ନୂଆଦିଲ୍ଲୀ: କ୍ରିକେଟ୍ ର ସବୁଠାରୁ ବଡ ମହାକୁମ୍ଭ ଅର୍ଥାତ୍ ବିଶ୍ୱକପ୍ ଆସନ୍ତାକାଲି ଠାରୁ ଦେଶରେ ଖେଳାଯିବ। ଟୁର୍ଣ୍ଣାମେଣ୍ଟର ପ୍ରଥମ ମ୍ୟାଚ୍ ଅହମ୍ମଦାବାଦର ନରେନ୍ଦ୍ର ମୋଦୀ ଷ୍ଟାଡିୟମରେ ଇଂଲଣ୍ଡ ଏବଂ ନ୍ୟୁଜିଲ୍ୟାଣ୍ଡ ମଧ୍ୟରେ ଖେଳାଯିବ। ଏହି ବିଶ୍ୱକପରେ କିଛି ବ୍ୟାଟ୍ସମ୍ୟାନ୍ ଅଛନ୍ତି, ଯାହାଙ୍କର ପ୍ରଦର୍ଶନ ଉପରେ ସମଗ୍ର ବିଶ୍ୱ ନଜର ରଖିବ।
୧- ବିରାଟ କୋହଲି:
ଭାରତୀୟ କ୍ରିକେଟର ସବୁଠୁ ବଡ ତାରକା ବିରାଟ କୋହଲି ୨୦୨୩ ଏସିଆ କପରେ ତାଙ୍କ ଫର୍ମର ପ୍ରମାଣ ଦେଇଛନ୍ତି। ପାକିସ୍ତାନ ବିପକ୍ଷରେ ବିରାଟଙ୍କ ଶତକ ବର୍ଷ ବର୍ଷ ଧରି ସ୍ମରଣୀୟ ହୋଇ ରହିବ। ୩୪ ବର୍ଷୀୟ ବିରାଟ କୋହଲିଙ୍କ ପାଇଁ ଏହା ମଧ୍ୟ ଶେଷ ବିଶ୍ୱକପ୍ ହୋଇପାରେ। ପ୍ରକାଶ ଯେ ବିଶ୍ୱକପରେ ଶତକ ହାସଲ କରିଥିବା ବିରାଟ ହେଉଛନ୍ତି ସର୍ବକନିଷ୍ଠ ଭାରତୀୟ। କିଙ୍ଗ କୋହଲି ୨୦୧୧ ରେ ତାଙ୍କ ନାମରେ ଏହି ରେକର୍ଡ ସୃଷ୍ଟି କରିଥିଲେ।
୨- ବାବର ଆଜାମ:
ବିଶ୍ୱକପ ଆରମ୍ଭ ପୂର୍ବରୁ ୱାର୍ମ ଅପ୍ ମ୍ୟାଚରେ ପାକିସ୍ତାନ ଅଧିନାୟକ ବାବର ଆଜାମ ନ୍ୟୁଜିଲ୍ୟାଣ୍ଡ ଏବଂ ଅଷ୍ଟ୍ରେଲିଆ ବିପକ୍ଷରେ ନିଜର ଚମତ୍କାର ପ୍ରଦର୍ଶନ କରିଛନ୍ତି। ତେବେ ବାବର ପ୍ରଥମ ଥର ପାଇଁ ଭାରତ ଆସିଛନ୍ତି। ଏଭଳି ପରିସ୍ଥିତିରେ ସମସ୍ତେ ତାଙ୍କ ବ୍ୟାଟିଂ ଦେଖିବାକୁ ଚାହୁଁଥିଲେ। ବାବର ଫର୍ମକୁ ଦେଖିଲେ ସମସ୍ତେ କହୁଛନ୍ତି ଯେ, ସେ ବିଶ୍ୱକପରେ ତିନିରୁ ଚାରି ଶତକ ସହଜରେ ସ୍କୋର କରିପାରିବେ।
୩- ରୋହିତ ଶର୍ମା:
