ନୂଆଦିଲ୍ଲୀ: କେନ୍ଦ୍ର ଗୃହ ଏବଂ ସମବାୟ ମନ୍ତ୍ରୀ ଶ୍ରୀ ଅମିତ ଶାହ ଏକ ସମ୍ବାଦ ସଂସ୍ଥାକୁ ଦେଇଥିବା ଏକ ସାକ୍ଷାତକାରରେ ସମ୍ବିଧାନ (୧୩୦ତମ ସଂଶୋଧନ) ବିଲ୍ ୨୦୨୫ ସମେତ ଅନେକ ଗୁରୁତ୍ୱପୂର୍ଣ୍ଣ ପ୍ରସଙ୍ଗରେ ନିଜର ମତ ରଖିଥିଲେ। କେନ୍ଦ୍ର ସ୍ୱରାଷ୍ଟ୍ର ମନ୍ତ୍ରୀ କହିଥିଲେ ଯେ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ସ୍ପଷ୍ଟ ଭାବେ ବିଶ୍ୱାସ କରନ୍ତି ଯେ, ଦେଶର କୌଣସି ମନ୍ତ୍ରୀ, ମୁଖ୍ୟମନ୍ତ୍ରୀ କିମ୍ବା ପ୍ରଧାନମନ୍ତ୍ରୀ ଜେଲରୁ ସରକାର ଚଳାଇ ପାରିବେ ନାହିଁ।
ସମ୍ବିଧାନ (୧୩୦ ତମ ସଂଶୋଧନ) ବିଲ୍ ୨୦୨୫ ରେ ଏକ ବ୍ୟବସ୍ଥା ରହିଛି ଯେ ଯଦି ପ୍ରଧାନମନ୍ତ୍ରୀ, ମୁଖ୍ୟମନ୍ତ୍ରୀ, ଭାରତ ସରକାରଙ୍କ ମନ୍ତ୍ରୀ କିମ୍ବା ରାଜ୍ୟ ସରକାରଙ୍କ ମନ୍ତ୍ରୀ କୌଣସି ଗୁରୁତର ଅଭିଯୋଗରେ ଗିରଫ ହୁଅନ୍ତି ଏବଂ ୩୦ ଦିନ ମଧ୍ୟରେ ଜାମିନ ମଞ୍ଜୁର ନହୁଏ, ତେବେ ସେମାନଙ୍କୁ ସେମାନଙ୍କ ପଦରୁ ଅପସାରଣ କରାଯିବ। ସେ କହିଥିଲେ ଯେ ଯଦି ଏପରି ନହୁଏ, ତେବେ ସେମାନେ ଆଇନଗତ ଭାବେ ଛାଏଁ ଛାଏଁ ନିଜ ପଦରୁ ମୁକ୍ତ ହୋଇଯିବେ। ଶ୍ରୀ ଶାହ କହିଥିଲେ ଯେ ନିର୍ବାଚିତ ସରକାର ଦ୍ୱାରା ଗୃହ ସମ୍ମୁଖରେ କୌଣସି ବିଲ୍ କିମ୍ବା ସାମ୍ବିଧାନିକ ସଂଶୋଧନ ଉପସ୍ଥାପନକୁ ବିରୋଧୀମାନେ ବିରୋଧ କରିବା ଉଚିତ ନୁହେଁ।
ଶ୍ରୀ ଅମିତ ଶାହ କହିଥିଲେ ଯେ ସେ ନିଜେ ସ୍ପଷ୍ଟ କରିଛନ୍ତି ଯେ, ଏହି ସାମ୍ବିଧାନିକ ସଂଶୋଧନକୁ ଦୁଇ ସଦନର ମିଳିତ ସଂସଦୀୟ କମିଟିକୁ ପଠାଯିବ। ସେ କହିଛନ୍ତି ଯେ ଏହି ବିଲ୍ ପାସ୍ ହେବା ପାଇଁ ଦୁଇ ତୃତୀୟାଂଶ ସଂଖ୍ୟାଗରିଷ୍ଠତା ଆବଶ୍ୟକ ଏବଂ ଯେତେବେଳେ ଭୋଟ୍ ହେବ, ସମସ୍ତ ଦଳ ଏହା ଉପରେ ସେମାନଙ୍କର ମତାମତ ଦେଇପାରିବେ। ଶ୍ରୀ ଶାହ କହିଥିଲେ ଯେ ସରକାରଙ୍କ କୌଣସି ବିଲ୍ କିମ୍ବା ସମ୍ବିଧାନ ସଂଶୋଧନ ବିଲକୁ ଗୃହରେ ଉପସ୍ଥାପନ କରିବାକୁ ଅନୁମତି ନଦେବା ଗଣତନ୍ତ୍ରରେ ବିରୋଧୀଙ୍କ ଦ୍ୱାରା ପ୍ରଦର୍ଶିତ ଏକ ଉପଯୁକ୍ତ ଆଚରଣ ନୁହେଁ। ସେ କହିଥିଲେ ଯେ ଦେଶର ସଂସଦର ଉଭୟ ଗୃହ ବିତର୍କ ଏବଂ ଆଲୋଚନା ପାଇଁ ଉଦ୍ଦିଷ୍ଟ, ଗଣ୍ଡଗୋଳ ଏବଂ ହୋ ହଲ୍ଲା ପାଇଁ ନୁହେଁ। ଗୃହ ମନ୍ତ୍ରୀ କହିଛନ୍ତି ଯେ ଏହି ବିଲକୁ ଉପସ୍ଥାପନ କରିବାକୁ ଅନୁମତି ନଦେବା ଏହି ମାନସିକତା ଗଣତାନ୍ତ୍ରିକ ନୁହେଁ, ଏବଂ ବିରୋଧୀଙ୍କୁ ଏହି ଦେଶର ଲୋକଙ୍କୁ ସେମାନଙ୍କର କାର୍ଯ୍ୟକଳାପ ବ୍ୟାଖ୍ୟା କରିବାକୁ ପଡିବ।
କେନ୍ଦ୍ର ଗୃହ ଏବଂ ସମବାୟ ମନ୍ତ୍ରୀ କହିଛନ୍ତି ଯେ, ଏହି ବିଲ୍ କୌଣସି ବିରୋଧୀ ଦଳ ବିରୋଧରେ ନୁହେଁ ଏବଂ ଏହା ଆମ ମୁଖ୍ୟମନ୍ତ୍ରୀମାନଙ୍କୁ ମଧ୍ୟ ଏହାର ପରିସରଭୁକ୍ତ କରିଛି। ସେ କହିଛନ୍ତି ଯେ ସରକାରରେ ଥିବା ଲୋକଙ୍କ ବିରୋଧରେ ଏଫ୍ଆଇଆର୍ ଦାଖଲ କରାଯାଇ ନାହିଁ ବୋଲି କହି ବିରୋଧୀ ଜନସାଧାରଣଙ୍କୁ ବିଭ୍ରାନ୍ତ କରୁଛନ୍ତି। ସେ କହିଛନ୍ତି ଏକ ବ୍ୟବସ୍ଥା ରହିଛି ଯେ ଯଦି ୩୦ ଦିନ ମଧ୍ୟରେ ଜାମିନ ମଞ୍ଜୁର ହୁଏ, ତେବେ ବିଲ୍ ଅନୁଯାୟୀ କୌଣସି କାର୍ଯ୍ୟାନୁଷ୍ଠାନ ହେବ ନାହିଁ। ଆହୁରି ମଧ୍ୟ, ଯଦି କୌଣସି ମିଛ ମାମଲା ରହିଛି, ତେବେ ଜାମିନ ପ୍ରଦାନ କରିବା ପାଇଁ ଦେଶର ନ୍ୟାୟାଳୟ ରହିଛି।
ଶ୍ରୀ ଶାହ କହିଥିଲେ ଯେ, ଯେକୌଣସି ପରିସ୍ଥିତିରେ ହାଇକୋର୍ଟ ଏବଂ ସର୍ବୋଚ୍ଚ ନ୍ୟାୟାଳୟର ଜାମିନ ମଞ୍ଜୁର କରିବାର ଅଧିକାର ରହିଛି ଏବଂ ଯଦି ଜାମିନ ମଞ୍ଜୁର ନହୁଏ, ତେବେ ସେହି ବ୍ୟକ୍ତିଙ୍କୁ ଇସ୍ତଫା ଦେବାକୁ ପଡ଼ିବ। ସେ ପ୍ରଶ୍ନ କରିଛନ୍ତି ଯେ କୌଣସି ମୁଖ୍ୟମନ୍ତ୍ରୀ, ପ୍ରଧାନମନ୍ତ୍ରୀ କିମ୍ବା ମନ୍ତ୍ରୀ ଜେଲରେ ଥିବାବେଳେ ସରକାର ଚଳାଇବା ଉଚିତ୍ କି? ଏହା କ’ଣ ଦେଶର ଗଣତନ୍ତ୍ର ପାଇଁ ଶୁଭଙ୍କର ? ସେ କହିଛନ୍ତି ଯେ ଯଦି ୩୦ ଦିନ ପରେ ଜାମିନ ମଞ୍ଜୁର ହୁଏ, ତେବେ ସେମାନେ ପୁନର୍ବାର ଶପଥ ନେଇପାରିବେ।
