ନୂଆଦିଲ୍ଲୀ: କେନ୍ଦ୍ର ଇଲେକ୍ଟ୍ରୋନିକ୍ସ ଏବଂ ସୂଚନା ପ୍ରଯୁକ୍ତି, ରେଳବାଇ ଏବଂ ସୂଚନା ଓ ପ୍ରସାରଣ ମନ୍ତ୍ରୀ ଶ୍ରୀ ଅଶ୍ୱିନୀ ବୈଷ୍ଣବ ଆଜି ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱରେ ଗତ ୧୦ ବର୍ଷ ମଧ୍ୟରେ ଇଲେକ୍ଟ୍ରୋନିକ୍ସ ଉତ୍ପାଦନ କ୍ଷେତ୍ରରେ ଭାରତ କରିଥିବା ଗୁରୁତ୍ୱପୂର୍ଣ୍ଣ ଅଗ୍ରଗତି ଉପରେ ଆଲୋକପାତ କରିଛନ୍ତି ।
ହରିୟାଣାର ମାନେସରଠାରେ ଥିବା ଭିଭିଡିଏନ୍ ଶିଳ୍ପ ପ୍ରତିଷ୍ଠାନରେ ଉଦବୋଧନ ଦେଇ ମନ୍ତ୍ରୀ ଆଲୋକପାତ କରିଥିଲେ ଯେ ନିକଟରେ କ୍ୟାବିନେଟ୍ ଦ୍ୱାରା ଅନୁମୋଦନ ପ୍ରାପ୍ତ ନୂତନ ଇଲେକ୍ଟ୍ରୋନିକ୍ସ ସାମଗ୍ରୀ ଉତ୍ପାଦନ ଯୋଜନା ବିଶ୍ୱଇଲେକ୍ଟ୍ରୋନିକ୍ସ ଯୋଗାଣ ଶୃଙ୍ଖଳାରେ ଭାରତର ସ୍ଥିତିକୁ ଆହୁରି ସୁଦୃଢ଼ କରିଛି। ଖୁବଶୀଘ୍ର ଏହି ଯୋଜନାର ଗାଇଡଲାଇନ ଜାରି କରାଯିବ ବୋଲି ମନ୍ତ୍ରୀ କହିଛନ୍ତି ।
ଭାରତର ଇଲେକ୍ଟ୍ରୋନିକ୍ସ ଉତ୍ପାଦନ କ୍ଷେତ୍ରରେ ଏକ ଐତିହାସିକ ବିକାଶ ପାଇଁ କେନ୍ଦ୍ର ମନ୍ତ୍ରୀ ଶ୍ରୀ ଅଶ୍ୱିନୀ ବୈଷ୍ଣବ ହରିୟାଣାର ମାନେସରଠାରେ କମ୍ପାନୀର ଗ୍ଲୋବାଲ ଇନୋଭେସନ ପାର୍କରେ ଭିଭିଡିଏନ ଟେକ୍ନୋଲୋଜିର ଅତ୍ୟାଧୁନିକ ସର୍ଫେସ୍ ମାଉଣ୍ଟ ଟେକ୍ନୋଲୋଜି (ଏସଏମଟି) ଲାଇନ୍ ଏବଂ ମେକାନିକାଲ ଇନୋଭେସନ ପାର୍କକୁ ଉଦଘାଟନ କରିଛନ୍ତି ।
