୋଷଣା କରାଯାଉଛି।
* ରେଲୱେ ହସ୍ପିଟାଲ୍ରେ ଯେଉଁ କର୍ମଚାରୀମାନଙ୍କୁ ଜ୍ୱର ହୋଇଛି, ସେମାନଙ୍କୁ ଅଲଗା କରାଯାଇଛି। ଜ୍ୱର କେଶ୍ ଗୁଡ଼ିକ ପାଇଁ ସ୍ୱତନ୍ତ୍ର କାଉଣ୍ଟର ବା ୱାର୍ଡ଼ ବ୍ୟବସ୍ଥା କରାଯାଉଛି। ସମସ୍ତ ପ୍ରକାର ପ୍ରତିଷେଧକ ବ୍ୟବସ୍ଥା ସହ ମେଡ଼ିକାଲ କର୍ମଚାରୀମାନଙ୍କୁ ବିଭିନ୍ନ ସ୍ଥାନରେ ନିଯୁକ୍ତ କରାଯାଇଛି।
* ସନ୍ଦିଗ୍ଧ କରୋନା ଭୂତାଣୁ କେଶ୍ ନିମନ୍ତେ ଜ୍ୱର ସମ୍ବନ୍ଧୀୟ କେଶ୍ ଗୁଡ଼ିକୁ ଚିିକିତ୍ସା ନିମନ୍ତେ ରେଳବାଇ ହସ୍ପିଟାଲ୍ରେ ପୃଥକ୍ ବେଡ଼୍ ପ୍ରଦାନ କରାଯାଇଛି। ଦେଶର ବିଭିନ୍ନ ସ୍ଥାନରେ ସଂଗରୋଧ ନିମନ୍ତେ ରେଲୱେ ସ୍ୱତନ୍ତ୍ର ବେଡ଼୍ ଚିହ୍ନିତ କରିଛି।
* ମେଡ଼ିକାଲ୍ କର୍ମଚାରୀମାନଙ୍କୁ ନିର୍ଦ୍ଦେଶ ପ୍ରଦାନ କରାଯାଇଛି ଯେ, ସେମାନେ ଯେଉଁଠି/ଯେଉଁଠାରେ କରୋନା ଭାଇରସ୍ ରୋଗୀ ସନ୍ଦେହ କଲେ କି ନଜରରେ ଆସିଲେ ସଂଗେ ସଂଗେ ସ୍ଥାନୀୟ ସ୍ୱାସ୍ଥ୍ୟ କର୍ତ୍ତୃପକ୍ଷଙ୍କୁ ତୁରନ୍ତ ଜଣାଇବେ। ସମସ୍ତ ରେଲୱେ ମେଡିକାଲ୍ କର୍ତ୍ତୃପକ୍ଷମାନଙ୍କୁ ନିର୍ଦ୍ଦେଶ ଦିଆଯାଇଛି ଯେ, ସେମାନେ ରାଜ୍ୟ କର୍ତ୍ତୃପକ୍ଷ ସହିତ ଯୋଗାଯୋଗରେ ରହି କରୋନା ଉପରେ ତଥ୍ୟ ନେବା ସହ ବିଭିନ୍ନ ନିର୍ଦ୍ଦେଶନାମା ସଂଗ୍ରହ କରି ତୁରନ୍ତ ପ୍ରତିଷେଧକ ବ୍ୟବସ୍ଥା କରିବେ।- * ରେଲୱେ ପରିସରରେ ପୃଥକ୍/ସଂଗରୋଧ କେନ୍ଦ୍ର ବେଡ଼୍ଗୁଡ଼ିକ ପ୍ରଶାସନ ସହ ପରାମର୍ଶ କରି ବ୍ୟବହାର କରାଯାଇପାରିବ।
- * ରେଳ କର୍ମଚାରୀ ଓ ରେଳ ଉପଭୋକ୍ତାମାନଙ୍କୁ ସଚେତନ ଓ ଶିକ୍ଷିତ କରିବା ନିମନ୍ତେ ରେଲୱେ ସେଟେଲ୍ମେଣ୍ଟରେ ସ୍ୱାସ୍ଥ୍ୟ ଶିକ୍ଷା ଅଭିଯାନ ଆରମ୍ଭ ହୋଇଛି।
- * ପ୍ରତିଷେଧକ ବ୍ୟବସ୍ଥା ଉପରେ ସ୍ୱାସ୍ଥ୍ୟ ଯତ୍ନ କର୍ମଚାରୀମାନଙ୍କୁ ପ୍ରଶିକ୍ଷଣ ପ୍ରଦାନ କରାଯାଉଛି।
- * ସନ୍ଦିଗ୍ଧ କୋଭିନ୍-୧୧ କେଶ୍ଗୁଡ଼ିକୁ ଚିକିତ୍ସା ନିମନ୍ତେ ଭୁବନେଶ୍ୱର ପୂର୍ବ ତଟ ରେଳପଥ କେନ୍ଦ୍ରିୟ ହସ୍ପିଟାଲ୍, ସମ୍ବଲପୁର, ବିଶାଖାପାଟଣା ଓ ଖୋର୍ଦ୍ଧାରୋଡ଼୍ ରେଳମଣ୍ଡଳରେ ମଣ୍ଡଳ ହସ୍ପିଟାଲ୍ ଗୁଡ଼ିକରେ ୧୦ଟି ବେଡ଼୍ ପୃଥକ୍ ଭାବେ ଔଷଧ ଓ ଜୀବନ ବଞ୍ଚେଇବା ଯନ୍ତ୍ରପାତି ସହ ବ୍ୟବସ୍ଥା କରାଯାଇଛି।