ନୂଆଦିଲ୍ଲୀ: ଲୋକସଭାରେ ବିରୋଧୀ ଦଳର ନେତା ରାହୁଲ ଗାନ୍ଧୀ ଗୃହରେ ଭାଷଣ ଦେବା ସମୟରେ ହିନ୍ଦୁ ଧର୍ମ ସମ୍ପର୍କରେ ଦେଇଥିବା ବିବୃତ୍ତି ପାଇଁ ତାଙ୍କୁ ସମାଲୋଚନା କରାଯାଇଛି। ଶାସକ ଦଳ ଭାରତୀୟ ଜନତା ପାର୍ଟିଠାରୁ ଆରମ୍ଭ କରି ଧାର୍ମିକ ନେତାଙ୍କ ପର୍ଯ୍ୟନ୍ତ ସମସ୍ତେ ତାଙ୍କ ଉପରେ ଆକ୍ରମଣ କରୁଛନ୍ତି। ଏହି କ୍ରମରେ ଶଙ୍କରାଚାର୍ଯ୍ୟ ସ୍ଵାମୀ ଅଭିମୁକ୍ତେଶ୍ୱରାନନ୍ଦ କହିଛନ୍ତି ଯେ, ଆଜିକାଲି ସମସ୍ତେ ହିନ୍ଦୁ ହେବାକୁ ପ୍ରତିଯୋଗୀତା କରୁଛନ୍ତି।
ଶଙ୍କରାଚାର୍ଯ୍ୟ ସ୍ଵାମୀ ଅଭିମୁକ୍ତେଶ୍ୱରାନନ୍ଦ ରାହୁଲ ଗାନ୍ଧୀଙ୍କ ହିନ୍ଦୁମାନଙ୍କ ଉପରେ ଦେଇଥିବା ବିବୃତ୍ତିକୁ ନେଇ ତୀବ୍ର ପ୍ରତିକ୍ରିୟା ପ୍ରକାଶ କରିଛନ୍ତି। ସେ କହିଛନ୍ତି ଯେ, ସମଗ୍ର ଦେଶର ରାଜନୀତିରେ ନିଜକୁ ଏକ ବଡ଼ ହିନ୍ଦୁ ରୂପେ ଚିତ୍ରିତ କରିବା ପାଇଁ ପ୍ରତିଯୋଗିତା ଚାଲିଛି, କିନ୍ତୁ ଆଜି ପର୍ଯ୍ୟନ୍ତ କୋଟି କୋଟି ହିନ୍ଦୁମାନଙ୍କ ମା’ ଗାଈ ସୁରକ୍ଷା ପାଇଁ କୌଣସି ପଦକ୍ଷେପ ନିଆଯାଇନାହିଁ। ନୂତନ ସଂସଦର ସମସ୍ତ ସଦସ୍ୟଙ୍କୁ ଗୋ ସୁରକ୍ଷା ବିଲ୍ ଆଣିବାକୁ ଦାବି କରୁଥିବାବେଳେ ସେ କହିଛନ୍ତି ଯେ, ଲୋକସଭାରେ ଗୋ ସୁରକ୍ଷା ବିଲ୍ ପାସ କରିଥିବା ବ୍ୟକ୍ତିଙ୍କୁ ପ୍ରକୃତ ହିନ୍ଦୁମାନେ ବିଚାର କରିବେ।
‘ହିନ୍ଦୁମାନଙ୍କୁ ହିଂସାତ୍ମକ କହିବା ଠିକ୍ ନୁହେଁ’:
ସେ ଆହୁରି ମଧ୍ୟ କହିଛନ୍ତି ଯେ, “ହିନ୍ଦୁ ଦୁଇଟି ଶବ୍ଦକୁ ନେଇ ଗଠିତ – ‘ହିନ’ ଏବଂ ‘ଦୁ’। ହିନ ଅର୍ଥ ହେଉଛି ‘ହିଂସା’ ଏବଂ ‘ଦୁ’ ଅର୍ଥ ହେଉଛି ‘ଯିଏ ଦୂରରେ ଥାଏ’। ତେଣୁ ହିନ୍ଦୁମାନଙ୍କୁ ହିଂସାତ୍ମକ କହିବା ଠିକ୍ ନୁହେଁ।