ଗତ ବିଶ୍ୱକପ୍ ହିରୋ ରୋହିତ ଶର୍ମା ଏଥର ମଧ୍ୟ ଆଶ୍ଚର୍ଯ୍ୟଜନକ କାର୍ଯ୍ୟ କରିପାରନ୍ତି। ଇଂଲଣ୍ଡରେ ଖେଳାଯାଇଥିବା ୨୦୧୯ ବିଶ୍ୱକପରେ ରୋହିତ ପାଞ୍ଚଟି ଶତକ ସ୍କୋର କରି ସମଗ୍ର ବିଶ୍ୱକୁ ଆଶ୍ଚର୍ଯ୍ୟ କରିଦେଇଥିଲେ। ଏଥର ମଧ୍ୟ ରୋହିତଙ୍କ ବ୍ୟାଟରୁ ଷଟକୀୟ ପାଳି ଦେଖିବାକୁ ମିଳିଇପାରେ। ରୋହିତ ବିଶ୍ୱକପ ପୂର୍ବରୁ ସ୍ପଷ୍ଟ କରିସାରିଛନ୍ତି ଯେ, ସେ ଆକ୍ରମଣାତ୍ମକ ବ୍ୟାଟିଂ କରିବେ। ଏଭଳି ପରିସ୍ଥିତିରେ ସମସ୍ତେ ତାଙ୍କ ବ୍ୟାଟିଂ ଦେଖିବାକୁ ଉତ୍ସାହିତ ଅଛନ୍ତି।
୪- ଷ୍ଟିଭ୍ ସ୍ମିଥ୍:
ଅଷ୍ଟ୍ରେଲିଆର ପୂର୍ବତନ ଅଧିନାୟକ ତଥା ବରିଷ୍ଠ ବ୍ୟାଟ୍ସମ୍ୟାନ୍ ଷ୍ଟିଭ୍ ସ୍ମିଥ୍ ଙ୍କ ପାଇଁ ଏହା ମଧ୍ୟ ଶେଷ ବିଶ୍ୱକପ୍ ହୋଇପାରେ। ସେ ଏହି ବିଶ୍ୱକପରେ ତିନି ନମ୍ବରରେ ବ୍ୟାଟିଂ କରିବେ। ଗତ ଦୁଇଟି ବିଶ୍ୱକପ୍ରେ ସ୍ମିଥ ଦଳର ବ୍ୟାଟିଂରେ ଏକ ଗୁରୁତ୍ୱପୂର୍ଣ୍ଣ ଖେଳାଳି ବୋଲି ପ୍ରମାଣିତ କରିଛନ୍ତି। ତେବେ ଏଥର ବିଶ୍ୱକପ ଭାରତରେ ଖେଳାଯାଉଛି, ତେଣୁ ଦଳ ସ୍ମିଥଙ୍କୁ ଅଧିକ ଆବଶ୍ୟକ କରୁଛି। ସ୍ମିଥ୍ ମଧ୍ୟ ଭାରତୀୟ ପିଚ୍ ରେ ସହଜରେ ରନ୍ ସ୍କୋର କରିବାରେ ପାରଙ୍ଗମ। ସେ ଦ୍ରୁତ ବୋଲର ଏବଂ ସ୍ପିନରଙ୍କୁ ସହଜରେ ଖେଳନ୍ତି। ସମସ୍ତଙ୍କ ଆଖି ବିଶ୍ୱକପରେ ସ୍ମିଥଙ୍କ ପ୍ରଦର୍ଶନ ଉପରେ ରହିବ।
୫- ବେନ୍ ଷ୍ଟୋକ୍ସ:
ଇଂଲଣ୍ଡ ଅଲରାଉଣ୍ଡର ବେନ ଷ୍ଟୋକ୍ସ ୨୦୨୩ ଦିନିକିଆ ବିଶ୍ୱକପ ପାଇଁ ଅବସର ଘୋଷଣା ଫେରାଇନେଛନ୍ତି। ଏହି ବିଶ୍ୱକପରେ ଇଂଲଣ୍ଡ ପାଇଁ ଷ୍ଟୋକ୍ସ ଚତୁର୍ଥ ନମ୍ବରରେ ବ୍ୟାଟିଂ କରିପାରନ୍ତି। ସେ ଭାରତୀୟ ପିଚ୍ କୁ ଭଲ ଭାବରେ ଜାଣିଛନ୍ତି ଏବଂ ବହୁତ ଅଭିଜ୍ଞ ମଧ୍ୟ। ଏହି ବିଶ୍ୱକପ୍ରେ ବେନ ଷ୍ଟୋକ୍ସଙ୍କ ପ୍ରଦର୍ଶନ ଉପରେ ସମସ୍ତଙ୍କ ଆଖି ରହିବ ବୋଲି କହିବା ଭୁଲ ହେବ ନାହିଁ।