ଭୁବନେଶ୍ଵର: କର୍ଟିକାଲ୍/ସେରେବ୍ରାଲ୍ ଭିଜୁଆଲ୍ ଇମ୍ପେୟାରମେଣ୍ଟ (ସିଭିଆଇ) ରୋଗରେ ପୀଡ଼ିତ ଶିଶୁମାନଙ୍କ ଜୀବନରେ ଉନ୍ନତି ଆଣିବା ଦିଗରେ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ସ୍ୱରୂପ ଏଲ୍ ଭି ପ୍ରସାଦ ଚକ୍ଷୁ ପ୍ରତିଷ୍ଠାନର ଦୃଷ୍ଟି ପୁନର୍ବାସ କେନ୍ଦ୍ର ପକ୍ଷରୁ ଭୁବନେଶ୍ୱରରେ ସ୍ୱତନ୍ତ୍ର ‘କର୍ଟିକାଲ୍/ସେରେବ୍ରାଲ୍ ଭିଜୁଆଲ୍ ଇମ୍ପେୟାରମେଣ୍ଟ୍ ରିସୋର୍ସ ସେଣ୍ଟର’ ଉଦଘାଟିତ ହୋଇଛି। ଆମେରିକାର ‘ଭିଜନ-ଏଡ୍’ର ବଦାନ୍ୟ ସହଯୋଗ ଦ୍ୱାରା ସମ୍ଭବ ହୋଇଥିବା ଏହି ଅଗ୍ରଣୀ କେନ୍ଦ୍ର ଆଶାର କିରଣ ଭାବେ ଉଭା ହୋଇଛି, ଯାହାର ଲକ୍ଷ୍ୟ ହେଉଛି ସିଭିଆଇ ଦ୍ୱାରା ପ୍ରଭାବିତ ଶିଶୁ ଏବଂ ପରିବାରମାନେ ସମୁଖୀନ ହେଉଥିବା ସମସ୍ୟାକୁ ଦୂର କରିବା ।
ସିଭିଆଇ ଏକ ମସ୍ତିଷ୍କ-ଭିତ୍ତିକ ଦୃଷ୍ଟିଶକ୍ତି ଦୁର୍ବଳତା ରୋଗ ଯେଉଁଥିରେ ଚକ୍ଷୁ ସ୍ୱାଭାବିକ ଭାବରେ କାର୍ଯ୍ୟ କରିପାରେ, କିନ୍ତୁ ମସ୍ତିଷ୍କ ଦ୍ୱାରା ଦୃଷ୍ଟିଶକ୍ତି ସୂଚନାକୁ ବ୍ୟାଖ୍ୟା କରିବା ଏବଂ ବୁଝିବାର କ୍ଷମତା ହ୍ରାସ ପାଇଥାଏ । ଦୃଷ୍ଟିଶକ୍ତି ଦୁର୍ବଳତା ଥିବା ପ୍ରାୟ ୩୦-୪୦% ଶିଶୁ ସିଭିଆଇ ଦ୍ୱାରା ପ୍ରଭାବିତ ହୁଅନ୍ତି, ଯାହା ବିଶ୍ୱବ୍ୟାପୀ ଶିଶୁଙ୍କ ଦୃଷ୍ଟିଶକ୍ତି ଦୁର୍ବଳତା ରୋଗର ପ୍ରମୁଖ କାରଣ ମଧ୍ୟରୁ ଅନ୍ୟତମ ଅଟେ। ଏହି ଶିଶୁମାନଙ୍କ ମଧ୍ୟରୁ ଆଶ୍ଚର୍ଯ୍ୟଜନକ ଭାବରେ ୬୦-୭୦% ଅତିରିକ୍ତ ଅକ୍ଷମତା ସହିତ ମଧ୍ୟ ସଂଘର୍ଷ କରନ୍ତି, ଯାହା ସେମାନଙ୍କ ଜୀବନର ଜଟିଳତାକୁ ବୃଦ୍ଧି କରିଥାଏ । ସିଭିଆଇର ପ୍ରଭାବ ଶାରୀରିକ ସମସ୍ୟା ଠାରୁ ଆରମ୍ଭ କରି ବ୍ୟାପକ ହୋଇଥାଏ, ଯାହା ଶିଶୁର ଶିକ୍ଷଣ, ସାମାଜିକ ସମ୍ପର୍କ ଏବଂ ସାମଗ୍ରିକ ଜୀବନର ଗୁଣବତ୍ତାକୁ ପ୍ରଭାବିତ କରିଥାଏ ।