କେନ୍ଦ୍ରମନ୍ତ୍ରୀ ଅଶ୍ୱିନୀ ବୈଷ୍ଣବ କହିଛନ୍ତି ଯେ ଗତ ୬ ବର୍ଷ ମଧ୍ୟରେ ଭାରତରେ ଇଲେକ୍ଟ୍ରୋନିକ୍ସ ଉତ୍ପାଦନ ୫ ଗୁଣ ବୃଦ୍ଧି ପାଇଛି ଏବଂ ମୋଟ ମୂଲ୍ୟ ୧୧ ଲକ୍ଷ କୋଟି ଟଙ୍କା ଅତିକ୍ରମ କରିଛି। ଗତ ଦଶନ୍ଧି ରେ ରପ୍ତାନି ରେ ୬ ଗୁଣ ବୃଦ୍ଧି ଘଟିଛି ଏବଂ ବର୍ତ୍ତମାନ ଏହା ୩.୨୫ ଲକ୍ଷ କୋଟି ଟଙ୍କାରେ ପହଞ୍ଚିଛି । ଏହା ‘ମେକ୍ ଇନ୍ ଇଣ୍ଡିଆ’ ଅଭିଯାନର ସବୁଠାରୁ ବଡ଼ ସଫଳତାର କାହାଣୀ ବୋଲି ବର୍ଣ୍ଣନା କରି ଶ୍ରୀ ବୈଷ୍ଣବ କହିଛନ୍ତି ଯେ ଏହି କ୍ଷେତ୍ରରେ ବର୍ତ୍ତମାନ ୨୫ ଲକ୍ଷରୁ ଅଧିକ ଲୋକ ନିଯୁକ୍ତି ପାଇଛନ୍ତି ଏବଂ ଆଗାମୀ ବର୍ଷ ଗୁଡ଼ିକରେ ଏହା ଦ୍ରୁତ ଅଭିବୃଦ୍ଧି ପାଇଁ ପ୍ରସ୍ତୁତ ଅଛି।
ଏହି କେନ୍ଦ୍ର ପରିଦର୍ଶନ ସମୟରେ ଶ୍ରୀ ବୈଷ୍ଣବ ଭାରତର ଡିଜାଇନ ଇକୋସିଷ୍ଟମର ବଢୁଥିବା ଶକ୍ତି ବିଷୟରେ ଉଲ୍ଲେଖ କରିଥିଲେ ଏବଂ ଦର୍ଶାଇଥିଲେ ଯେ ଏହି ସ୍ଥାନରେ ଜଟିଳ, ଏଆଇ-ଏମ୍ବେଡେଡ୍ ସିଷ୍ଟମ ଉପରେ କାର୍ଯ୍ୟ କରୁଥିବା ୫,୦୦୦ରୁ ଅଧିକ ଇଞ୍ଜିନିୟରଙ୍କ ଏକ ଦଳ ରହିଛି । ଭାରତରେ ଏବେ କେବଳ ଉତ୍ପାଦନ ନୁହେଁ ବରଂ ଅତ୍ୟାଧୁନିକ ଇଲେକ୍ଟ୍ରୋନିକ୍ସ ଉତ୍ପାଦ ଡିଜାଇନ୍ କରିବାର ପ୍ରତିଭା ରହିଛି ବୋଲି ମନ୍ତ୍ରୀ କହିଛନ୍ତି। କେନ୍ଦ୍ର ମନ୍ତ୍ରୀ ଏହି କାରଖାନାର ଇଞ୍ଜିନିୟର ଏବଂ କର୍ମଚାରୀଙ୍କ ସହ ଆଲୋଚନା କରିଥିଲେ ଏବଂ ଭାରତରେ ଇଲେକ୍ଟ୍ରୋନିକ୍ସ ଉତ୍ପାଦନ ଇକୋସିଷ୍ଟମକୁ ପ୍ରୋତ୍ସାହିତ କରିବା ଦିଗରେ କାର୍ଯ୍ୟ ଜାରି ରଖିବାକୁ ଅନୁରୋଧ କରିଥିଲେ ।
