ନୂଆଦିଲ୍ଲୀ: ଜମ୍ମୁ କାଶ୍ମୀରରେ ଲୋକସଭା ନିର୍ବାଚନକୁ ଦୃଷ୍ଟିରେ ରଖି କଂଗ୍ରେସ ଏବଂ ନ୍ୟାସନାଲ କନଫରେନ୍ସ ମଧ୍ୟରେ ଆଲୋଚନା ହୋଇଛି। ସିଟ୍ ବଣ୍ଟନ ଉପରେ ନ୍ୟାସନାଲ କନଫରେନ୍ସ ଉପାଧ୍ୟକ୍ଷ ଓମାର ଅବଦୁଲ୍ଲା କହିଛନ୍ତି ଯେ, ନ୍ୟାସନାଲ କନଫରେନ୍ସ ପ୍ରାର୍ଥୀମାନେ ତିନିଟି ଆସନରେ ପ୍ରତିଦ୍ୱନ୍ଦ୍ୱିତା କରିବେ ଏବଂ ଅବଶିଷ୍ଟ ଆସନରେ ଆମେ କଂଗ୍ରେସ ପ୍ରାର୍ଥୀଙ୍କୁ ସମର୍ଥନ କରିବୁ। ସେ କହିଛନ୍ତି ଯେ, ଉଧମପୁର, ଜମ୍ମୁ ଓ ଲଦାଖ ଆସନରେ କଂଗ୍ରେସ ପ୍ରାର୍ଥୀ ରହିବେ ଏବଂ ଅନନ୍ତନାଗ-ରାଜୌରୀ, ବାରାମୁଲ୍ଲା ଏବଂ ଶ୍ରୀନଗର ଆସନରେ ନ୍ୟାସନାଲ କନଫରେନ୍ସ ପ୍ରାର୍ଥୀ ପ୍ରତିଦ୍ୱନ୍ଦିତା କରିବେ।
ପିଡିପି ସହ ମେଣ୍ଟ ପ୍ରସଙ୍ଗରେ ଓମାର ଅବଦୁଲ୍ଲା କହିଛନ୍ତି ଯେ, ଆମେ ଏକାଠି ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିବାକୁ ଚେଷ୍ଟା କରିଥିଲୁ। କିନ୍ତୁ କିଛି ସଫଳ ହୋଇପାରିଲା ନାହିଁ। ଲୋକସଭା ନିର୍ବାଚନରେ ଆମକୁ ସାହାଯ୍ୟ କରିବାକୁ ଆମେ ତାଙ୍କୁ କହିଥିଲୁ। ଆମେ ତାଙ୍କୁ ବିଧାନସଭାରେ ସାହାଯ୍ୟ କରିବୁ, କିନ୍ତୁ ଆଲୋଚନା ସଫଳ ହୋଇପାରିଲା ନାହିଁ। ଗଣତନ୍ତ୍ରରେ ସେମାନଙ୍କର ଯେକୌଣସି ସ୍ଥାନରୁ ନିର୍ବାଚନ ପ୍ରତିଦ୍ୱନ୍ଦ୍ୱିତା କରିବାର ଅଧିକାର ଅଛି।
ତେବେ ଚୌଧୁରୀ ଲାଲ ସିଂ ଉଦାମପୁରରୁ ପ୍ରତିଦ୍ୱନ୍ଦ୍ୱିତା କରିବେ, ଜମ୍ମୁରୁ ରମଣ ଭଲ୍ଲା ଏବଂ ମିଆଁ ଅଲତାଫ ଅହମ୍ମଦ ଅନନ୍ତନାଗରୁ ପ୍ରତିଦ୍ୱନ୍ଦ୍ୱିତା କରିବେ। ଅବଶିଷ୍ଟ ଆସନ ପାଇଁ ପ୍ରାର୍ଥୀ ଶୀଘ୍ର ଘୋଷଣା କରାଯିବ ବୋଲି ଓମାର ଅବଦୁଲ୍ଲା କହିଛନ୍ତି।
ଆମେ ସମସ୍ତ ୬ ଟି ଆସନ ଜିତିବୁ- ଓମାର ଅବଦୁଲ୍ଲା
ଓମାର ଅବଦୁଲ୍ଲା ଆହୁରି ମଧ୍ୟ କହିଛନ୍ତି ଯେ, ‘ଇଣ୍ଡି’ ମେଣ୍ଟ ଅଧୀନରେ ଜମ୍ମୁ କାଶ୍ମୀର ଏବଂ ଲଦାଖର ସମସ୍ତ ୬ ଟି ଆସନରେ ସଫଳତା ହାସଲ କରିବାକୁ ଆମେ ଚେଷ୍ଟା କରିବୁ। ଏଠାରୁ ଜିତିବା ଦ୍ୱାରା ଇଣ୍ଡିଆ ଆଲାଇନ୍ସର ସମସ୍ତ ୬ ଜଣ ପ୍ରାର୍ଥୀ ସଂସଦରେ ସ୍ୱର ଉତ୍ତୋଳନ କରି ଲୋକଙ୍କ ଉଦ୍ଦେଶ୍ୟ ଏବଂ ସ୍ୱପ୍ନ ପୂରଣ କରିବେ।
ମେହବୁବା ମୁଫତି କେଉଁଠାରୁ ନିର୍ବାଚନ ଲଢିବେ?
ପ୍ରକାଶ ଯେ, ପିଡିପି ସଭାପତି ମେହବୁବା ମୁଫତି ଅନନ୍ତନାଗ-ରାଜୌରୀ ଆସନରୁ ଲୋକସଭା ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିବେ। ଡିଜିପି ମୁଖ୍ୟ ଗୁଲାମ ନବୀ ଆଜାଦ ମଧ୍ୟ ଏଠାରୁ ପ୍ରତିଦ୍ୱନ୍ଦ୍ୱିତା କରୁଛନ୍ତି। ପିଡିପି ସଂସଦୀୟ ବୋର୍ଡ ମୁଖ୍ୟ ସରତାଜ ମଦାନୀ ରବିବାର ଦିନ କାଶ୍ମୀରରେ ୬ ଟି ଆସନ ପାଇଁ ଦଳର ପ୍ରାର୍ଥୀ ଘୋଷଣା କରିଥିଲେ। ପାର୍ଟି ଯୁବ ମୋରଚାର ସଭାପତି ୱହିଦ୍ ପାରା ଶ୍ରୀନଗରରୁ ଏବଂ ପୂର୍ବତନ ରାଜ୍ୟସଭା ସଦସ୍ୟ ମିର ଫୟାଜ ବାରାମୁଲାରୁ ପ୍ରତିଦ୍ୱନ୍ଦ୍ୱିତା କରିବେ।
