ନୂଆଦିଲ୍ଲୀ: ଗୋଟିଏ ଥଣ୍ଡା ପାନୀୟ ବା କୋଲଡ୍ ଡ୍ରିଙ୍କିସର ଦାମ ହେଉଛି ୧୬ ହଜାର ୪୦୦ ଟଙ୍କା। ଏହା ଯେ କେହି ଶୁଣିଲେ ସେ ନିଶ୍ଚିତ ଆଶ୍ଚର୍ଯ୍ୟ ହୋଇଯିବ। କାରଣ ଏତେ ଟଙ୍କାର କୋଲଡ ଡ୍ରିଙ୍କିସ ଅଛି କି ବୋଲି ପ୍ରଶ୍ନ ଉଠିବ। ହେଲେ ତାହା ନୁହେଁ, ପ୍ରକୃତରେ ଏକ କୋଲଡ ଡ୍ରିଙ୍କିସର ଦାମ ଏକ ହୋଟେଲ ତାଙ୍କ ଗ୍ରାହକଙ୍କୁ ଏହି ଟଙ୍କା ଦାବୀ କରିଛି। ଏତେ ଟଙ୍କା କାହିଁକି ବୋଲି ପ୍ରଶ୍ନ କରିବାରୁ ଗ୍ରାହକଙ୍କୁ ମାରଧର କରାଯିବା ସହିତ ପୁଣି ପଚାଶ ହଜାରଟଙ୍କା ଦାବୀ କରାଯାଇଛି।
ତେବେ ଘଟଣାଟି ନୂଆଦିଲ୍ଲୀରେ ଘଟିଛି। ସବୁଠୁ ଆହୁରି ଆଶ୍ଚର୍ଯ୍ୟ ହେବେ ଯେ, ପ୍ରେମାଳାପ ଲୋଭରେ ଜଣେ ପୁରୁଷ ଏହି ଘଟଣାରେ ଫସିଯାଇଛନ୍ତି। ଯିଏ କି ହଟହଟା ହେବା ସହିତ ଗୋଟିଏ ଥଣ୍ଡା ପାନୀୟ ଏତେ ଦାମ ଦେବାକୁ ବାଧ୍ୟ ହେଉଥିଲା। ପରବର୍ତ୍ତି ସମୟରେ ପୋଲିସ ଖବର ପାଇବା ପରେ ସେଠାରେ ପହଞ୍ଚି ଏକ ବଡ ରାକେଟର ପର୍ଦ୍ଦା ଫାର୍ସ କରିଛି।
ଘଟଣାଟି ହେଲା ଜଣେ ବ୍ୟକ୍ତିଙ୍କୁ ଜଣେ ଯୁବତୀ ହ୍ବାଟସଆପ ରେ ଏକ ମେସେଜ ପଠାଇଲେେ। ସେଥିରେ ତାଙ୍କ ସହିତ ଡେଟିଂ ବା ହୋଟେଲରେ ବସି ପ୍ରେମାଳାପ କରିବା ପାଇଁ ନିମନ୍ତ୍ରଣ କଲେ। ଏହା ପାଇବା ପରେ ସେହି ବ୍ୟକ୍ତି ଜଣଙ୍କ ଖୁସି ହୋଇ ସେଥିରେ ଥିବା ଠିକଣାରେ ଗାଜିଆବାଦର କୌଶମ୍ବୀ ମେଟ୍ରୋ ଷ୍ଟେସନ ନିକଟରେ ପହଞ୍ଚି ଯାଇଥିଲେ। ସେଠାରେ ଅପେକ୍ଷାରତ ସେହି ଯୁବତୀଙ୍କ ସହ ଭେଟ ହେବାପରେ ଉଭୟ କୌଶମ୍ବୀ ହୋଟେଲର ପ୍ରଥମ ମହଲାକୁ ଯାଇଥିଲେ। ସେଠାରେ ଟାଇଗର କାଫେରେ ଉଭୟ ବସି କଥାବାର୍ତ୍ତା ସହିତ ଖାଦ୍ୟ ପାନୀୟ ଅର୍ଡର କରିଥିଲେ।
