ନୂଆଦିଲ୍ଲୀ: ପାକିସ୍ତାନ ଏକ କଡ଼ା ପ୍ରତିଯୋଗିତାରେ ନେଦରଲ୍ୟାଣ୍ଡକୁ ୩ ୱିକେଟରେ ପରାସ୍ତ କରିଛି। ଫହୀମ ଅସରଫ୍ ଙ୍କ ଯୋଗୁଁ ପରାଜୟରୁ ପାକିସ୍ତାନ ଅଳ୍ପକେ ରକ୍ଷା ପାଇଛି। ନଚେତ୍ ୨୦୨୬ ଟି-୨୦ ବିଶ୍ୱକପରେ ପାକିସ୍ତାନ ଏକ ବଡ଼ ବିପର୍ଯ୍ୟୟର ସମ୍ମୁଖୀନ ହୋଇଥାନ୍ତା। କଲମ୍ବୋରେ ଖେଳାଯାଇଥିବା ମ୍ୟାଚ୍ରେ, ନେଦରଲ୍ୟାଣ୍ଡ ପ୍ରଥମେ ବ୍ୟାଟିଂ କରି ୧୪୭ ରନ୍ରେ ଅଲଆଉଟ୍ ହୋଇଯାଇଥିଲା। ଜବାବରେ ପାକିସ୍ତାନ ଶେଷ ଓଭରରେ ମ୍ୟାଚ୍ ଜିତିଥିଲା।
ନେଦରଲ୍ୟାଣ୍ଡ ପାଇଁ କୌଣସି ବ୍ୟାଟ୍ସମ୍ୟାନ୍ ବଡ଼ ଇନିଂସ୍ କରିପାରି ନଥିଲେ, କିନ୍ତୁ ଅଧିନାୟକ ସ୍କଟ୍ ଏଡୱାର୍ଡସ୍ ଏବଂ ବାସ ଡି ଲିଡେ ଯଥାକ୍ରମେ ୩୭ ଏବଂ ୩୦ ରନ୍ ଯୋଗଦାନ ଦେଇଥିଲେ। ମାଇକେଲ୍ ଲେଭିଟ୍ଙ୍କ ୨୪ ଏବଂ କଲିନ୍ ଆକରମ୍ୟାନ୍ ଙ୍କ ୨୦ ରନ୍ ନେଦରଲ୍ୟାଣ୍ଡକୁ ୧୪୭ ରନ୍ରେ ପହଞ୍ଚାଇବାରେ ସାହାଯ୍ୟ କରିଥିଲା।
୧୪୮ ରନ୍ର ଲକ୍ଷ୍ୟ ପିଛା କରି ପାକିସ୍ତାନର ଓପନର୍ ସାହିବଜାଦା ଫରହାନ୍ ୪୭ ରନ୍ କରିଥିଲେ। ସାମ ଆୟୁବ ଦ୍ରୁତ ୧୩ ରନ୍ କରି ଦଳକୁ ଏକ ମଜବୁତ ଆରମ୍ଭ ଦେଇଥିଲେ। ଅଧିନାୟକ ସଲମାନ ଆଗା ଏବଂ ବାବର ଆଜାମ ଯଥାକ୍ରମେ ୧୨ ଏବଂ ୧୫ ରନ୍ କରି ଆଉଟ ହୋଇଥିଲେ।
ଏକ ସମୟରେ ପାକିସ୍ତାନ ୨ ୱିକେଟ୍ ହରାଇ ୯୮ ରନ୍ କରିଥିଲା ଏବଂ ୫୮ ବଲ୍ ରେ ମାତ୍ର ୫୦ ରନ୍ ଆବଶ୍ୟକ କରୁଥିଲା। କିନ୍ତୁ ତା’ପରେ ୱିକେଟ୍ ର କ୍ରମାଗତ ପତନ ଘଟିଥିଲା, ବିଶେଷକରି ପଲ୍ ଭାନ୍ ମିକେରେନ୍ ପାକିସ୍ତାନୀ ବ୍ୟାଟିଂକୁ ଧ୍ୱଂସ କରିଦେଲେ। ପାକିସ୍ତାନର ଅଧା ଦଳ ୧୦୦ ରନ୍ ରେ ପହଞ୍ଚିବା ବେଳକୁ ପ୍ୟାଭିଲିୟନ୍ ଫେରିଆସିଥିଲା।
ସ୍କୋର ୧୧୪ ରନ୍ ରେ ପହଞ୍ଚିବା ବେଳକୁ ଉଭୟ ଅଭିଜ୍ଞ ଅଲରାଉଣ୍ଡର, ମହମ୍ମଦ ନୱାଜ୍ ଏବଂ ଶାଦାବ ଖାନ ମଧ୍ୟ ସେମାନଙ୍କର ୱିକେଟ୍ ହରାଇଥିଲେ। ପାକିସ୍ତାନ ୧୧୪ ରନ୍ ରେ ସାତ ଜଣ ବ୍ୟାଟ୍ସମ୍ୟାନଙ୍କୁ ହରାଇଥିଲା, ଫହିମ୍ ଅଶ୍ରଫ୍ ଙ୍କ ୧୧ ବଲ୍ ରୁ ୨୯ ରନ୍ ଯୋଗୁଁ ପାକିସ୍ତାନ ଏକ ବଡ଼ ବିପର୍ଯ୍ୟୟରୁ ରକ୍ଷା ପାଇଥିଲା।