ମୁମ୍ବାଇ : ଅଭିନେତ୍ରୀ ରିୟା ଚକ୍ରବର୍ତ୍ତୀଙ୍କ ବିରୋଧରେ ମାମଲା ରୁଜୁ ହୋଇଛି । ବଲିଉଡ୍ ଅଭିନେତା ସୁଶାନ୍ତ ସିଂହ ରାଜପୁତଙ୍କ ପିତା ପାଟଣା ନଗର ଥାନାରେ ରିୟାଙ୍କ ବିରୋଧରେ ମାମଲା ଦାଏର କରିଛନ୍ତି । ସୁଶାଙ୍କ ପିତା ରିୟାଙ୍କ ବିରୋଧରେ ମମାଲା ରୁଜୁ କରିବା ପରେ ପାଟଣାରୁ 4ଟି ପୁଲିସ ଟିମ ମୁମ୍ବାଇରେ ପହଞ୍ଚିଛନ୍ତି। ଏହି ଟିମ୍ ମୁମ୍ବାଇ ପୁଲିସ ସହିତ ଆଲୋଚନା କରି ଡାଏରି ସହିତ ଅନ୍ୟ ଜରୁରୀ କାଗଜ ହାତକୁ ନେବେ। ପାଟଣା ପୁଲିସ ଟିମ୍ରେ ଦୁଇଜଣ ଇନ୍ସପେକ୍ଟର ଓ ଦୁଇଜଣ ସବ-ଇନ୍ସପେକ୍ଟର ସାମିଲ ରହିଛନ୍ତି।
ରିୟା ଚକ୍ରବର୍ତ୍ତୀ ଓ ତାଙ୍କ ପରିବାରଲୋକ ସୁଶାନ୍ତଙ୍କ ସହ ପ୍ରତାରଣା କରିଛନ୍ତି। ପ୍ରେମ ଜାଲରେ ଫସାଇ ତାଙ୍କ ଠାରୁ ଟଙ୍କା ଆଦାୟ କରିବା ସହ ମାନସିକ ନିର୍ଯାତନା ଦେବା ସହିତ ପରିବାରଲୋକଙ୍କ ସହିତ ସୁଶାନ୍ତଙ୍କୁ ମିଳାମିଶା କରିବାକୁ ଦେଉ ନ ଥିଲେ ବୋଲି ଅଭିଯୋଗ କରିଛନ୍ତି ସୁଶାନ୍ତଙ୍କ ପରିବାର ଲୋକେ ।
ସୁଶାନ୍ତ ସିଂହଙ୍କ ଆତ୍ମହତ୍ୟା ମାମଲାରେ ମୁମ୍ବାଇ ପୁଲିସ ଏବେ ସୁଦ୍ଧା ରିୟା ଚକ୍ରବର୍ତ୍ତୀ, ଆଦିତ୍ୟ ଚୋପ୍ରା, ସଞ୍ଜୟ ଲୀଳା ଭନସାଲି, ମହେଶ ଭଟ୍ଟଙ୍କ ସମେତ ଫିଲ୍ମ ଇଣ୍ଡଷ୍ଟ୍ରିର ଅନେକ ସେଲିବ୍ରିଟିଙ୍କୁ ପଚରାଉଚୁରା କରିଛି। ଖୁବ ଶୀଘ୍ର ଫିଲ୍ମ ନିର୍ମାତା କରଣ ଜୋହରଙ୍କୁ ମଧ୍ୟ ପୋଲିସ ଜେରା କରିବ ବୋଲି କୁହାଯାଉଛି।
ସୂଚନାଯୋଗ୍ୟ, ଜୁନ୍ 14 ତାରିଖରେ ସୁଶାନ୍ତ ବାନ୍ଦ୍ରାସ୍ଥିତ ନିଜ ବାସଭବନରୁ ସୁଶାନ୍ତଙ୍କ ମୃତଦେହ ଉଦ୍ଧାର ହୋଇଥିଲା । ଶବ ବ୍ୟବଚ୍ଛେଦ ରିପୋର୍ଟ ପରେ ପୋଲିସ୍ ଏହାକୁ ଆତ୍ମହତ୍ୟା ବୋଲି କହୁଥିବାବେଳେ ତାଙ୍କ ପରିବାର ଲୋକେ ଓ ପ୍ରଶଂସକମାନେ ଏହାକୁ ହତ୍ୟା ବୋଲି ଦାବି କରିଛନ୍ତି । (ଏଜେନ୍ସି)
