ଭୁବନେଶ୍ବର: ନୂଆ ବର୍ଷରେ ରାଜ୍ୟ ବିଜେପିକୁ ମିଳିବ ନୂଆ ସଭାପତି। କାରଣ ବିଜେପିର ଯେଉଁ ତୃଣମୂଳ ସଂଗଠନ ନିର୍ବାଚନ ଚାଲିଛି ତାହା ଶେଷ ହେବ। ସେମାନେ ନିର୍ବାଚିତ ହେବା ପରେ ରାଜ୍ୟର ନୂଆ ସଭାପତିଙ୍କୁ ବାଛିବେ। ସେହି ହିସାବରେ ଆସନ୍ତା ଜାନୁୟାରୀରେ ରାଜ୍ୟ ବିଜେପିକୁ ଆସିବେ ନୂଆ ମଙ୍ଗୁଆଳ। ଯେହେତୁ ବିଜେପି ବର୍ତ୍ତମାନ ରାଜ୍ୟ ସରକାରରେ ରହିଛି ତେଣୁ ଏହି ସଭାପତି ପଦବୀ ଉପରେ ବହୁ ବରିଷ୍ଠ ନେତାଙ୍କ ନଜର।
ତେବେ ଏଠାରେ ପ୍ରଶ୍ନ ଉଠିଛି ଯେ, ବର୍ତ୍ତମାନର ସଭାପତି ମନମୋହନ ସାମଲ ପୁଣି ଥରେ ସଭାପତି ହେବେ ନା ତାଙ୍କୁ ହଟାଇ ଦିଆଯିବ। ଦେଖିବାକୁ ଗଲେ ମନମୋହନ ଚଳିତ ନିର୍ବାଚନରେ ପ୍ରମୁଖ ଭୂମିକା ଗ୍ରହଣ କରିଥିଲେ। ବିଜେପି ବିଜେଡି ମେଣ୍ଟ ନ ହେବା ପାଇଁ ଯେଉଁ କେତେଜଣଙ୍କର ଭୂମିକା ରହିଛି ସେମାନଙ୍କ ମଧ୍ୟରେ ମନମୋହନ ମୁଖ୍ୟ। ହେଲେ ଦୁଃଖର କଥା ଯେ, ସେ ନିର୍ବାଚନରେ ହାରିଗଲେ।
ମନମୋହନ ଯଦି ଜିତିଥାଆନ୍ତେ ତେବେ ସେ ହୁଏତ ରାଜ୍ୟ ମନ୍ତ୍ରୀ ମଣ୍ଡଳରେ ଏକ ପ୍ରମୁଖ ଭୂମିକା ଗ୍ରହଣ କରିଥାଆନ୍ତେ। ଏପରିକି ସେ ମୁଖ୍ୟମନ୍ତ୍ରୀ ପଦ ପାଇଁ ମଧ୍ୟ ଦାବୀଦାର ହୋଇପାରି ଥାଆନ୍ତେ। ହେଲେ ସେ ହାରିବା ପରେ ଏହି ଆଶା ସଂପୂର୍ଣ୍ଣ ରୂପେ ମଉଳି ଗଲା। ଅନ୍ୟପଟେ ତାଙ୍କୁ ବିଜେପି ରାଜ୍ୟ ଯୋଜନା ବୋର୍ଡର ଅଧ୍ୟକ୍ଷ କରିବ ବୋଲି ମଧ୍ୟ ଆଶା କରାଯାଉଥିଲା। ହେଲେ ପଦ୍ମ ଘୁଞ୍ଚି ଘୁଞ୍ଚି ଯିବା ପରି ତାହା ମଧ୍ୟ ହୋଇପାରୁ ନାହିଁ।
ବର୍ତ୍ତମାନ ରାଜ୍ୟ ବିଜେପିରେ ମନମୋହନଙ୍କ ଭୂମିକ ଗୌଣ ହୋଇଯାଇଛି ବୋଲି କହିଲେ ଅତ୍ୟୁକ୍ତି ହେବ ନାହିଁ। କାରଣ ବର୍ତ୍ତମାନ ସେ ଦଳୀୟ କାର୍ଯ୍ୟାଳୟରେ ପ୍ରଧାନମନ୍ତ୍ରୀଙ୍କୁ ଧନ୍ୟବାଦ ଦେବା କିମ୍ବା କେନ୍ଦ୍ର ସରକାରଙ୍କ ଯୋଜନାକୁ ପ୍ରଶଂସା କରି ସାମ୍ବାଦିକ ସମ୍ମିଳନୀରେ ସୀମିତ ରହିଛି। ସେହିପରି କେନ୍ଦ୍ରୀୟ ନେତା ଆସିଲେ ତାଙ୍କୁ ବିମାନବନ୍ଦରରୁ ପାଛୋଟି ଆଣିବା କାମ କରୁଛନ୍ତି। ଏହା ବ୍ୟତିତ ସେମିତି କିଛି ଆଖି ଦୃଶିଆ କାମ କରିବା ପରି ତାଙ୍କ ପାଖରେ କ୍ଷମତା ନାହିଁ।
ଏପରି ପରିସ୍ଥିତିରେ ମନମୋହନ ସାମଲ ବର୍ତ୍ତମାନ ଦଳର ସଭାପତି ଥିଲେ ମଧ୍ୟ ସେ ଦୃଶ୍ୟପଟରୁ ହଜି ହଜି ଯିବା ପରି ମନେ ହେଉଛି। ଯଦି କୌଣସି କାରଣରୁ ତାଙ୍କୁ ପୁଣି ଥରେ ତାଙ୍କୁ ସଭାପତି ନ କରାଯାଏ ତେବେ ସେ ରାଜନୀତିରୁ ଏକ ପ୍ରକାରର ଅବସର ନେବା ପରି ପରିସ୍ଥିତି ସୃଷ୍ଟି ହୋଇଯିବ। ସେତେବେଳେ ସେ ନା ଦଳୀୟ କାର୍ଯ୍ୟରେ ମୁଣ୍ଡ ପୁରାଇ ପାରିବେ ନା ସରକାରୀ କାର୍ଯ୍ୟରେ ହସ୍ତକ୍ଷେପ କରିପାରିବେ। ତେବେ ମନମୋହନଙ୍କ ଉପରେ ପ୍ରଧାନମନ୍ତ୍ରୀଙ୍କ ଭରସା ରହିଥିବାରୁ ତାଙ୍କୁ କିଛି ମିଳିବ ବୋଲି ଆଶା କରାଯାଉଛି।