ଇଟାଲୀ : ଇଟାଲୀର ଏହି ଗ୍ରାମରେ ମାତ୍ର 90 ଟଙ୍କାରେ ଆପଣ ଘର ପାଇପାରିବେ। ଇଟାଲୀର ମୋଲିଝୋ କ୍ଷେତ୍ରର ମଧ୍ୟକାଳୀନ ଗ୍ରାମ କାଷ୍ଟ୍ରୋପିନାନୋର ଜନସଂଖ୍ୟା 900 ଅଟେ । ଏଠାରେ ରହିଥିବା ଖାଲି ଘର ପାଇଁ ପ୍ରଶାସନ ଏକ ଉତ୍ତମ ଯୋଜନା ବାହାର କରିଛନ୍ତି । ପ୍ରଶାସନ ଏହି ଗ୍ରାମରେ ଖାଲିଥିବା ଘରଗୁଡିକୁ ଏକ ୟୁରୋ ବା ମାତ୍ର 90 ଟଙ୍କା ରେ ବିକ୍ରି କରିବା ପାଇଁ ନିଷ୍ପତ୍ତି ନେଇଛି । ତେବେ ଏହି ଘରଗୁଡିକୁ ଆପଣ କିଣିସାରିବା ପରେ ଏହାର ମରାମତି କରି ରହିପାରିବେ ।
କାଷ୍ଟ୍ରୋପିନାନୋ ହେଉଛି ସବୁଠୁ ଶସ୍ତାରେ ଘର ଦେଉଥିବା ପ୍ରଥମ ଗ୍ରାମ । 1930 ମସିହାରେ ଏଠାରେ 2500 ଲୋକ ରହୁଥିଲେ। ଦ୍ବିତୀୟ ବିଶ୍ବଯୁଦ୍ଧ ପରେ ଏଠାରୁ କିଛି ଲୋକେ ବାହାରକୁ ଚାଲିଯାଇଥିଲେ । 1960 ପରେ ଅଧିକାଂଶ ଯୁବକ ରୋଜଗାର ଓ ଅନ୍ୟ କାର୍ଯ୍ୟ ପାଇଁ ଏହି ଗ୍ରାମକୁ ଛାଡି ଦେଇଥିଲେ । ଏହିଗ୍ରାମରେ ଅଧିକାଂଶ ଲୋକଙ୍କ ବୟସ ସୀମା 70 ବର୍ଷ । ଏହି ଗ୍ରାମରେ 60 ପ୍ରତିଶତ 70 ବର୍ଷର ଉଦ୍ଧ୍ବ ବୟସ୍କ ବାସ କରନ୍ତି । ପ୍ରଶାସନ ଏହି ଗ୍ରାମରେ ପୁଣି ଥରେ ଜନବସତି ସ୍ଥାପନ ପାଇଁ ଉଦ୍ୟମ ଚଳାଇଛି । ଏଥିପାଇଁ ଏଠାରେ ଶସ୍ତାରେ ଲୋକଙ୍କୁ ଘର ଯୋଗାଉଛି । ଏହି ଗ୍ରାମ ନିକଟରେ ସମୁଦ୍ରତଟ ରହିଛି । ତେବେ ପ୍ରଥମ ଚରଣରେ ଏହି ଅଞ୍ଚଳରେ 100 ଟି ଘର ବିକ୍ରି ପାଇଁ ଯୋଜନା ରହିଛି । ନିୟମାନୁସାରେ ଘର କିଣିବାର ତିନି ବର୍ଷ ଭିତରେ ଘରକୁ ମରାମତି କରିବାକୁ ପଡିବ । ଏଥିପାଇଁ ଆପଣଙ୍କୁ 2000 ୟୁରୋ ଅର୍ଥାତ୍ 1 ଲକ୍ଷ 78 ହଜାର 930ଟଙ୍କା ଗ୍ୟାରେଣ୍ଟି ଆକାରରେ ଜମା କରିବାକୁ ପଡିବ । ଘର ମରାମତି ହେବା ପରେ ଏହି ଅର୍ଥକୁ ଫେରସ୍ତ ଦିଆଯିବା ନେଇ ସୂଚନା ରହିଛି । ଏହି ଅଞ୍ଚଳରେ ଜନବସତି ସୃଷ୍ଟି କରିବା ଉଦ୍ଦେଶ୍ୟରେ ଶସ୍ତାରେ ଘର ଯୋଗାଇଦେବାକୁ ପ୍ରଶାସନ ଯୋଜନା ପ୍ରସ୍ତୁତ କରିଛି ।