ଭିଜନ-ଏଡ୍ ର ପ୍ରତିଷ୍ଠାତା ରାମକୃଷ୍ଣ (ରାମ) ରାଜୁ ଏବଂ ରେବତୀ ରାମକୃଷ୍ଣ କହିଛନ୍ତି ଯେ, “ଭୁବନେଶ୍ୱର ଓ ଏହାର ଆଖପାଖ ଅଞ୍ଚଳରେ କର୍ଟିକାଲ୍/ସେରେବ୍ରାଲ୍ ଭିଜୁଆଲ୍ ଇମ୍ପେୟାରମେଣ୍ଟ (ସିଭିଆଇ) ରୋଗରେ ପୀଡ଼ିତ ଶିଶୁମାନଙ୍କ ପାଇଁ ଅତ୍ୟନ୍ତ ଆବଶ୍ୟକ ସେବା ପ୍ରଦାନ କରୁଥିବା ଏଲ୍ ଭି ପ୍ରସାଦ ଚକ୍ଷୁ ପ୍ରତିଷ୍ଠାନ (ଏଲଭିପିଇଆଇ) ଭୁବନେଶ୍ୱର କ୍ୟାମ୍ପସ୍ ପରିସରରେ ”ମନୋରମା ଚୌଧୁରୀ ନୟନ ଜ୍ୟୋତି” ଭିଜନ-ଏଡ୍ ସିଭିଆଇ ରିସୋର୍ସ ସେଣ୍ଟରର ଶୁଭାରମ୍ଭ ନେଇ ଭିଜନ-ଏଡ୍ ପରିବାର ଅତ୍ୟନ୍ତ ଆନନ୍ଦିତ ଓ କୃତଜ୍ଞତା ଜଣାଉଛୁ।
ଏଲ୍. ଭି. ପ୍ରସାଦ ଚକ୍ଷୁ ପ୍ରତିଷ୍ଠାନ ଦଳ ସହିତ ସହଭାଗୀ ହୋଇ ଆମେ ଗର୍ବିତ ଏବଂ ଦୃଷ୍ଟିହୀନଙ୍କ ପ୍ରତି ସେମାନଙ୍କର ଅସୀମିତ ପ୍ରତିବଦ୍ଧତା, ଉତ୍ସର୍ଗ ଏବଂ ସେବା ପାଇଁ ଆମେ ଗଭୀର ପ୍ରଶଂସା କରୁଛୁ । ଡାକ୍ତର ବେଉଲା ଖ୍ରୀଷ୍ଟି ଏବଂ ସମଗ୍ର ଭିଜନ୍ ରିହାବିଲିଟେସନ୍ ଟିମ୍ କୁ ସେମାନଙ୍କର ଦୀର୍ଘସ୍ଥାୟୀ ଭାଗିଦାରୀ ଏବଂ ବନ୍ଧୁତା ତଥା ଡାକ୍ତର ସାହୁ, ଡାକ୍ତର ମାଝୀ ଏବଂ ଅନ୍ୟମାନଙ୍କ ନେତୃତ୍ୱରେ ପରିଚାଳିତ ଏଲଭିପିଇଆଇ ଭୁବନେଶ୍ୱରର ଆଶ୍ଚର୍ଯ୍ୟଜନକ ଦଳକୁ ଆମର ବିଶେଷ ଧନ୍ୟବାଦ ।”
ଶ୍ରୀମତୀ ମନୋରମା ଚୌଧୁରୀ କହିଛନ୍ତି, “ଓଡ଼ିଶାରେ ଭିଜନ-ଏଡ୍ ସିଭିଆଇ ସେଣ୍ଟରର ପ୍ରତିଷ୍ଠାରେ ମହତ୍ତ୍ୱପୂର୍ଣ୍ଣ ସହଯୋଗ କରିଥିବାରୁ ଭିଜନ-ଏଡ୍ ର ପ୍ରତିଷ୍ଠାତା ରାମକୃଷ୍ଣ ରାଜୁ ଓ ରେବତୀ ରାମକୃଷ୍ଣଙ୍କ ସମେତ ଏଲ ଭି ପ୍ରସାଦ ଚକ୍ଷୁ ପ୍ରତିଷ୍ଠାନ (ଏଲଭିପିଇଆଇ)ର ଡାକ୍ତର ଓ ପୁନର୍ବାସ ବିଶେଷଜ୍ଞଙ୍କ ଉତ୍ସର୍ଗୀକୃତ ଦଳକୁ ଆମେ ଗଭୀର କୃତଜ୍ଞତା ଜଣାଉଛୁ ।
