ରାୟଗଡା: ବେଦାନ୍ତ କଂପାନୀ ବିରୋଧରେ ତାତିଛନ୍ତି ଆଦିବାସୀ। ଆଜି ଅପରାହ୍ନରେ ଉତ୍ୟେକ୍ତ ଆଦିବାସୀମାନେ ରାୟଗଡା ଜିଲ୍ଲା କାଶୀପୁର ଥାନା ଭିତରେ ପଶି ଭଙ୍ଗାରୁଜା କରିଛନ୍ତି। ଏଥିସହିତ ଥାନା ବାହାରେ ଟାୟାର ଜାଳି ପ୍ରତିବାଦ କରିଛନ୍ତି। ପରିସ୍ଥିତି ଉତ୍ତେଜନା ରହିବାରୁ ଅଧିକ ଫୋର୍ସ ମୁତୟନ କରାଯାଇଛି।
ଘଟଣାରୁ ପ୍ରକାଶ ଯେ, କାଶୀପୁର ଥାନା ପୋଲିସ ଜଣେ ଆଦିବାସୀଙ୍କୁ ଗିରଫ କରିଛନ୍ତି। ତାଙ୍କ ନାମ ହେଉଛି କାର୍ତ୍ତିକ ନାୟକ। ତାଙ୍କ ଗିରଫ ପ୍ରତିବାଦରେ ଚାରିଖଣ୍ଡ ଆଦିବାସୀ ଗ୍ରାମର ପ୍ରାୟ 400 ରୁ 500 ମହିଳା ଓ ପୁରୁଷ ଏକ ଶୋଭାଯାତ୍ରା କରି କାଶୀପୁର ଥାନା ଆଡକୁ ମାଡିଆସିଥିଲେ। ସେମାନେ ବେଦାନ୍ତ କଂପାନୀ ଗୋ ବ୍ୟାକ୍, ମୈତ୍ରୀ କଂପାନୀ ଗୋ ବ୍ୟାକ୍ କହି ଥାନା ଘେରାଉ କରିଥିଲେ।
ଉତ୍ୟେକ୍ତ ଆଦିବାସୀ ହାତରେ ସେମାନଙ୍କ ପାରଂପାରିକ ହତିୟାର ଧରି ଥାନା ଭିତରେ ପ୍ରବେଶ କରିଥିଲେ। ସେଠାରେ ଗିରଫ କାର୍ତ୍ତକଙ୍କୁ ଛାଡି ଦିଅ ବୋଲି ଦାବୀ କରିଥିଲେ। ଏହା ଭିତରେ ପୋଲିସ ଏବଂ ଆଦିବାସୀଙ୍କ ମଧ୍ୟରେ ଉଚ୍ଚବାଚ ହେବାରୁ ଗଣ୍ଡୋଗଳ ହୋଇଥିଲା। ଥାନା ଭିତରେ ଆଦିବାସୀମାନେ ଭଙ୍ଗାରୁଜା କରିଥିଲେ। ବାହାରକୁ ଆସି ଟାୟାର ଜାଳି ଗିରଫ ବିରୋଧରେ ପ୍ରତିବାଦ କରିଥିଲେ।
ବେଦାନ୍ତ କଂପାନୀ ରାୟଗଡା ଓ କଳାହାଣ୍ଡି ଜିଲ୍ଲାରେ ଥିବା ସିଜିମାଳି ଖଣି ଅଧିଗ୍ରହଣ କରିବାକୁ ଚେଷ୍ଠା କରୁଛି। ସେଥିପାଇଁ କଂପାନୀ ମୈତ୍ରୀ ନାମକ ଏକ କଂପାନୀକୁ ନିଯୁକ୍ତି ଦେଇଛି। ମୈତ୍ରୀ କଂପାନୀ ତାହାକୁ ଦଖଲ କରିବା ବେଳେ ସ୍ଥାନୀୟ ଆଦିବାସୀମାନେ ବିରୋଧ କରିଥିଲେ। ପରେ ପୋଲିସ କାର୍ତ୍ତିକଙ୍କୁ ଗିରଫ କରିଛି। ଯାହାକୁ ନେଇ ଆଦିବାସୀମାନେ ପ୍ରତିବାଦ କରିଛନ୍ତି।
ଜଣେ ଆଦିବାସୀ ନେତାଙ୍କ କହିବା କଥା ଯେ, ବେଦାନ୍ତ କଂପାନୀ ଜୋର ଜବରଦସ୍ତ ସିଜିମାଳି ଖଣିକୁ ଅଧିଗ୍ରହଣ କରିବା ପାଇଁ ଚେଷ୍ଠା କରୁଛି। ଏହି କାର୍ଯ୍ୟ କରିବା ପାଇଁ ବେଦାନ୍ତ ମୈତ୍ରୀ ନାମକ ଅନ୍ୟ ଏକ କଂଣ୍ଟାରକ୍ଟର କଂପାନୀକୁ ନିୟୋଜନ କରିଛି। ସେହି କଂପାନୀର ଅଧିକାରୀମାନେ ବିଭିନ୍ନ ସମୟରେ ଆଦିବାସୀଙ୍କୁ ମାରଧର କରୁଛନ୍ତି ବୋଲି ଅଭିଯୋଗ କରାଯାଇଛି।
ବର୍ତ୍ତମାନ ସେଠାରେ ଉତ୍ତେଜନା ଲାଗି ରହିଛି। ପରିସ୍ଥିତି ନିୟନ୍ତ୍ରଣ କରିବା ପାଇଁ ଅଧିକ ପୋଲିସ ମୁତୟନ କରାଯାଇଛି। ସ୍ଥାନୀୟ ତହସିଲଦାର ଏବଂ ବିଡିଓଙ୍କୁ ମଧ୍ୟ ତୁରନ୍ତ ଘଟଣା ସ୍ଥଳରେ ପହଞ୍ଚିବା ପାଇଁ ନିର୍ଦ୍ଦେଶ ଦିଆଯାଇଛି।