ଭୁବନେଶ୍ବର: ଦୀର୍ଘ ମାସ ଧରି ସ୍ବର୍ଗତ ନବ ଦାସଙ୍କ ଝିଅ ତଥା ଝାରସୁଗୁଡାର ପୂର୍ବତନ ବିଧାୟିକା ଦୀପାଳି ଦାସଙ୍କର ଏବେ ଶନି ଦଶା ଚାଲିଛି। କାରଣ ତାଙ୍କ ଉପରେ କେନ୍ଦ୍ର ତଥା ରାଜ୍ୟ ସରକାରଙ୍କ ପକ୍ଷରୁ ବାରମ୍ବାର ଆକ୍ରମଣ କରାଯାଉଛି। ଦୀପାଳି ଯେପରି ଲହୁଲୁହାଣ ହେବେ ସେ ନେଇ ଯୋଜନା ବଦ୍ଧ ଭାବେ ତାଙ୍କ ପଛରେ ବିଭିନ୍ନ ସରକାରୀ ଏଜେନ୍ସିକୁ ନିୟୋଜିତ କରାଯାଇଛି।
ବର୍ତ୍ତମାନ ତାଙ୍କୁ ଏବଂ ତାଙ୍କ ପରିବାରକୁ ଅପମାନିତ ହେବା ପରି ଯେଉଁ କାର୍ଯ୍ୟ କରାଯାଉଛି ତାହା ହେଲା ତାଙ୍କ ବାପା ନବ ଦାସଙ୍କ ହତ୍ୟାକାଣ୍ଡ। ଏହାକୁ ନେଇ ଦିନକୁ ଦିନ ରାଜନୈତିକ ବୟାନ ବାଜି ଚାଲିଛି। ବିଜେପି ନେତାମାନେ ଦୀପାଳି ଏବଂ ତାଙ୍କ ପରିବାରକୁ ଅପମାନିତ ହେବା ପରି ବୟାନ ଦେବାରେ ଲାଗିଛନ୍ତି। ଯାହାକୁ ନେଇ ଦୀପାଳିଙ୍କ ପରିବାର ବେଶ ମ୍ରିୟମାଣ ହେଉପଡୁଥିବାର ଅନୁମାନ କରାଯାଉଛି।
ତେବେ ସବୁ ବୟାନବାଜିକୁ ବଳିପଡିଲେ ସମ୍ବଲପୁର ବିଧାୟକ ଜୟନାରାୟଣ ମିଶ୍ର। ସେ କହିଲେ ଯେ, ଦୀପାଳି ପଦ ଏବଂ ବ୍ୟବସାୟ ଲୋଭରେ ତାଙ୍କ ବାପାଙ୍କ ମୃତ୍ୟୁକୁ ଭୁଲିଗଲେ। ଏପରି କହିବା କେତେ ଦୂର ଯଥାର୍ଥତା ରହିଛି ତାହା ସାଧାରଣରେ ଅନୁମେୟ। ସେହିପରି ଆଇନ ମନ୍ତ୍ରୀ ପୃଥୀରାଜ ହରିଚନ୍ଦନ କହିଲେ ଯେ, ସିବିଆଇ ତଦନ୍ତ ପାଇଁ ଦୀପାଳି ଲେଖିକି ଦେଲେ ତାହା କାର୍ଯ୍ୟକାରୀ ହେବ। ଏପରି କହି ବିଜେପି ନେତା ଦୀପାଳିଙ୍କୁ ଜଣଙ୍କ ପରେ ଜଣେ ଘେରିବାରେ ଲାଗିଛନ୍ତି।
ସେହିପରି ନବ ଦାସଙ୍କ ଭାଇ ବ୍ରଜକିଶୋର ଦାସଙ୍କ ଘରେ ମଧ୍ୟ ଆଇଟି ରେଡ ଆରମ୍ଭ ହୋଇଯାଇଛି। ଦୁଇଦିନ ଧରି ତାଙ୍କ ଘରେ ଚଢାଉ ଚାଲିଛି। ସେହିପରି ଦୀପାଳିଙ୍କ ଭାଇ ବିଶାଳ ଦାସଙ୍କୁ ଛତିଶଗଡ ପୋଲିସ ଅଟକ ରଖି ହଇରାଣ କରିବାରେ ଲାଗିଛି। ଯାହାକୁ ନେଇ ତାଙ୍କ ପରିବାର ଏପରି ପରିସ୍ଥିତିକୁ ସାମନା କରିବାକୁ ପଡୁଛି। ଆଗକୁ ମଧ୍ୟ ତାଙ୍କ ବ୍ୟବସାୟ ଉପରେ ଲୋଲୁପ ଦୃଷ୍ଟି ନ ପଡିବ ତାହା କହି ହେବ ନାହିଁ। ପୁଣି କିଛିଦିନ ପରେ ତାଙ୍କୁ ଆଉ କିଛି ମାମଲାରେ ଛନ୍ଦି ହେବାକୁ ପଡିବ ବୋଲି ଜଳଜଳ ଦେଖାଯାଉଛି।
ତେବେ ଏତେ ସବୁ କରିବା ପଛରେ ଗୋଟିଏ କାରଣ ହେଉଛି ଯେ, ଦୀପାଳି ବିଜେଡି ଛାଡି ବିଜେପିରେ ଯୋଗ ଦିଅନ୍ତୁ। କାରଣ ବିଜେପି ଅନୁଭବ କରିସାରିଲାଣି ଯେ, ଦୀପାଳିଙ୍କର ନେତୃତ୍ୟ ନେବାର ଦକ୍ଷତା ରହିଛି ଏବଂ ତାଙ୍କ ପାଖରେ ଦଳ ଚଳାଇବାରେ ପ୍ରଚୁର ପଇସା ମଧ୍ୟ ରହିଛି।
ଏପରିକି ଦୀପାଳି ଚାହିଁଲେ ଝାରସୁୁଗୁଡା ଜିଲ୍ଲା ସଂଗଠନକୁ ପୁରା ସମ୍ଭାଳି ପାରିବେ। ସେଥିପାଇଁ ବିଜେପି ତାଙ୍କୁ ଏବଂ ତାଙ୍କ ପରିବାର ବର୍ଗକୁ ହରଡ ଘଣାରେ ପକାଇବାରେ ଲାଗିଛି। ଏହିପରି ବାରମ୍ବାର ତାଙ୍କୁ ଆଘାତ ଦେଲେ ଦୀପାଳି ଛାଟିପିଟି ବିଜେପିରେ ସାମିଲ ହେବେ ବୋଲି ଦଳର ମୁଖିଆ ଆଶା ରଖିଛନ୍ତି। ତେବେ ଦୀପାଳି କେତେଦିନ ପର୍ଯ୍ୟନ୍ତ ଏହି ଆକ୍ରମଣକୁ ସାମନା କରିବେ ତାହା ହିଁ ସବୁଠାରୁ ବଡ ପ୍ରଶ୍ନ।