ମହିଳାଙ୍କ ହାବଭାବ ଦେଖି ସେହି ବ୍ୟକ୍ତି ଜଣଙ୍କର ସନ୍ଦେହ ହୋଇଥିଲା। ତେବେ ସେହି ବ୍ୟକ୍ତିଙ୍କର ନଜର ହଠାତ ସେଠାରେ ମରାଯାଇଥିବା ବିଭିନ୍ନ ଖାଦ୍ୟ ପଦାର୍ଥର ଦାମ ଉପରେ ନଜର ଆସିଥିଲା। ସେଥିରେ ବିଭିନ୍ନ ଖାଦ୍ୟ ପଦାର୍ଥର ଯେଉଁ ଦାମ ଲେଖାଯାଇଥିଲା ତାହା ତାଙ୍କୁ ହତବାକ କରିଥିଲା। ତାପରେ ସେ ଏକ ମାୟାବିନୀ ଜାଲରେ ଫସିଯାଇଛନ୍ତି ବୋଲି ସ୍ପଷ୍ଟ ହୋଇଗଲେ। ସେ ନିଶ୍ଚିତ ହେଲେ ଯେ, ଏ ଯୁବତୀ ଏଠାରେ ଏକା ନ ଥିବ, ଏମାନଙ୍କର ଏକ ଗ୍ୟାଗ ଏଠାରେ ଛକି ରହିଥିବେ।
ଏହାପରେ ସେହି ବ୍ୟକ୍ତି ଜଣଙ୍କ ତାଙ୍କର ଜଣେ ବନ୍ଧୁଙ୍କୁ ନିଜର ଲାଇଭ୍ ଲୋକେସନ ପଠାଇ ସାହାଯ୍ୟ କରିବା ପାଇଁ ନିବେଦନ କରିଥିଲେ। ଏହି ମେସେଜ ପାଇବା ପରେ ତାଙ୍କ ବନ୍ଧୁ ତୁରନ୍ତ ପୋଲିସ ସହିତ ଯୋଗାଯୋଗ କରିଥିଲେ। ଇତିମଧ୍ୟରେ ଖାଦ୍ୟପାନୀୟ ଶେଷ ହେବା ପରେ ସେହି ଯୁବତୀ କୁଆଡେ ଉଭାନ ହୋଇଯାଇଥିଲେ। ସେହି ବ୍ୟକ୍ତି ବିଲ ଦେବା ପାଇଁ ଯିବା ପରେ ଗୋଟିଏ କୋଲଡ୍ରିଙ୍କସ ଦାମ ୧୬,୪୦୦ ଟଙ୍କା ଦେଖି ପ୍ରଶ୍ନ କରିଥିଲେ। ହେଲେ କାଫେ ତରଫରୁ ସେହି ବିଲ ଦେବା ପାଇଁ ତାଙ୍କୁ ବାଧ୍ୟ କରିଥିଲେ। ଏପରିକି ତାଙ୍କୁ ଏକ ଘର ଭିତରକୁ ନେଇ ବାନ୍ଧି ଦେଇଥିଲେ।
ଏହି ସମୟ ଭିତରେ ସେଠାରେ ପୋଲିସ ପହଞ୍ଚି ତାଙ୍କୁ ଉଦ୍ଧାର କରିବା ସହିତ ଏହି ଘଟଣାର ଛାନଭିନ କରିଥିଲେ। ସେହିଠାରେ ସେମାନେ ଜାଣିବାକୁ ପାଇଥିଲେ ଯେ, ଯୁବକମାନଙ୍କୁ ଡେଟିଂ କରି ସେମାନଙ୍କଠାରୁ ପଇସା ଆଦାୟ କରାଯାଉଥିଲା। ଏହାପରେ ଅଧିକ ତଦନ୍ତ କରି ପୋଲିସ ଜାଣିବାକୁ ପାଇଲା ଯେ, ଏହି ଜାଲିୟାତି ଆଠ ଜଣ ଅପରେଟ କରୁଥିଲେ। ସେମାନଙ୍କ ମଧ୍ୟରେ ପାଞ୍ଚ ଜଣ ଯୁବତୀ ଏବଂ ତିନି ଜଣ ପୁରୁଷ ଅଛନ୍ତି। ଯୁବତୀମାନଙ୍କର ବିଭିନ୍ନ ଡେଟିଂ ଆପ ସହିତ ପଞ୍ଜିକରଣ ରହିଛି। ସେମାନେ ଯୁବକମାନଙ୍କୁ ଏପରି ଫସାଇ ସେହି ଟାଇଗର କାଫେକୁ ଆଣୁଥିଲେ। କାଫେ ମାଲିକଙ୍କ ସହିତ ମିଶି ସେମାନଙ୍କର ଏହି କାରବାର ଚାଲିଥିଲା। ଗାଜିଆବାଦ କମିସନରେଟ ପୋଲିସ ଏହାର ପର୍ଦ୍ଦା ଫାର୍ସ କରାଇ ସମସ୍ତଙ୍କୁ ଗିରଫ କରିଛି।