ନୂଆଦିଲ୍ଲୀ: ଦ୍ୱିପାକ୍ଷିକ ସମ୍ପର୍କର ସ୍ଥିର ତଥା ମଜବୁତ ବିକାଶ ପାଇଁ ଭାରତ ସହ କାର୍ଯ୍ୟ କରିବାକୁ ଚୀନ୍ ପ୍ରସ୍ତୁତ ବୋଲି ଚୀନ୍ ବୈଦେଶିକ ମନ୍ତ୍ରୀ ୱାଙ୍ଗ ୟି କହିଛନ୍ତି। ସୀମା ଅଞ୍ଚଳରେ ସ୍ଥିରତା ବଜାୟ ରଖିବାକୁ ଉଭୟ ଦେଶ ରାଜି ହୋଇଛନ୍ତି, ଯେଉଁଠାରେ ୨୦୨୦ ରୁ ବିବାଦ ରହିଆସିଛି। ୨୦୨୨ ମସିହାରେ ଆନ୍ତର୍ଜାତୀୟ ପରିସ୍ଥିତି ଏବଂ ଚୀନ୍ର ବୈଦେଶିକ ସମ୍ପର୍କ ଉପରେ ଏକ ସେମିନାରରେ ୱାଙ୍ଗ କହିଛନ୍ତି ଯେ, କୂଟନୈତିକ ତଥା ସାମରିକ ଚ୍ୟାନେଲ ମାଧ୍ୟମରେ ଚୀନ୍ ଏବଂ ଭାରତ ସମ୍ପର୍କ ବଜାୟ ରଖିଛନ୍ତି। ସୀମାନ୍ତ ଅଞ୍ଚଳରେ ସ୍ଥିରତା ବଜାୟ ରଖିବାକୁ ଉଭୟ ଦେଶ ସହମତ ହୋଇଛନ୍ତି।
ସମ୍ପ୍ରତି ଶାସକ କମ୍ୟୁନିଷ୍ଟ ପାର୍ଟି ଅଫ୍ ଚାଇନା (ସିପିସି) କ୍ଷମତାକୁ ଫେରିଛି ଏବଂ ସି ଜିନପିଙ୍ଗ ପୁଣି ଥରେ ରାଷ୍ଟ୍ରପତି ଭାବରେ ନିର୍ବାଚିତ ହୋଇଛନ୍ତି। ୱାଙ୍ଗ ୟି ସେମିନାରରେ କହିଛନ୍ତି ଯେ, ଆମେ ଚୀନ୍-ଭାରତ ସମ୍ପର୍କର ସ୍ଥିର ତଥା ମଜବୁତ ବିକାଶ ଦିଗରେ ଭାରତ ସହ କାର୍ଯ୍ୟ କରିବାକୁ ପ୍ରସ୍ତୁତ।
ଚୀନ୍ର କୂଟନୈତିକ କାର୍ଯ୍ୟ ଉପରେ ୱାଙ୍ଗ ତାଙ୍କର ଦୀର୍ଘ ଅଭିଭାଷଣରେ ଆମେରିକା ସହିତ ଚୀନ୍ର ଖରାପ ସମ୍ପର୍କ ଏବଂ ୟୁକ୍ରେନ ଯୁଦ୍ଧ ସତ୍ତ୍ୱେ ଋଷ ସହିତ ବଢୁଥିବା ସମ୍ପର୍କ ଉପରେ ଅଧିକ ଧ୍ୟାନ ଦେଇଥିଲେ। ସେ ଭାରତ-ଚୀନ୍ ସମ୍ପର୍କ ବିଷୟରେ ସଂକ୍ଷେପରେ କହିଥିଲେ। ଚୀନ୍ ଏବଂ ଭାରତ ମଧ୍ୟରେ ସମ୍ପର୍କ ଏପ୍ରିଲ୍ ୨୦୨୦ ଠାରୁ ଖରାପ ହୋଇଯାଇଥିଲା, ଯେତେବେଳେ ଚୀନ୍ ବହୁ ସଂଖ୍ୟକ ସୈନ୍ୟଙ୍କୁ ପୂର୍ବ ଲଦାଖର ବିବାଦୀୟ ଅଞ୍ଚଳକୁ ସ୍ଥାନାନ୍ତର କରିବାକୁ ଚେଷ୍ଟା କରିଥିଲା। ଏହାଦ୍ୱାରା ଦୀର୍ଘ ସମୟ ଧରି ସାମରିକ ବିବାଦ ଦେଖାଦେଇଥିଲା। ଏହି ସମସ୍ୟାର ସମାଧାନ ପାଇଁ ଦୁଇ ଦେଶ ଏପର୍ଯ୍ୟନ୍ତ ୧୭ ପର୍ଯ୍ୟାୟ ଆଲୋଚନା କରିଛନ୍ତି। ଅରୁଣାଚଳ ପ୍ରଦେଶର ୟାଙ୍ଗସେରେ ଭାରତୀୟ ଏବଂ ଚୀନ୍ ସୈନିକଙ୍କ ମଧ୍ୟରେ ସଂଘର୍ଷ ପରେ ଶେଷ ପର୍ଯ୍ୟାୟ ଆଲୋଚନା ହୋଇଥିଲା।
