ଭୁବନେଶ୍ଵର: ବହୁ ପ୍ରତିକ୍ଷିତ ଓଡ଼ିଶାର କଳା, ସଂସ୍କୃତି ଓ ପରମ୍ପରାକୁ ନେଇ ଲୋକପ୍ରିୟ ରିଏଲିଟି ସୋ ‘ରଜ କୁଇନ୍’ ଏପ୍ରିଲ୍ ୨୨ ରୁ ପ୍ରତ୍ୟେକ ଶନିବାର ଓ ରବିବାର ରାତି ୯.୩୦ମିନିଟ୍ ରେ ରାଜ୍ୟର ଏକ ନମ୍ବର ମନୋରଂଜନ ଚ୍ୟାନେଲ ଜୀ-ସାର୍ଥକ ରେ ପ୍ରସାରିତ ହେବ। ୧୧ ବର୍ଷରେ ପଦାର୍ପଣ କରୁଥିବା ଜୀ-ସାର୍ଥକର ଏହି ରିଏଲିଟି ଶୋ ଆଗରୁ ବହୁ ବିଜେତା ଓ ପ୍ରତିଯୋଗୀଙ୍କ ଭବିଷ୍ୟତ ଗଢିବାରେ ଏକ ପ୍ରମୁଖ ମାଧ୍ୟମ ହୋଇପାରିଛି।
ବିଜେତାମାନେ ଚଳଚ୍ଚିତ୍ର ଓ ଧାରାବାହିକରେ ଅଭିନୟ ସୁଯୋଗ ପାଇବା ସହ ନିଜର ଭବିଷ୍ୟତକୁ ସ୍ୱର୍ଣ୍ଣିମ କରିପାରିଛନ୍ତି। ଏଥର ମଧ୍ୟ ବହୁତ ବଡ଼ ଆକାରରେ ଟିଭି ପରଦାରେ “ରଜ କୁଇନ୍” ରିଏଲିଟି ସୋ ଆସୁଛି। ଦର୍ଶକଙ୍କୁ ଭରପୁର ମନୋରଂଜନ ଦେଇ ଆସୁଥିବା ରଜ କୁଇନ୍ ଏଥର ଦର୍ଶକ ଓ ପ୍ରତିଯୋଗୀମାନଙ୍କ ପାଇଁ ଆଣିଛି କିଛି ଖାସ ଉପହାର ଓ ସ୍କଲାରସିପ୍।
ଅନେକଙ୍କ ଭବିଷ୍ୟତ ତିଆରି କରିଥିବା ଏହି ପ୍ଲାଟଫର୍ମ ଏଥର ଆଣିଛି କିଛି ନୂଆ ଚିନ୍ତାଧାରା। ଏଥର ରହିଛି ଏକ ବିଶେଷ ସ୍କଲାରସିପ୍ ସେମାନଙ୍କ ପାଇଁ ଯେଉଁ ମାନେ ଯେକୌଣସି ବିଭାଗରେ ପାରଦର୍ଶିତା ହାସଲ କରି ସେହି ବିଭାଗରେ ଆଗକୁ ବଢ଼ିବାକୁ ଚାହୁଁଛନ୍ତି ଓ ନିଜର ଭବିଷ୍ୟତ ଗଢିବାକୁ ଚାହୁଁଛନ୍ତି, ସେମାନେ ଏହି ସ୍କଲାରସିପ୍ର ହକଦାର୍ ହୋଇପାରିବେ।
ଏଭଳି ସୁଯୋଗ ଓ ସହଯୋଗ କେବଳ ଜୀ-ସାର୍ଥକ ର ରଜ କୁଇନ୍ ପ୍ରତିଯୋଗୀମାନଙ୍କୁ ମିଳିପାରିବ ଓ ଏହି ପ୍ରୋଗ୍ରାମ ମାଧ୍ୟମରେ ପ୍ରତିଯୋଗୀମାନଙ୍କୁ ନିଜର ସ୍ବପ୍ନ ପୁରଣ କରିବା ସହ ନିଜର ଡେଣା ମେଲାଇ ଖୋଲା ଆକାଶରେ ଉଡିଯିବାକୁ ପ୍ରେରିତ କରିବ।
ଏଥର ଜଜ୍ ହୋଇ ଆସୁଛନ୍ତି ଓଡିଆ ସିନେମା ଜଗତର ତିନି ଲୋକପ୍ରିୟ କଳାକାର ସିଦ୍ଧାନ୍ତ ମହାପାତ୍ର, ଏଲିନା ସାମନ୍ତରାୟ ଓ ଶ୍ରୀତମ ଦାସ। ଏହା ଛଡା ଆହୁରି ଚାରି ଜଣ ମେଣ୍ଟର ମଧ୍ୟ ରହିବେ ଯେଉଁ ମାନେ ନିଜର ଗୋଟେ ଗୋଟେ ଟିମ୍ ବାଛିବେ ଓ ଏହି ରିଏଲିଟି ଶୋ ଜିତିବାରେ ନିଜ ଟିମ୍ ର ମାର୍ଗଦର୍ଶକ ହେବେ। ଏହି ମେଣ୍ଟରସ୍ ମାନଙ୍କ ମଧ୍ୟରେ ଅଛନ୍ତି ମେଗା ଧାରାବାହିକ ‘ଖୁସିର ଛୁଙ୍କ’ ର ଖୁସି , ‘ମୁଁ ବି ବିଜୟିନୀ’ ର ସ୍ତୁତି , ‘ଝିଲ୍ଲୀ’ର ଝିଲ୍ଲୀ ଓ ‘ସାଥିରେ’ ର ଧାରା। ଯେଉଁ ମାନେ ଅଡିସନ ରାଉଣ୍ଡ ଜିତି ଆଗକୁ ଆସିବେ ସେମାନେ ଏହି ମେଣ୍ଟରସ୍ ମାନଙ୍କ ତତ୍ତ୍ବାବଧାନରେ ନିଜର ସ୍ବପ୍ନ ପୁରଣ ଭବିଷ୍ୟତ ତିଆରି କରିବାର ସୁଯୋଗ ପାଇବେ।
‘ରଜ କୁଇନ’ ପାଇଁ ଅଡିସନ୍ ଓଡ଼ିଶାର କିଛି ପ୍ରମୁଖ ସହରର ଯଥା ଭଦ୍ରକ, କେନ୍ଦୁଝର, ଭୁବନେଶ୍ଵର, ଯାଜପୁର, ବାଲେଶ୍ୱର, କଟକ, ଅନୁଗୁଳ ଓ ରାଉରକେଲାରେ ହୋଇଥିଲା ଯେଉଁଠାରୁ ବଛା ବଛା ପ୍ରତିଯୋଗୀ ଏଥର ଭାଗ ନେଉଛନ୍ତି। କାର୍ଯ୍ୟକ୍ରମଟି ନିଶ୍ଚିତ ଭାବରେ ଲୋକାଦୃତ ହେବ ବୋଲି ଜୀ-ସାର୍ଥକର ଚିଫ କ୍ଲଷ୍ଟର ହେଡ୍ ସମ୍ରାଟ ଘୋଷ ଏବଂ ଚ୍ୟାନେଲ ହେଡ୍ ପ୍ରତୀକ ସିଲ ପ୍ରକାଶ କରିଛନ୍ତି।