କେନ୍ଦ୍ର ଗୃହ ମନ୍ତ୍ରୀ କହିଥିଲେ ଯେ ଜେଲ ବ୍ୟବସ୍ଥା ଆମ ସରକାର ଦ୍ୱାରା କରାଯାଇ ନଥିଲା, ଏହା ବର୍ଷ ବର୍ଷ ଧରି ଚାଲୁ ରହିଛି। ସେ କହିଥିଲେ ଯେ ୧୩୦ତମ ସମ୍ବିଧାନ ସଂଶୋଧନରେ ଗମ୍ଭୀର ଅପରାଧକୁ ପରିଭାଷିତ କରାଯାଇଛି, ଯେଉଁଥିରେ ୫ ବର୍ଷରୁ ଅଧିକ ଦଣ୍ଡର ବ୍ୟବସ୍ଥା ରହିଛି, ସେତେବେଳେ ସେହି ବ୍ୟକ୍ତିଙ୍କୁ ଇସ୍ତଫା ଦେବାକୁ ପଡ଼ିବ। ଦୁର୍ନୀତି କିମ୍ବା ୫ ବର୍ଷରୁ ଅଧିକ କାରାଦଣ୍ଡର ଦଣ୍ଡନୀୟ ଅପରାଧରେ ଅଭିଯୁକ୍ତ ମନ୍ତ୍ରୀ, ମୁଖ୍ୟମନ୍ତ୍ରୀ କିମ୍ବା ପ୍ରଧାନମନ୍ତ୍ରୀମାନେ ଜେଲରୁ ସରକାର ଚଳାଇବା ଠିକ୍ ନୁହେଁ।
ସେ କହିଥିଲେ ଯେ ଆଜି ମଧ୍ୟ ଭାରତର ଲୋକ ପ୍ରତିନିଧି ଆଇନରେ ଏକ ବ୍ୟବସ୍ଥା ରହିଛି ଯେ, ଯଦି କୌଣସି ନିର୍ବାଚିତ ପ୍ରତିନିଧିଙ୍କୁ ଦୁଇ ବର୍ଷ କିମ୍ବା ତା’ ଠାରୁ ଅଧିକ କାରାଦଣ୍ଡରେ ଦଣ୍ଡିତ କରାଯାଏ, ତେବେ ତାଙ୍କୁ ସାଂସଦ ପଦରୁ ମୁକ୍ତ କରାଯିବ। ସେ କହିଥିଲେ ଯେ ନୈତିକତା ଆଧାର ନିର୍ଦ୍ଧାରଣ କରିବା ପାଇଁ ସ୍ୱାଧୀନତା ପରଠାରୁ ଏହି ଆଇନ ପ୍ରଚଳିତ ରହିଛି। ଶ୍ରୀ ଶାହ କହିଥିଲେ ଯେ ଅନେକ ଲୋକଙ୍କ ସଦସ୍ୟତା ରଦ୍ଦ କରାଯାଇଥିଲା ଏବଂ ନିର୍ଦ୍ଦୋଷରେ ଖଲାସ ହେବା ପରେ ସେମାନଙ୍କୁ ପୁନଃଥଇଥାନ କରାଯାଇଥିଲା।