ସ୍ୱଦେଶୀ ଉତ୍ପାଦିତ ଉପକରଣର ଗୁରୁତ୍ୱ ଉପରେ ମଧ୍ୟ ସେ ଗୁରୁତ୍ୱାରୋପ କରି କହିଥିଲେ ଯେ ଭାରତ ବର୍ତ୍ତମାନ ଘରୋଇ ସ୍ତରରେ ଡିଜାଇନ ଉପକରଣ ଡିଜାଇନ୍ ଏବଂ ଉତ୍ପାଦନ କରୁଛି – ଯାହାକି ବୈଷୟିକ ଆତ୍ମନିର୍ଭରଶୀଳତା ହାସଲ କରିବା ଦିଗରେ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ । ନିକଟରେ ଭିଭିଡିଏନ୍ ଦ୍ୱାରା ୬,୦୦୦ ଏଆଇ ସର୍ଭର ନିୟୋଜିତ ହୋଇଥିବା ଦର୍ଶାଇ ଶ୍ରୀ ବୈଷ୍ଣବ ଏହାକୁ ଏକ ମାଇଲଖୁଣ୍ଟ ବୋଲି କହିଥିଲେ ଯାହା ଭାରତର ହାର୍ଡୱେର କ୍ଷମତାକୁ ପ୍ରଦର୍ଶନ କରେ ।
ବୌଦ୍ଧିକ ସମ୍ପତ୍ତି ଅଧିକାରର ସୁରକ୍ଷା, ଡିଜାଇନ୍ ଭିତ୍ତିକ ଉଦ୍ଭାବନ ଏବଂ ବିବିଧ ରେୟାର ଆର୍ଥ ଯୋଗାଣ ଶୃଙ୍ଖଳାର ସୁରକ୍ଷା ପାଇଁ ଏକ ବିଶ୍ୱସ୍ତ ଇଲେକ୍ଟ୍ରୋନିକ୍ସ ଉତ୍ପାଦନ ଭିତ୍ତିଭୂମି ନିର୍ମାଣ ପାଇଁ ଭାରତର ପ୍ରତିବଦ୍ଧତାକୁ ମନ୍ତ୍ରୀ ଦୋହରାଇଥିଲେ । ସେ ଏକ ତ୍ରିସ୍ତରୀୟ ଦକ୍ଷତା ରଣନୀତିର ବିବରଣୀ ମଧ୍ୟ ପ୍ରଦାନ କରିଥିଲେ, ଯେଉଁଥିରେ ମୌଳିକ ପ୍ରଶିକ୍ଷଣ, ଅନ-ସାଇଟ୍ ଉତ୍ପାଦ-ନିର୍ଦ୍ଦିଷ୍ଟ ତାଲିମ ଏବଂ ଶିଳ୍ପ-ସଂଯୋଜିତ ବିଶ୍ୱବିଦ୍ୟାଳୟ ପାଠ୍ୟକ୍ରମ ଅନ୍ତର୍ଭୁକ୍ତ – ଯାହାକି ଏହି କ୍ଷେତ୍ରରେ ଉଚ୍ଚ ପୁଞ୍ଜି-ବ୍ୟୟ ଦକ୍ଷତା ପାଇଁ ପ୍ରାସଙ୍ଗିକ ।
ନୂତନ ଇଲେକ୍ଟ୍ରୋନିକ୍ସ ଉପାଦାନ ଉତ୍ପାଦନ ଯୋଜନା
ଶ୍ରୀ ବୈଷ୍ଣବ ନିକଟରେ ଇଲେକ୍ଟ୍ରୋନିକ୍ସ କମ୍ପୋନେଣ୍ଟ ମାନୁଫାକ୍ଚରିଂ ସ୍କିମ୍ ର କ୍ୟାବିନେଟ୍ ଅନୁମୋଦନ ସମ୍ପର୍କରେ ଏକ ଗୁରୁତ୍ୱପୂର୍ଣ୍ଣ ଘୋଷଣା କରି କହିଛନ୍ତି ଯେ ଜାତୀୟ ସେମିକଣ୍ଡକ୍ଟର ମିଶନ ଅଧୀନରେ ସକ୍ରିୟ ଉପାଦାନଗୁଡ଼ିକ ଅନ୍ତର୍ଭୁକ୍ତ ହୋଇଥିବା ବେଳେ ଏହି ଯୋଜନା ମାଧ୍ୟମରେ ନିଷ୍କ୍ରିୟ ଉପାଦାନଗୁଡ଼ିକୁ ସମର୍ଥନ କରାଯିବ। ସେମାନେ ମିଳିତ ଭାବେ ଇଲେକ୍ଟ୍ରୋନିକ୍ସ କମ୍ପୋନେଣ୍ଟ୍ ଉତ୍ପାଦନ ଆବଶ୍ୟକତାକୁ ପୂରଣ କରିବେ ଏବଂ ଭାରତକୁ ପ୍ରକୃତରେ ଆତ୍ମନିର୍ଭରଶୀଳ କରିବେ ବୋଲି ସେ କହିଛନ୍ତି।
ଏହି ଯୋଜନା ଘରୋଇ ଉତ୍ପାଦନକୁ ଯଥେଷ୍ଟ ବୃଦ୍ଧି କରିବ, ନିଯୁକ୍ତି ସୃଷ୍ଟି କରିବ ଏବଂ ଆମଦାନୀ ନିର୍ଭରଶୀଳତା ହ୍ରାସ କରିବ ବୋଲି ଆଶା କରାଯାଉଛି ବୋଲି କେନ୍ଦ୍ରମନ୍ତ୍ରୀ କହିଛନ୍ତି। ଡିଜାଇନ୍, ଉତ୍ପାଦନ, ଦକ୍ଷତା ଏବଂ ବିଶ୍ୱସ୍ତ ଉଦ୍ଭାବନ କ୍ଷେତ୍ରରେ ଭାରତର ସମନ୍ୱିତ ଆଭିମୁଖ୍ୟ ଦେଶକୁ ବିଶ୍ୱ ଇଲେକ୍ଟ୍ରୋନିକ୍ସ କ୍ଷେତ୍ରରେ ଏକ ଅଗ୍ରଣୀ ସ୍ଥାନକୁ ନେଇଯିବ ବୋଲି ସେ ବିଶ୍ୱାସ ବ୍ୟକ୍ତ କରିଥିଲେ।
ସୁବିଧା ଗୁଡିକ ବିଷୟରେ
ନୂତନ ଭାବେ ଉଦଘାଟିତ ହୋଇଥିବା ଏସଏମଟି ଲାଇନ୍ ହେଉଛି ଭିଭିଡିଏନର ଏପର୍ଯ୍ୟନ୍ତ ସର୍ବବୃହତ ଏବଂ ଘଣ୍ଟାପ୍ରତି ୨୫୦,୦୦୦ ଯନ୍ତ୍ରାଂଶର ଶିଳ୍ପ-ଅଗ୍ରଣୀ ବେଗ ସହିତ ୮୫୦ ମିମି x ୫୬୦ ମିଲିମିଟର ପର୍ଯ୍ୟନ୍ତ ପିସିବି ଆକାରକୁ ସମର୍ଥନ କରେ। ଏହା ଦ୍ୱାରା ଏଆଇ ସର୍ଭର, ନେଟୱାର୍କିଂ ଡିଭାଇସ୍ ଏବଂ ମଦରବୋର୍ଡ ଭଳି ହାଇଟେକ୍ ଉତ୍ପାଦର ବ୍ୟାପକ ଉତ୍ପାଦନ ହୋଇପାରିବ।
ସେହିପରି ୧,୫୦,୦୦୦ ବର୍ଗଫୁଟ ପରିବ୍ୟାପ୍ତ ମେକାନିକାଲ ଇନୋଭେସନ ପାର୍କରେ ଟୁଲ ମେକିଂ, ସିଏନସି, ଇଡିଏମ, ଇଞ୍ଜେକସନ ମୋଲ୍ଡିଂ ଏବଂ ସମ୍ପୂର୍ଣ୍ଣ ସମନ୍ୱିତ ଡିଜାଇନ-ଟୁ-ପ୍ରଡକ୍ସନ ଇକୋସିଷ୍ଟମ ସୃଷ୍ଟି କରିବାର ସୁବିଧା ରହିବ । ଏହି