ନୂଆଦିଲ୍ଲୀ: ବ୍ରାଜିଲରେ ଅନୁଷ୍ଠିତ ବ୍ରିକ୍ସ ସମ୍ମିଳନୀରେ ଭାରତକୁ ବଡ଼ କୂଟନୈତିକ ସଫଳତା ମିଳିଛି। ବ୍ରିକ୍ସ ପକ୍ଷରୁ ପହଲଗାମ ଆତଙ୍କବାଦୀ ଆକ୍ରମଣକୁ କଠୋର ଭାଷାରେ ନିନ୍ଦା କରାଯାଇଛି। ଏହା ସହିତ ଜାତିସଂଘ ନିରାପତ୍ତା ପରିଷଦର ସଂସ୍କାର ଓ ସେଥିରେ ଭାରତର ଅଧିକ ଗୁରୁତ୍ବପୂର୍ଣ୍ଣ ଭୂମିକାକୁ ବ୍ରିକ୍ସ ପକ୍ଷରୁ ସମର୍ଥନ କରାଯାଇଛି।
ବ୍ରିକ୍ସ ପକ୍ଷରୁ ଜାରି ମିଳିତ ଘୋଷାଣାନାମାର ପାରା ୩୪ରେ କୁହାଯାଇଛି, “ ଆମେ ୨୨ ଏପ୍ରିଲ ୨୦୨୫ରେ ଜମ୍ମୁ ଓ କଶ୍ମୀରରେ ହୋଇଥିବା ଆତଙ୍କବାଦୀ ଆକ୍ରମଣକୁ, ଯେଉଁଥିରେ ୨୬ ଜଣ ଲୋକ ପ୍ରାଣ ହରାଇଥିଲେ, କଠୋର ଭାଷାରେ ନିନ୍ଦା କରୁଛୁ। ଆମେ ଆତଙ୍କବାଦର ସବୁପ୍ରକାର ରୂପ ଓ ପ୍ରକାରର ମୁକାବିଲା ଲାଗି ଆମର ପ୍ରତିବଦ୍ଧତାକୁ ଦୋହରାଉଛୁ, ଯେଉଁଥିରେ ଅନ୍ତର୍ଭୁକ୍ତ ରହିଛି ସୀମାପାର ଆତଙ୍କବାଦ, ଆତଙ୍କବାଦୀଙ୍କୁ ପାଣ୍ଠିଯୋଗାଣ ଓ ଆତଙ୍କବାଦୀଙ୍କୁ ନିରାପଦ ଆଶ୍ରୟସ୍ଥଳ ଯୋଗାଇବା। ଆମେ ମଧ୍ୟ ଆତଙ୍କବାଦ ପ୍ରତି ଶୂନ୍ୟ ସହନଶୀଳତା ନିଶ୍ଚିତ କରିବାକୁ ଦାବି କରୁଛୁ ଓ ଆତଙ୍କବାଦର ମୁକାବିଲା ଦିଗରେ ଦୋମୁହାଁ ନୀତିକୁ ଖାରଜ କରୁଛୁ।“
ଏଥିରେ ଆହୁରି ମଧ୍ୟ କୁହାଯାଇଛି ଯେ ଜାତିସଂଘ ଫ୍ରେମଓ୍ବର୍କ ଅଧିନରେ ଅନ୍ତର୍ଜାତୀୟ ଆତଙ୍କବାଦ ସଂପର୍କିତ ବ୍ୟାପକ ସନନ୍ଦକୁ ଶୀଘ୍ର ଚୂଡ଼ାନ୍ତ ଏବଂ କାର୍ଯ୍ୟକାରୀ କରିବା ପାଇଁ ସଂଗଠନ ଆହ୍ୱାନ କରୁଛି। ଏହା ସହିତ ଜାତିସଂଘ ଦ୍ବାରା ଘୋଷିତ ସମସ୍ତ ଆତଙ୍କବାଦୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ପାଇଁ ବ୍ରିକ୍ସ ଆହ୍ବାନ ଜଣାଇଛି।
ଅନ୍ୟ ପକ୍ଷରେ ବ୍ରିକ୍ସ ଜାତିସଂଘ ନିରାପତ୍ତା ପରିଷଦର ସଂସ୍କାର ପାଇଁ ଦୃଢ ଦାବି ଜଣାଇଛି। ବ୍ରିକ୍ସ ମିଳିତ ଘୋଷଣାନାମାର ପାରା ୬ରେ କୁହାଯାଇଛି ଯେ ଜାତିସଂଘ ନିରାପତ୍ତା ପରିଷଦର ସଂସ୍କାରକୁ ସଂଗଠନ ସମର୍ଥନ କରୁଛି, ଯେପରିକି ଏହା ଅଧିକ ଗଣତାନ୍ତ୍ରିକ, ପ୍ରତିନିଧିମୂଳକ, ପ୍ରଭାବୀ ଓ ଦକ୍ଷ ହୋଇପାରିବ। ଆହୁରି ମଧ୍ୟ ଏଥିରେ ଯେପରି ବିକାଶଶୀଳ ଦେଶମାନଙ୍କ ଅଧିକ ପ୍ରତିନିଧିତ୍ବ ରହିପାରିବ ଯେପରିକି ତାହା ବର୍ତ୍ତମାନର ବୈଶ୍ବିକ ଆହ୍ବାନର ମୁକାବିଲା କରିପାରିବ ଓ ବ୍ରିକ୍ସ ଦେଶମାନଙ୍କ ସମେତ ଆଫ୍ରିକା, ଏସିଆ ଓ ଲାଟିନ ଆମେରିକାର ଦେଶମାନଙ୍କର ନ୍ୟାୟୋଚିତ ଆକାଂକ୍ଷାକୁ ପୂରଣ କରିପାରିବ।
ବ୍ରିକ୍ସ ଗୁରୁତ୍ବଆରୋପ କରିଛି ଯେ ଜାତିସଂଘ ନିରାପତ୍ତା ପରିଷଦର ସଂସ୍କାର ବିଶ୍ବ ଦକ୍ଷିଣର ସ୍ବରକୁ ମଝବୁତ କରିବ। ଏହା ସହିତ ନିରାପତ୍ତା ପରିଷଦ ସମେତ ସମଗ୍ର ଜାତିସଂଘରେ ଭାରତ ଓ ବ୍ରାଜିଲର ଅଧିକ ଭୂମିକା ନିର୍ବାହକୁ ସଂଗଠନ ସମର୍ଥନ ଜଣାଇଛି।
