ନୂଆଦିଲ୍ଲୀ: ମୋଦି ଉପନାମ ମାମଲାରେ କଂଗ୍ରେସ ନେତା ରାହୁଲ ଗାନ୍ଧିଙ୍କୁ ବଡ଼ ଆଶ୍ୱସ୍ତି ମିଳିଛି। ବିଜେପି ବିଧାୟକ ପୂର୍ଣ୍ଣେଶ ମୋଦୀଙ୍କ ଦ୍ୱାରା ଦାୟର ମାନହାନୀ ମାମଲାରେ ଦୋଷୀ ସାବ୍ୟସ୍ତ ହେବା ପରେ ତାଙ୍କୁ ୨ ବର୍ଷ ଜେଲ ଦଣ୍ଡାଦେଶ ହୋଇଥିଲା। ଏବେ ଏହି ଦଣ୍ଡାଦେଶ ଉପରେ ରୋକ ଲଗାଯାଇଛି। ତାଙ୍କ ସାଂସଦ ପଦ ପୁନରୁଦ୍ଧାର ହେବାକୁ ଯାଉଛି, ଏବେ ସେ ସଂସଦର ମୌସୁମୀ ଅଧିବେଶନରେ ଯୋଗ ଦେଇପାରିବେ।
ଯଦି ଏହି ଦଣ୍ଡାଦେଶ ବନ୍ଦ କରା ନ ଯାଏ ତେବେ ରାହୁଲ ଗାନ୍ଧି ସଂସଦରୁ ଅଯୋଗ୍ୟ ଘୋଷଣା ହୋଇଥାନ୍ତେ ଏବଂ ଆଗାମୀ ୮ ବର୍ଷ ପର୍ଯ୍ୟନ୍ତ ନିର୍ବାଚନ ଲଢ଼ିପାରିନଥାନ୍ତେ। ଏଭଳି ପରିସ୍ଥିତିରେ ସୁପ୍ରିମକୋର୍ଟଙ୍କ ଏହି ନିଷ୍ପତ୍ତି ରାହୁଲ ଗାନ୍ଧୀ, କଂଗ୍ରେସ ଓ ଆଇଏନଡିଆଇଏ ଆକାରରେ ଗଠିତ ସମଗ୍ର ବିରୋଧୀ ମେଣ୍ଟ ପାଇଁ ଲାଇଫ୍ ଲାଇନଭାବେ କାମ କରିପାରେ। କିନ୍ତୁ ଏବେ ସୁପ୍ରିମକୋର୍ଟଙ୍କ ଏହି ନିଷ୍ପତ୍ତି ଉପରେ ଆବେଦନକାରୀ ପୂର୍ଣ୍ଣେଶ ମୋଦୀ କହିଛନ୍ତି ଯେ ଏହି ଲଢ଼େଇ ଏପର୍ଯ୍ୟନ୍ତ ଶେଷ ହୋଇନାହିଁ।
ସୁପ୍ରିମକୋର୍ଟଙ୍କ ରାୟ ଉପରେ କ’ଣ କହିଲେ ପୂର୍ଣ୍ଣେଶ ମୋଦି
ରାହୁଲ ଗାନ୍ଧିଙ୍କ ଦଣ୍ଡାଦେଶ ଉପରେ ସୁପ୍ରିମକୋର୍ଟଙ୍କ ସ୍ଥଗିତାଦେଶ ଉପରେ ଆବେଦନକାରୀ ପୂର୍ଣ୍ଣେଶ ମୋଦୀ କହିଛନ୍ତି, କୋର୍ଟ ଦେଇଥିବା ଏହି ନିଷ୍ପତ୍ତିକୁ ଆମେ ସ୍ୱାଗତ କରୁଛୁ। କିନ୍ତୁ ଏହି ଲଢ଼େଇ ଏପର୍ଯ୍ୟନ୍ତ ଶେଷ ହୋଇନାହିଁ। ଆମେ ଅଦାଲତରେ ଆମର ଆଇନଗତ ଲଢ଼େଇ ଜାରି ରଖିବୁ। ନିମ୍ନ ଅଦାଲତରେ ଆମ ତରଫରୁ ଏବଂ ସମାଜ ତରଫରୁ ଆଇନଗତ ଲଢ଼େଇ କରାଯିବ ବୋଲି ମୋଦି କହିଛନ୍ତି। ଏବେ ଆମେ ଆପିଲ ଆପ୍ଲିକେସନରେ ସମସ୍ତ ଜିନିଷ ରଖିବୁ। ଆବେଦନର ଶୁଣାଣି ଏପର୍ଯ୍ୟନ୍ତ ହୋଇନାହିଁ।