The Samikhsya Desk: ପାଖେଇଲା ଉପରାଷ୍ଟ୍ରପତି ନିର୍ବାଚନ। ଏହି ପଦବୀରେ ଥିବା ଜଗଦୀପ ଧନଖଡ ଇସ୍ତଫା ଦେବା ପରେ ତାହା ଖାଲି ଅଛି। ସେହି ଅନୁସାରେ ଭାରତ ନିର୍ବାଚନ କମିଶନର ଏହି ଉଚ୍ଚ ପଦବୀ ପାଇଁ ନିର୍ବାଚନ କରିବାକୁ ତାରିଖ ଘୋଷଣା କରିଛନ୍ତି।
ସେହି ଅନୁସାରେ ସେପ୍ଟେମ୍ବର ୯ ତାରିଖରେ ଉପରାଷ୍ଟ୍ରପତି ନିର୍ବାଚନ ହେବ। ସେଥିପାଇଁ ବର୍ତ୍ତମାନ ବିଜେପି ଓ ଏହାର ସହଯୋଗୀ ଦଳ ବେଶ ତତ୍ପର ହୋଇ ଉଠିଛନ୍ତି। ଆଜି ଏ ଏନଡିଏର ଏକ ବୈଠକ ଅଛି। ସେଥିରେ ଉପରାଷ୍ଟ୍ରପତି ପ୍ରାର୍ଥୀଙ୍କ ନାମ ଘୋଷଣା ହେବ ବୋଲି ଜଣାପଡିଛି।
ତେବେ ଏହି ଦୈଡରେ ଯେଉଁମାନେ ଅଛନ୍ତି ସେମାନେ ହେଲେ ଦିଲ୍ଲୀ ଉପରାଜ୍ୟପାଳ ଭି.କେ ସାକ୍ସେନା ଓ ବିହାର ରାଜ୍ୟପାଳ ଆରିଫ୍ ମହମ୍ମଦ ଖାନ୍ । ସେହିପରି ଗୁଜରାଟ ରାଜ୍ୟପାଳ ଆଚାର୍ଯ୍ୟ ଦେବବ୍ରତ, କର୍ଣ୍ଣାଟକ ରାଜ୍ୟପାଳ ଥାୱର ଚନ୍ଦ ଗେହଲଟ୍, ସିକ୍କିମ୍ ରାଜ୍ୟପାଳ ଓମ୍ ମାଥୁର, ଜାମ୍ମୁ କାଶ୍ମୀର ଉପରାଜ୍ୟପାଳ ମନୋଜ ସିହ୍ନାଙ୍କ ନାଁ ମଧ୍ୟ ଚର୍ଚ୍ଚାରେ ରହିଛି । ରାଜ୍ୟସଭା ଉପାଧ୍ୟକ୍ଷ ହରିବଂଶ ସିଂଙ୍କ ନାଁ ମଧ୍ୟ ଏନ୍ଡିଏ ପ୍ରାର୍ଥୀ ହେବା ନେଇ ଚର୍ଚ୍ଚା ଜୋର ଧରିଛି।
ଗତ ୭ ଅଗଷ୍ଟରେ ନିର୍ବାଚନ କମିଶନର ଏହି ନିର୍ବାଚନ ପାଇଁ ବିଜ୍ଞପ୍ତି ଜାରି କରିଛନ୍ତି। ନିର୍ବାଚନ କାର୍ଯ୍ୟସୂଚୀ ଅନୁସାରେ ୨୧ ଅଗଷ୍ଟ ନାମାଙ୍କନ ପାଇଁ ଶେଷ ତାରିଖ ରଖାଯାଇଛି। ୨୨ ଅଗଷ୍ଟ ପର୍ଯ୍ୟନ୍ତ ନାମାଙ୍କନ ପତ୍ର ଯାଞ୍ଚ କରାଯିବ। ପ୍ରାର୍ଥୀମାନେ ୨୫ ଅଗଷ୍ଟ ପର୍ଯ୍ୟନ୍ତ ସେମାନଙ୍କ ନାମ ପ୍ରତ୍ୟାହାର କରିପାରିବେ। ୯ ସେପ୍ଟେମ୍ବରରେ ନିର୍ବାଚନ ଅନୁଷ୍ଠିତ ହେବ। ସେହି ସନ୍ଧ୍ୟାରେ ଗଣତି ହେବ ଏବଂ ଫଳାଫଳ ମଧ୍ୟ ଘୋଷଣା କରାଯିବ।