ଭୁବନେଶ୍ବର, ନାଟ୍ୟକାର, ଅଭିନେତା ବଟରାଜ ଦେବ ଗୋସ୍ବାମୀଙ୍କ ଆଜି କୋଭିଡରେ ପରଲୋକ ହୋଇଯାଇଛି। କୋଲକତାରେ ଥିବା ତାଙ୍କ ଝିଅ ପାଖକୁ ଯାଇଥିବା ବେଳେ କରୋନା ଆକ୍ରାନ୍ତ ହୋଇପଡିଲେ। ଅବସ୍ଥା ଗୁରୁତର ହେବାରୁ ତାଙ୍କୁ କୋଲକାତାର କୋଭିଡ ହସପିଟାଲରେ ଭର୍ତ୍ତି କରାଯାଇଥିଲା। ହେଲେ ଡାକ୍ତରଙ୍କ ସବୁ ଚେଷ୍ଠା ସତ୍ବେ ସେ ଆଜି ସକାଳେ ମୃତ୍ୟୁବରଣ କରିଛନ୍ତି। ତାଙ୍କୁ 72 ବର୍ଷ ବୟସ ହୋଇଥିଲା। ତାଙ୍କ ଧର୍ମପତ୍ନୀ ମଧ୍ୟ କରୋନା ଆକ୍ରାନ୍ତରେ ଗୁରୁତର ହୋଇ ହସପିଟାଲରେ ଚିକିତ୍ସିତ ହେଇଛନ୍ତି।
ସେ କରୋନାରେ ଆକ୍ରାନ୍ତ ହେବା ପରେ ଅନ୍ତର୍ଜାତୀୟ ବାଲୁକା ଶିଳ୍ପୀ ସୁଦର୍ଶନ ପଟ୍ଟନାୟକ ତାଙ୍କୁ ସହାୟତାର ହାତ ବଢାଇଥିଲେ। ତାଙ୍କ ପାଇଁ ଆବଶ୍ୟକ ପଡୁଥିବା ଏକ ଇଂଜେକ୍ସନ ନ ମିଳିବାରୁ ସୁଦର୍ଶନ ତାଙ୍କ ଟୁଇଟରେ ସାହାର୍ଯ୍ୟ ପାଇଁ ଲେଖିଥିଲେ। ଏହା ଜାଣିବା ପରେ ବରିଷ୍ଠ ଆଇପିଏସ ଅଫିସର ଅମିତାଭ ଠାକୁର ତାହା ଯୋଗାଡ କରି ସାହାର୍ଯ୍ୟ କରିଥିଲେ। ହେଲେ ଏତେସବୁ ଚେଷ୍ଠା ସତ୍ବେ ତାଙ୍କର ବଞ୍ଚିବା ସମ୍ଭବ ନ ଥିଲା।
ବଟରାଜ ହେଉଛନ୍ତି ପ୍ରଥମ ଓଡିଆ ଚଳଚିତ୍ର ନିର୍ମାତା ତଥା ନିର୍ଦ୍ଦେଶକ ମୋହନସୁନ୍ଦର ଦେବ ଗୋସ୍ବମୀଙ୍କ ନାତି। ସେ ଜଣେ ଓଡିଆ ନାଟ୍ୟକାର ଭାବେ ବେଶ୍ ପରିଚିତ। ତାଙ୍କ ଦ୍ବାରା ଲିଖିତ ନାଟକ ବେଶ ପ୍ରଶଂସନୀୟ ହୋଇପାରିଛି। ବଟରାଜ ଓଡିଶୀ ଗୁରୁ କେଳୁଚରଣ ମହାପାତ୍ରଙ୍କ ଅତି ନିକଟତର ଥିଲେ। ସେ କେତେକ ପୁରୁଣା ଚଳଚିତ୍ରରେ ମଧ୍ୟ ଅଭିନୟ କରିଛନ୍ତି।
1936 ମସିହାରେ ମୋହନସୁନ୍ଦରଙ୍କ ପ୍ରଯୋଜନା ଏବଂ ନିର୍ଦ୍ଦେଶନାରେ ନିର୍ମିତ ହୋଇଥିଲା ପ୍ରଥମ ଓଡିଆ ଚଳଚିତ୍ର ସୀତା ବିବାହ। ତେବେ ସେତେବେଳେ ଏହି ଚଳଚିତ୍ରର ସଂରକ୍ଷଣ କରିବାର ବ୍ୟବସ୍ଥା ନ ଥିବାରୁ ତାହା ବହୁଦିନ ଧରି ରଖାଯାଇ ପାରି ନ ଥିଲା। ବର୍ତ୍ତମାନ ଏହାର କୌଣସି କ୍ଲିପସ ଉପଲବ୍ଧ ନାହିଁ। ତେବେ ଏହାର ପ୍ରମାଣ ସ୍ବରୂପ ମହୋନସୁନ୍ଦରଙ୍କ ପୁରୀ ବାସଭବନରେ ଚଳଚିତ୍ରର ହାତଲେଖା ସ୍କ୍ରିପଟ ଥିଲା। ତାହାକୁ ସଂରକ୍ଷଣ କରିବା ପାଇଁ ସିନେ କ୍ରିଟିକ ଆସୋସସିଏସନର ସଂପାଦକ ଦିଲ୍ଲୀପ ହାଲି ତାଙ୍କୁ ଅନୁରୋଧ କରିଥିଲେ।
2017 ମସିହାରେ ବଟରାଜ ଏହି ଚଳଚିତ୍ରର ମାନୁସ୍କ୍ରିପଟ ସିନେ କ୍ରିଟିକ ଆସୋସିଏସନକୁ ପ୍ରଦାନ କରିଥିଲେ। ସୀତାବିବାହ ଚଳଚିତ୍ରର କୌଣସି ଦୃଶ୍ୟ ମିଳୁ ନ ଥିବା ବେଳେ କେବେଳ ଏହି ସ୍କ୍ରିପଟ ବର୍ତ୍ତମାନ ପ୍ରମାଣ ସ୍ବରୂପ ରହିଛି। ଏଥିପାଇଁ ସେତେବେଳେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ତାଙ୍କୁ ସମ୍ବର୍ଦ୍ଧିତ କରିଥିଲେ। ତାଙ୍କ ପରଲୋକରେ ଓଡିଆ ଚଳଚିତ୍ର ତଥା ନାଟ୍ୟ ଜଗତରେ ଏକ ଶୋକର ଛାୟା ଖେଳିଯାଇଛି।
