ଭୁବନେଶ୍ୱର: ଆଜି ଅପରାହ୍ନରେ ଭୁବନେଶ୍ୱରସ୍ଥିତ ରୋଟାରୀ ଭବନଠାରେ ପିପୁଲ ଫର ଆନିମଲର ଅଧ୍ୟକ୍ଷା ମାନେକା ଗାନ୍ଧୀଙ୍କ ପୌରହିତରେ ପ୍ରାଣୀମାନଙ୍କ ଉପରେ ହେଉଥିବା ନିଷ୍ଠୁରତା ନିରୋଧ ସମ୍ପର୍କରେ ଏକ ଗୁରୁତ୍ୱପୂର୍ଣ୍ଣ କର୍ମଶାଳା ଅନୁଷ୍ଠିତ ହୋଇଥିଲା। ଏଥିରେ ରାଜ୍ୟର ସମସ୍ତ ପ୍ରାଣୀ ସ୍ବେଛାସେବୀ ସଙ୍ଗଠନର କର୍ମକର୍ତ୍ତା ଓ ରାଜ୍ୟରେ ଗୋସୁରକ୍ଷା କ୍ଷେତ୍ରରେ କାର୍ଯ୍ୟ କରୁଥିବା ସମସ୍ତ କାର୍ଯ୍ୟ କର୍ତା ଅଂଶଗ୍ରହଣ କରିଥିଲେ।
କର୍ମଶାଳା ପ୍ରାରମ୍ଭରେ ସେ ଭୁବନେଶ୍ବର ବିମାନ ବନ୍ଦର ଅଂଚଳରେ ବିଷ ପ୍ରୟୋଗ କରି ସତୁରିରୁ ଉର୍ଦ୍ଧ୍ବ କୁକୁରଙ୍କୁ ମାରି ଦିଆଯାଇ ଥିବା ସମ୍ପର୍କରେ ଉଦବେଗ ପ୍ରକାଶ କରିଥିଲେ। ଏ ସମ୍ପର୍କରେ ସ୍ବେଛାସେବୀ ସମୁହ ପ୍ରତିବାଦ କିମ୍ବା ନିରବ କ୍ୟାଣ୍ଡେଲ ଶୋଭାଯାତ୍ରାରେ ଗଲେ ନାହିଁ, ସେ ନେଇ ଅସନ୍ତୋଷ ପ୍ରକାଶ କରିଥିଲେ ।
ଓଡ଼ିଶାରେ ପ୍ରାଣୀ ସୁରକ୍ଷା ପାଇଁ ସମସ୍ତ ସ୍ବେଛାସେବୀଏବଂ ରାଜ୍ୟ ଜୀବେ ନିଷ୍ଠୁରତା ନିରୋଧ ସମିତି ମିଳିତ ଭାବେ ମିଶି କାର୍ଯ୍ୟ କରିବାକୁ ସେ ଆହ୍ୱାନ ଦେଇଥିଲେ। ଜୀବେ ନିଷ୍ଠୁରତା ନିରୋଧ ପାଇଁ ବ୍ୟବହୃତ ବିହିନ୍ୟ ଆଇନ ଓ ଏହାର ଧାରା ସମ୍ପର୍କରେ ଆଲୋଚନା କରିଥିଲେ।
ସେ ରାଜ୍ୟର ବିଭିନ୍ନ ସ୍ଥାନରୁ ଆସିଥିବା ପ୍ରାଣୀ ସଂଗଠନ କର୍ମକର୍ତ୍ତା ଙ୍କ ସହିତ ରାଜ୍ୟରେ ପ୍ରାଣୀ କଲ୍ୟାଣ ନିମନ୍ତେ ବାର୍ତ୍ତାଲାପ କରିଥିଲେ। ରାଜ୍ୟ ଜୀବେ ନିଷ୍ଠୁରତା ନିରୋଧ ସମିତି ଦୀର୍ଘ କୋଡିଏ ବର୍ଷ ଧରି କିଭଳି ଅକର୍ମଣ୍ୟ ଅବସ୍ଥାରେ ରହିଛି ଏବଂ କୌଣସି ଗୁରୁତ୍ତ୍ୱପୂର୍ଣ୍ଣ ବୈଠକ ହେଉ ନାହିଁ ସେ ସମ୍ପର୍କରେ ସମିତି ସଭ୍ୟ ଡା ତ୍ରୈଲୋକ୍ୟ ନାଥ ମହାରଣା ପ୍ରକାଶ କରିଥିଲେ।
ସେଇଭଳି ବିଭିନ୍ନ ଗୋ ସୁରକ୍ଷା ସଂଗଠନ ପକ୍ଷରୁ ରାଜ୍ୟର ରାଜରାସ୍ତାରେ କିଭଳି ବିଭତ୍ସ ଭାବେ ବେଆଇନ ଗୋ ଚାଲାଣ ହେଉଛି, ପ୍ରତ୍ୟେକ ରାତ୍ରିରେ ଗୋ ସଙ୍ଗଠନ କର୍ମକର୍ତ୍ତା କିଭଳି ସେମାନଙ୍କ ସହିତ ଲଢ଼ୁଥିବା କଥା ସେ ପ୍ରକାଶ କରିଥିଲେ। ରାଜ୍ୟରେ ଏସ ପି ସି ଏ ସମ୍ପୂର୍ଣ୍ଣ ଭାବେ ଅକର୍ମଣ୍ୟ ଅବସ୍ଥାରେ ପହଂଚି ଯାଇଥିବା ବେଳେ ପ୍ରାଣୀ ସୁରକ୍ଷା ବ୍ୟବସ୍ଥା ସମ୍ପୁର୍ଣ୍ଣ ଭୁଶୁଡି ଯାଇଥିବା ଉପସ୍ଥିତ ବହୁ ସଦସ୍ୟ କହିଥିଲେ।
ଭୁବନେଶ୍ୱରରେ ପ୍ରାଣୀ ଚିକିତ୍ସା ପାଇଁ ଏକ ଆମ୍ବୁଲାନ୍ସ ରହିବା ପାଇଁ ବ୍ୟବସ୍ଥାକୁ ସମସ୍ତେ ଖୁସି ପ୍ରକଟ କରିଥିଲେ। ସମସ୍ତ ଅଭିଯୋଗ ଶୁଣିବା ପରେ ସେ ସମ୍ପର୍କରେ ବିହିତ ପଦକ୍ଷେପ ନେବାକୁ ସରକାରଙ୍କୁ ପ୍ରସ୍ତାବ ଦେବାକୁ ସେ କହିଛନ୍ତି। ଏହି ବୈଠକରେ ପିପୁଲ ଫର ଆନିମାଲ ର ରାଜ୍ୟ ମେମ୍ବର ସେକ୍ରେଟାରୀ ଜୀବନ ବଲ୍ଲଭ ଦାଶ ଓ ସମସ୍ତ କର୍ମକର୍ତ୍ତା ଉପସ୍ଥିତ ଥିଲେ।