ଏହି ପ୍ରୟାସ ଜୀବନରେ ପରିବର୍ତ୍ତନ ଆଣିବା, ଶିଶୁମାନଙ୍କୁ ସେମାନଙ୍କ ସୀମା ବାହାରେ ଦେଖିବାରେ ସାହାଯ୍ୟ କରିବା ଏବଂ ଆତ୍ମସମ୍ମାନ ଓ ସ୍ୱାଧୀନତା ବୃଦ୍ଧି କରିବାର ପ୍ରତିଶୃତି ରଖିଛି । ମୋ ସ୍ୱାମୀ ଭାସ୍କର ପାଣିଗ୍ରାହୀ ଏବଂ ମୁଁ, ମନୋରମା ଚୌଧୁରୀ ଭିଜନ-ଏଡ୍, ଏଲଭିପିଇଆଇ ଏବଂ ଏହି ଉଲ୍ଲେଖନୀୟ ପ୍ରୟାସରେ ସମ୍ପୃକ୍ତ ସମସ୍ତଙ୍କୁ ହାର୍ଦ୍ଦିକ ଶୁଭେଚ୍ଛା ଜଣାଉଛୁ । ଏହି ପଦକ୍ଷେପ ଅଗଣିତ ଜୀବନରେ ଆଲୋକ ଏବଂ ନୂତନ ସମ୍ଭାବନା ଆଣିବ”।
ଡାକ୍ତର ଦେବସ୍ମିତା ମାଝୀ କହିଛନ୍ତି, “ମାନସିକ ସହାୟତା, ନିମ୍ନ ଦୃଷ୍ଟିଶକ୍ତି ଆକଳନ ଓ ସହାୟକ ଉପକରଣ, ଗତିଶୀଳତା ଏବଂ ସ୍ୱାଧୀନ ଜୀବନ ଦକ୍ଷତା ପ୍ରଶିକ୍ଷଣ, ସହକର୍ମୀ ସହାୟତା ଏବଂ ସମର୍ଥନ ସେବା ସମେତ ବ୍ୟାପକ ଦୃଷ୍ଟି ପୁନର୍ବାସ ସେବା ଯୋଗାଇ ଦେବାକୁ ଆମେ ପ୍ରତିଶୃତିବଦ୍ଧ ।
କର୍ଟିକାଲ୍/ସେରେବ୍ରାଲ୍ ଭିଜୁଆଲ୍ ଇମ୍ପେୟାରମେଣ୍ଟ (ସିଭିଆଇ) ଉପରେ କେନ୍ଦ୍ରିତ ଆମର ନୂତନ ପଦକ୍ଷେପ ସହିତ ସିଭିଆଇ ରୋଗରେ ପୀଡ଼ିତ ଶିଶୁମାନେ ଯେପରି ସଠିକ୍ ସମୟରେ ଉପଯୁକ୍ତ ସହାୟତା ପାଇବେ ତାହା ସୁନିଶ୍ଚିତ କରିବା ପାଇଁ ଆମେ ଗୁରୁତ୍ୱପୂର୍ଣ୍ଣ ପଦକ୍ଷେପ ନେଉଛୁ ଯାହା ଶିଶୁମାନଙ୍କୁ ସେମାନଙ୍କର ସମ୍ପୂର୍ଣ୍ଣ ସାମର୍ଥ୍ୟରେ ପହଞ୍ଚିବାକୁ ସଶକ୍ତ କରିବ । ସେମାନଙ୍କ ଜୀବନରେ ପରିବର୍ତ୍ତନ ଆଣିବା ଏବଂ ଓଡ଼ିଶାର ଅନ୍ୟ ସମାଜସେବୀମାନଙ୍କୁ ଏହାକୁ ଆଗଇ ନେବା ପାଇଁ ଉତ୍ସାହିତ କରିବାରେ ଓଡ଼ିଶାର ଭିଜନ-ଏଡ୍ ସିଭିଆଇ ସେଣ୍ଟର ସହାୟକ ହେବ।”
