ଭୁବନେଶ୍ବର: ବହୁ ବାଦବିବାଦ ପରେ ପୁଣି ଥରେ ବିଜେପି ମନମୋହନ ସାମଲଙ୍କ ଉପରେ ଭରସା କରିଛି। ଗତକାଲି ସେ ସଭାପତି ହେଲେ ବୋଲି ବିଧବଧଭାବେ ଘୋଷଣା କରାଯାଇଛି। ଫଳରେ ବିଭିନ୍ନ ନେତାମନ୍ତ୍ରୀ ତାଙ୍କୁ ସ୍ବାଗତ କରିଥିଲେ। ମନମୋହନ ମଧ୍ୟ ପ୍ରଭୃ ଜଗନ୍ନାଥଙ୍କ ଆର୍ଶିବାଦ ନେବା ପାଇଁ ଗତକାଲି ପୁରୀ ଗସ୍ତ କରିଥିଲେ।
ସଭାପତି ହେବା ପରେ ତାଙ୍କ ସମ୍ମୁଖରେ େରହିଛି ଏକ ବଡ ଚ୍ୟାଲେଞ୍ଜ। ଗତ ବିଧାନସଭା ନିର୍ବାଚନରେ ସେ ଯେପରି ନେତୃତ୍ବ ନେଇଥିଲେ ସେହିପରି ଆସନ୍ତା ପଞ୍ଚୟାତ ଏବଂ ପୌର ନିର୍ବାଚନ ତାଙ୍କ ମୁଣ୍ଡ ଉପରେ। ତାଙ୍କ ନେତୃତ୍ବରେ ବିଜେପି ତୃଣମୂଳ ନିର୍ବାଚନ ପ୍ରତିଦ୍ବନ୍ଦିତା କରିବ। ବିଧାନସଭା ପରି ପୌର ଓ ପଞ୍ଚାୟତ ନିର୍ବାଚନରେ ମଧ୍ୟ ଦଳ ଭଲ କରିବ ବୋଲି କର୍ମୀମାନେ ଆଶା ରଖିଛନ୍ତି।
ତେବେ ଏସବୁ ଭିତରେ ଖୋଦ ମନମୋହନଙ୍କ ଭାଗ୍ୟରେ କଣ ଅଛି ତାହାକୁ ନେଇ ବିଭିନ୍ନ ମହଲରେ ପ୍ରଶ୍ନ ସୃଷ୍ଟି ହୋଇଛି। କାରଣ ରାଜ୍ୟରେ ବିଜେପି ସରକାରକୁ ଆସିବା ପରେ ମନମୋହନଙ୍କୁ ରାଜ୍ୟ ଯୋଜନା ବୋର୍ଡର ଅଧ୍ୟକ୍ଷ କରାଯିବ ବୋଲି ଶୁଣାଗଲା। ହେଲେ ତାହା ହେଲା ନାହିଁ। ଏହାପରେ ସଭାପତି ନିର୍ବାଚନ ଆସିଯିବାରୁ ସେହି ସରକାରୀ ପଦବୀ ଉପରେ ଆଉ କାହାର ନଜର ରହିଲା ନାହିଁ।
କହିବାକୁ ଗଲେ ମନମୋହନ ଦଳର ମୁଖିଆ ହେଲେ ସତ କିନ୍ତୁ ସରକାରରେ ତାଙ୍କର କୌଣସି ଶକ୍ତି ନାହିଁ। କୌଣସି ସରକାରୀ କାର୍ଯ୍ୟକ୍ରମରେ ହେଉ କିମ୍ବା କୌଣସି ସରକାରୀ ଅଧିକାରୀଙ୍କୁ ନିର୍ଦ୍ଦେଶ ଦେବା ହେଉ ତାହା ମନମୋହନ କରିପାରିବେ ନାହିଁ। ଲୁଚାଛପାରେ କଲେ କରିପାରନ୍ତି ହେଲେ ତାହା ସରକାରୀ ନିର୍ଦ୍ଦେଶ ବୋଲି କେହି କହିପାରିବେ ନାହିଁ।
ମନମୋହନଙ୍କୁ ଯୋଜନା ବୋର୍ଡର ଅଧ୍ୟକ୍ଷ ନ କରାଇବା ପାଇଁଲକୁଆଡେ ଗୋଟିଏ ବଡ ଶକ୍ତି ବିରୋଧ କରୁଛି। ଫଳରେ ମନମୋହନଙ୍କ ପତା କଟିଗଲା ବୋଲି କୁହାଯାଉଛି। ସେହିପରି ଏଥର ସଭାପତି କିଏ ହେବ ସେ ନେଇ ବିଭିନ୍ନ ଚର୍ଚ୍ଚା ହେଲା। ମନମୋହନଙ୍କୁ ସଭାପତି ନ କରାଇବା ପାଇଁ କୁଆଡେ ସେହ ଗୋଷ୍ଠୀ ଲାଗିଥିଲେ ବୋଲି କୁହାଗଲା। ହେଲେ ଶେଷରେ ମନମୋହନଙ୍କ ବିଜୟ ହେଲା।
ଏବେ ପୁଣିଥରେ ସଭାପତି ହେବା ପରେ ବର୍ତ୍ତମାନ ମନମୋହନଙ୍କୁ ସରକାରୀ ପଦପଦବୀ ମିଳିବ କି ନାହିଁ ତାକୁ ନେଇ ଚର୍ଚ୍ଚା ଆରମ୍ଭ ହୋଇଯାଇଛି।