ତାଞ୍ଜାନିଆ : ଭାଗ୍ୟ ଯଦି ତୁମ ସାଥ୍ରେ ରହିଛି ତେବେ ତୁମେ ମାଟି ଧରିଲେ ବି ତାହା ସୁନା ହୋଇଯିବ । କିନ୍ତୁ ତାଞ୍ଜାନିଆଠାରେ ଜଣେ ଶ୍ରମିକଙ୍କ ଭାଗ୍ୟ ଏମିତି ବଦଳିଛି ଯେ, ସେ ମାଟି ଖୋଳୁ ଖୋଳୁ ସୁନା ନୁହେଁ, ସୁନାଠାରୁ ବହୁ ମୂଲ୍ୟବାନ ରତ୍ନପଥର ପାଇଛନ୍ତି । ତେବେ ଏହି ଶ୍ରମିକ ଜଣକ ପ୍ରଥମ ଥର ପାଇଁ ଏହି ଏଭଳି ଦୁର୍ଲଭ ରତ୍ନପଥର ପାଇନାହାନ୍ତି । ଏହା ପୂର୍ବରୁ ଦୁଇଥର ମଧ୍ୟ ସେ ଏପରି ରତ୍ନପଥର ପାଇଥିଲେ । ତୃତୀୟ ଥର ପାଇଁ ତାଞ୍ଜାନିଆର ଖଣିରେ କାମ କରୁଥିବା ଶ୍ରମିକ ସାନିନ୍ୟୁୟ ଲେଜର୍ ରତ୍ନ ପଥର ପାଇ କୋଟିପତି ପାଲଟିଛନ୍ତି ।
ସାନିନ୍ୟୁୟ ଙ୍କୁ ପୂର୍ବରୁ ମିଳିଥିବା 2ଟି ରତ୍ନପଥର ମଧ୍ୟରୁ ଗୋଟିକର ଓଜନ 9.27 କିଲୋ ଥିଲା ଏବଂ ଅନ୍ୟଟିର ଓଜନ 51.03 କିଲୋ । ଏହି 2ଟି ପଥର ବଦଳରେ ସେଠାକାର ସରକାର ତାଙ୍କୁ 7.74 ବିଲିୟମ୍ ଅର୍ଥାତ୍ ପ୍ରାୟ 25 କୋଟି 36 ଲକ୍ଷ ଟଙ୍କାର ଚେକ୍ ଦେଇଥିଲେ । 2ଟି ରତ୍ନ ପଥର ପାଇବାର 2 ମାସ ନ ବିତୁଣୁ ତାଙ୍କୁ ତୃତୀୟ ରତ୍ନ ପଥର ପ୍ରାପ୍ତ ହୋଇଛି । ଏହି ରତ୍ନ ପଥରର ଓଜନ 6.3 କିଲୋଗ୍ରାମ ରହିଛି । ପୂର୍ବରୁ ଦୁଇ ରତ୍ନ ପଥର ତାଞ୍ଜାନିଆର ବ୍ୟାଙ୍କରେ ରଖାଯାଇଛି । ସୋମବାର ଦିନ ଏକ ଖାସ୍ ଉତ୍ସବରେ ଏହି ପଥରଟି 14.7 କୋଟିରେ ବିକ୍ରି ହୋଇଛି ।
ସାନିନ୍ୟୁୟଙ୍କ ଚାରୋଟି ପତ୍ନୀ ଓ ମୋଟ 30ଟି ସନ୍ତାନ ରହିଛନ୍ତି । ଏହି ରତ୍ନ ପଥର ବିକ୍ରି କରି ଯେଉଁ ପଇସା ଅର୍ଜନ କରିଛନ୍ତି ସେଥିରେ କିଛି ଟଙ୍କାରେ ସେ ସ୍କୁଲ ଓ ସପିଂ ମଲ୍ ଖୋଲିବେ ବୋଲି ଇଚ୍ଛା ରଖିଛନ୍ତି । ତେବେ ଏତେ ଟଙ୍କାର ମାଲିକ ହେବା ପରେ ସାନିନ୍ୟୁୟ ପୂର୍ବ ପରି ନିଜ ଚଳଣି ରଖିଛନ୍ତି । ପର୍ବରୁ ଯେପରି 2000 ଗାଈଙ୍କ ଦେଖାରେଖା କରୁଥିଲେ । ଏବେବି ସେ ଏହି କାର୍ଯ୍ୟ ଜାରି ରଖିଛନ୍ତି ।
ତେବେ ଏହି ରତ୍ନ ପଥର ଦୁଲର୍ଭ ରତ୍ନ ମଧ୍ୟରୁ ଅନ୍ୟତମ । ଏହା ପୂର୍ବ ଆଫ୍ରିକାର ରାଷ୍ଟ୍ରରେ ଉତ୍ତର ଅଂଶରେ ଛୋଟ ଛୋଟ ଅଞ୍ଚଳରୁ ମିଳିଥାଏ । ଭୂବୈଜ୍ଞାନିକଙ୍କ ଅନୁସାରେ ଏହା ଆଗାମୀ ୨୦ ବର୍ଷରେ ଗାଏବ ହୋଇପାରେ । ତେବେ ଭାଗ୍ୟ କ୍ଷଣିକରେ ମଣିଷର ଅବସ୍ଥା ବଦଳାଇ ଦେଇଥାଏ, ତାହା ସାନିନ୍ୟୁୟଙ୍କ କ୍ଷେତ୍ରରୁ ପ୍ରମାଣିତ ହୋଇଛି । (ଏଜେନ୍ସି)