ଏଲଭିପିଇଆଇ ଏମଟିସି କ୍ୟାମ୍ପସର ମୁଖ୍ୟ ଡାକ୍ତର ଶ୍ରୀକାନ୍ତ କୁମାର ସାହୁ ଏହି ପଦକ୍ଷେପର ମହତ୍ତ୍ୱ ଉପରେ ଆଲୋକପାତ କରି କହିଛନ୍ତି, “ସିଭିଆଇ ରୋଗରେ ପୀଡ଼ିତ ଶିଶୁମାନଙ୍କୁ ସଶକ୍ତ କରିବା, ସେମାନଙ୍କୁ ସ୍ୱତନ୍ତ୍ର ପ୍ରଶିକ୍ଷଣ ଏବଂ ସହାୟତା ମାଧ୍ୟମରେ ଆତ୍ମବିଶ୍ୱାସ ଭରି ଦେବା ଏବଂ ସ୍ୱାଧୀନ ଭାବରେ ବଞ୍ଚିବାକୁ ସକ୍ଷମ କରିବା ହେଉଛି ଆମର ଲକ୍ଷ୍ୟ ।
ଆମେ ସେମାନଙ୍କ ଜୀବନ ଉପରେ ଏହି ପଦକ୍ଷେପର ପରିବର୍ତ୍ତନକାରୀ ପ୍ରଭାବ ନେଇ ବହୁତ ଆଶାବାଦୀ, ସେମାନେ ଅଧିକ ପରିମାଣରେ ନିଜକୁ ସମ୍ମାନୀତ ମନେ କରିବେ ଏବଂ ସୁଯୋଗ ପାଇବେ ବୋଲି ଆଶା କରୁଛି ଏବଂ ଏହି କାର୍ଯ୍ୟକ୍ରମକୁ ସମ୍ଭବ କରିବାରେ ଭିଜନ୍ ଏଡ୍ ର ଅକୁଣ୍ଠିତ ସମର୍ଥନକୁ ଆମେ ଗଭୀର ଭାବରେ ପ୍ରଶଂସା କରୁଛୁ ।”
ଏହି ଅଭିନବ କେନ୍ଦ୍ରରେ ଶିଶୁ ଏବଂ ସେମାନଙ୍କ ପରିବାର ପାଇଁ ନୈଦାନିକ ପରୀକ୍ଷା, ଉପଯୁକ୍ତ ଦୃଷ୍ଟିଶକ୍ତି ମୂଲ୍ୟାୟନ ଏବଂ ଭିଜନ୍ ଥେରାପି, ଦୃଷ୍ଟିଶକ୍ତି ଦକ୍ଷତା ପ୍ରଶିକ୍ଷଣ, ସ୍ପିଚ୍ ଥେରାପି ଏବଂ ପରାମର୍ଶ ଭଳି ଅନେକ ସେବା ପ୍ରଦାନ କରାଯାଏ । ଏହା ବ୍ୟତୀତ, ଏହି କେନ୍ଦ୍ର ଘର ପରିବେଶରେ ପରିବର୍ତ୍ତନ, ଗୋଷ୍ଠୀ କାର୍ଯ୍ୟକଳାପ ନିୟୋଜନ, ପିତାମାତାଙ୍କ ସମର୍ଥନ ଗୋଷ୍ଠୀ ଏବଂ ସ୍ୱାଧୀନ ଜୀବନ ଦକ୍ଷତା ପ୍ରଶିକ୍ଷଣ ପ୍ରଦାନ କରେ, ଯାହା ଏହି ଉଲ୍ଲେଖନୀୟ ଶିଶୁମାନଙ୍କ ଜୀବନକୁ ସମୃଦ୍ଧ କରିବା ପାଇଁ ଉଦ୍ଦିଷ୍ଟ ।
କର୍ଟିକାଲ୍/ସେରେବ୍ରାଲ୍ ଭିଜୁଆଲ୍ ଇମ୍ପେୟାମେଣ୍ଟ୍ ରିସୋର୍ସ ସେଣ୍ଟର୍ କେବଳ ଏକ କେନ୍ଦ୍ର ନୁହେଁ; ଏହା ଆଶା, କରୁଣା ଏବଂ ଅଭିନବତାର ପ୍ରତିନିଧିତ୍ୱ କରେ । ‘ଭିଜନ-ଏଡ୍’ର ନିରନ୍ତର ସମର୍ଥନରେ ଏହି ପଦକ୍ଷେପ ସିଭିଆଇ ଦ୍ୱାରା ପ୍ରଭାବିତ ଶିଶୁ ଏବଂ ପରିବାରମାନଙ୍କ ଜୀବନରେ ଏକ ଗୁରୁତ୍ୱପୂର୍ଣ୍ଣ ପରିବର୍ତ୍ତନ ଆଣିବାକୁ ଯାଉଛି ।