ସୁବିଧା ଦ୍ୱାରା ୩,୦୦୦ରୁ ଅଧିକ ନୂତନ କୁଶଳୀ ନିଯୁକ୍ତି ସୃଷ୍ଟି ହେବ ବୋଲି ଆଶା କରାଯାଉଛି, ଯାହା ନିଯୁକ୍ତି ସୃଷ୍ଟି ଏବଂ ଉଚ୍ଚ ଜ୍ଞାନକୌଶଳ ଦକ୍ଷତା ପାଇଁ ସରକାରଙ୍କ ଦୃଷ୍ଟିକୋଣକୁ ଆଗକୁ ବଢ଼ାଇବ ।
ଭିଭିଡିଏନ୍ ହେଉଛି ଏକ ଭାରତୀୟ କମ୍ପାନୀ ଯାହା ସମ୍ପୂର୍ଣ୍ଣ ବ୍ୟାକୱାର୍ଡ଼ ଇଣ୍ଟିଗ୍ରେସନ ସହିତ ଡିଜାଇନ୍ ନେତୃତ୍ୱାଧୀନ ଉତ୍ପାଦନ ଉପରେ ଧ୍ୟାନ ଦେଉଛି । ୧୧ଟି ଗବେଷଣା ଓ ବିକାଶ କେନ୍ଦ୍ର ଏବଂ ୫,୦୦୦ ରୁ ଅଧିକ ଇଞ୍ଜିନିୟରଙ୍କ ଏକ ଦଳ ସହିତ, ଭିଭିଡିଏନ୍ ଏଆଇ ସର୍ଭର, ଇଭି ଉତ୍ପାଦ, କ୍ୟାମେରା, ୱାଇ-ଫାଇ ୭ ଆକସେସ ପଏଣ୍ଟ ଏବଂ ଆହୁରି ଅନେକ ପରବର୍ତ୍ତୀ ପିଢ଼ିର ସମାଧାନ ବିକଶିତ କରିବାରେ ଅଗ୍ରଣୀ ଅଟେ । ଏହି ଅବସରରେ ମନ୍ତ୍ରୀ ଭିଭିଡିଏନର ଅତ୍ୟାଧୁନିକ ଗବେଷଣା ଓ ବିକାଶ ଲ୍ୟାବ୍ ସମେତ ସର୍ଭର ଆର୍ ଆଣ୍ଡ୍ ଡି ଲ୍ୟାବ୍, ୫ଜି ଆର୍ ଆଣ୍ଡ୍ ଡି ଲ୍ୟାବ୍ ଏବଂ ଭିଡିଓ ଇମେଜ୍ ଟ୍ୟୁନିଂ ଲ୍ୟାବ୍ ସହ ସର୍ଭର ଓ କ୍ୟାମେରା ଉତ୍ପାଦନ ଲାଇନ୍ ପରିଦର୍ଶନ କରିଥିଲେ।
ଉଦଘାଟନୀ ଉତ୍ସବ ପ୍ରଗତିଶୀଳ ସରକାରୀ ନୀତି ଏବଂ ଗତିଶୀଳ ଘରୋଇ କ୍ଷେତ୍ର ପଦକ୍ଷେପ ମଧ୍ୟରେ ସମନ୍ୱୟର ପ୍ରମାଣ ଭାବରେ କାର୍ଯ୍ୟ କରେ । ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱରେ ଭାରତ ଉନ୍ନତ ବ୍ୟବସାୟ, ବିଶ୍ୱସନୀୟ ବିଜୁଳି ଯୋଗାଣ ବିଶ୍ୱସ୍ତରୀୟ ଭିତ୍ତିଭୂମି ଏବଂ ଦୃଢ଼ ସଂସ୍ଥାଗତ ସହାୟତା ଦ୍ୱାରା ଏକ ଅନୁକୂଳ ପରିବେଶ ସୃଷ୍ଟି କରିଛି ।
