ନୂଆଦିଲ୍ଲୀ: କିଛି ଦିନ ପୂର୍ବରୁ ବିରାଟ କୋହଲି ଟେଷ୍ଟ କ୍ରିକେଟରୁ ଅବସର ନେଇଥିଲେ। ବିରାଟ କୋହଲି ପୂର୍ବରୁ ନାଲି ବଲ୍ ଫର୍ମାଟରେ ନମ୍ବର-୪ରେ ବ୍ୟାଟିଂ କରୁଥିଲେ, କିନ୍ତୁ ଅବସର ପରେ ଏହି ସ୍ଥାନ ଖାଲି ପଡ଼ିଛି। ଏହା ଚର୍ଚ୍ଚାର ସବୁଠାରୁ ବଡ଼ ବିଷୟ ପାଲଟିଛି ଯେ, ନମ୍ବର-୪ରେ ବିରାଟଙ୍କ ସ୍ଥାନ କିଏ ନେବ। ବର୍ତ୍ତମାନ ଟିମ୍ ଇଣ୍ଡିଆର ଇଂଲଣ୍ଡ ଗସ୍ତ ପୂର୍ବରୁ କରୁଣ ନାୟାର ଏକ ମଜବୁତ ଶତକୀୟ ଇନିଂସ ଖେଳି ବିରାଟ କୋହଲିଙ୍କ ସ୍ଥାନ ନେବାକୁ ଦାବି କରିଛନ୍ତି।
ଭାରତ ଏ ଏବଂ ଇଂଲଣ୍ଡ ଲାୟନ୍ସ ମଧ୍ୟରେ ପ୍ରଥମ ପ୍ରଥମ ଶ୍ରେଣୀ ମ୍ୟାଚ୍ ମେ ୩୦ ତାରିଖରେ ଆରମ୍ଭ ହୋଇଥିଲା। ଏହି ମ୍ୟାଚ୍ ରେ ଟିମ୍ ଇଣ୍ଡିଆକୁ ପ୍ରଥମେ ବ୍ୟାଟିଂ କରିବାକୁ ଆମନ୍ତ୍ରଣ କରାଯାଇଥିଲା। ଯଶସ୍ୱୀ ଜୟସ୍ୱାଲ ଏବଂ ଅଧିନାୟକ ଅଭିମନ୍ୟୁ ଈଶ୍ୱରନ୍ ବଡ଼ ସ୍କୋର କରିପାରି ନଥିଲେ, କିନ୍ତୁ କରୁଣ ନାୟାର ଏକ ଶତକ ହାସଲ କରି ବିରାଟଙ୍କ ସ୍ଥାନ ନେବାକୁ ଦାବି କରିଛନ୍ତି। କରୁଣ ନାୟାର ୧୫୫ ବଲ୍ ରେ ତାଙ୍କର ଶତକ ପୂରଣ କରିଥିଲେ।
ସମ୍ପ୍ରତି କିମ୍ବଦନ୍ତୀ କ୍ରିକେଟର ସୁନୀଲ ଗାଭାସ୍କର ପରାମର୍ଶ ଦେଇଥିଲେ ଯେ, ନାୟାର ଟେଷ୍ଟରେ ବିରାଟ କୋହଲିଙ୍କ ପାଇଁ ଭଲ ବଦଳ ପ୍ରମାଣିତ ହୋଇପାରନ୍ତି। କରୁଣ ନାୟାର ଇଂଲଣ୍ଡ ଲାୟନ୍ସ ବିପକ୍ଷ ମ୍ୟାଚ୍ ରେ ତୃତୀୟ ନମ୍ବରରେ ବ୍ୟାଟିଂ କରିଥିଲେ, କିନ୍ତୁ ସେ ସାଧାରଣତଃ ଚତୁର୍ଥ ନମ୍ବରରେ ବ୍ୟାଟିଂ କରନ୍ତି। ପ୍ରଥମ ଦିନ ଶେଷ ସୁଦ୍ଧା ସେ ୨୪୬ ବଲ୍ ରେ ୧୮୬ ରନ୍ କରି ଅପରାଜିତ ଅଛନ୍ତି।
କରୁଣ ନାୟାରଙ୍କ ବ୍ୟତୀତ ସର୍ଫରାଜ ଖାନ ଇଂଲଣ୍ଡ ଲାୟନ୍ସ ବିପକ୍ଷରେ ମଧ୍ୟ ଚମକିଥିଲେ, ଯାହାକୁ ଇଂଲଣ୍ଡ ଗସ୍ତ ପାଇଁ ଟିମ୍ ଇଣ୍ଡିଆରେ ସ୍ଥାନ ମିଳିନାହିଁ। ନାୟାର ଏବଂ ସରଫରାଜଙ୍କ ମଧ୍ୟରେ ୧୮୧ ରନ୍ ର ଏକ ବିଶାଳ ପାର୍ଟନରସିପ୍ ହୋଇଥିଲା। ସରଫରାଜ ଖାନ ୧୧୯ ବଲ୍ ରେ ୯୨ ରନ୍ ର ଇନିଂସ ଖେଳିଥିଲେ। ଭାରତ-ଏ ଦଳ ପ୍ରଥମ ଦିନ ଖେଳ ଶେଷ ସୁଦ୍ଧା ୩ ୱିକେଟ ହରାଇ ୪୦୯ ରନ କରିଛି। କରୁଣ ନାୟାର ୧୮୬ ରନରେ ଅପରାଜିତ ଥିବା ବେଳେ ଧ୍ରୁବ ଜୁରେଲ ୮୨ ରନ କରି ବ୍ୟାଟିଂ କରୁଛନ୍ତି। ପ୍ରକାଶ ଥାଉ ଯେ କରୁଣ ନାୟାର ଭାରତ ପାଇଁ ତାଙ୍କର ଶେଷ ଟେଷ୍ଟ ୨୦୧୭ରେ ଖେଳିଥିଲେ, ଏବେ ଏହି ଶତକୀୟ ଇନିଂସ ଆଧାରରେ ସେ ୭ ବର୍ଷ ପରେ ଟିମ୍ ଇଣ୍ଡିଆରେ ପ୍ରତ୍ୟାବର୍ତ୍ତନ କରିଛନ୍ତି।
ଇଂଲଣ୍ଡ ଟୁର୍ ପାଇଁ ଇଣ୍ଡିଆନ୍ ସ୍କ୍ବାଡ୍: ଶୁଭମନ ଗିଲ (କ୍ୟାପଟେନ),ଋଷଭ ପନ୍ତ (ଭାଇସ କ୍ୟାପଟେନ), ଯଶସ୍ୱୀ ଜୟସ୍ଵାଲ, କେ.ଏଲ୍ ରାହୁଲ, ସାଇ ସୁଦର୍ଶନ, ଅଭିମନ୍ୟୁ ଈଶ୍ଵରନ୍, କରୁଣ ନାୟାର, ନୀତୀଶ ରେଡ୍ଡୀ, ରବିନ୍ଦ୍ର ଜାଡେଜା, ଧ୍ରୁଭ ଜୁରେଲ, ୱାଶିଂଟନ୍ ସୁନ୍ଦର, ଶରଦୁଲ ଠାକୁର କୃଷ୍ଣ, ଆକାଶ ଦୀପ, ଅର୍ଶଦୀପ ସିଂ, କୁଲଦୀପ ଯାଦବ।