ଶ୍ରୀ ଅମିତ ଶାହ କହିଥିଲେ ଯେ ସ୍ୱାଧୀନତା ପରଠାରୁ ଅନେକ ନେତା, ମନ୍ତ୍ରୀ ଏବଂ ମୁଖ୍ୟମନ୍ତ୍ରୀ ଇସ୍ତଫା ଦେଇ ଜେଲ୍ ଯାଇଛନ୍ତି। କିନ୍ତୁ ଏବେ ଏହି ଧାରା ଆରମ୍ଭ ହୋଇଛି ଯେ ଜେଲ ଯିବା ପରେ ମଧ୍ୟ ସେମାନେ ଇସ୍ତଫା ଦେଉନାହାନ୍ତି। ତାମିଲନାଡ଼ୁର କେତେକ ମନ୍ତ୍ରୀ, ଏବଂ ଦିଲ୍ଲୀର ମୁଖ୍ୟମନ୍ତ୍ରୀ ଏବଂ ମନ୍ତ୍ରୀମାନେ ଇସ୍ତଫା ଦେଇନଥିଲେ। ସେ କହିଲେ ଯେ ସରକାରଙ୍କ ସଚିବ, ଡିଜିପି, ମୁଖ୍ୟ ସଚିବ ଆଦେଶ ପାଇବା ପାଇଁ ଜେଲରେ ସେମାନଙ୍କ ପାଖକୁ ଯିବେ କି? ଶ୍ରୀ ଶାହ କହିଥିଲେ ଯେ ଏହି ପ୍ରସଙ୍ଗରେ ଚିନ୍ତା ଏବଂ ଆଲୋଚନା ହେବା ଉଚିତ।
କେନ୍ଦ୍ର ଗୃହ ଏବଂ ସମବାୟ ମନ୍ତ୍ରୀ କହିଛନ୍ତି ଯେ ପ୍ରଧାନମନ୍ତ୍ରୀ ମୋଦୀ ନିଜେ ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟକୁ ଏହି ସାମ୍ବିଧାନିକ ସଂଶୋଧନ ପରିସରଭୁକ୍ତ କରିଛନ୍ତି। ସେ କହିଛନ୍ତି ଯେ ମୁଖ୍ୟ ବିରୋଧୀ ଦଳର ତତ୍କାଳୀନ ପ୍ରଧାନମନ୍ତ୍ରୀ ୩୯ ତମ ସାମ୍ବିଧାନିକ ସଂଶୋଧନ ଆଣିଥିଲେ ଯେଉଁଥିରେ ସେ ରାଷ୍ଟ୍ରପତି ଏବଂ ଉପରାଷ୍ଟ୍ରପତିଙ୍କ ସହ ମକଦ୍ଦମା ପରିସରରୁ ନିଜକୁ ଦୂରେଇ ରଖିଥିଲେ। ଶ୍ରୀ ଶାହ କହିଥିଲେ ଯେ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ନିଜେ ଏକ ସାମ୍ବିଧାନିକ ସଂଶୋଧନ ଆଣିଥିଲେ, ଯେଉଁଥିରେ କୁହାଯାଇଥିଲା ଯେ ଯଦି ପ୍ରଧାନମନ୍ତ୍ରୀଙ୍କୁ ଜେଲ୍ ପଠାଯାଏ, ତେବେ ତାଙ୍କୁ ମଧ୍ୟ ଇସ୍ତଫା ଦେବାକୁ ପଡ଼ିବ। ସେ କହିଛନ୍ତି ଯେ ଏହି ଆଇନ ଅଦାଲତରେ କୌଣସି ବିଳମ୍ବ ହେବ ନାହିଁ କାରଣ କୋର୍ଟଙ୍କୁ ତୁରନ୍ତ ହସ୍ତକ୍ଷେପ କରିବାକୁ ପଡିବ। ଏହାଦ୍ୱାରା ତ୍ୱରିତ ନିଷ୍ପତ୍ତି ହେବ, କାରଣ ଆମ ଅଦାଲତ ମଧ୍ୟ ଆଇନର ଗମ୍ଭୀରତାକୁ ବୁଝନ୍ତି।
ଶ୍ରୀ ଅମିତ ଶାହ କହିଥିଲେ ଯେ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଜୀ ସ୍ପଷ୍ଟ ଭାବେ ବିଶ୍ୱାସ କରନ୍ତି ଯେ ଦେଶର କୌଣସି ମନ୍ତ୍ରୀ, ମୁଖ୍ୟମନ୍ତ୍ରୀ କିମ୍ବା ପ୍ରଧାନମନ୍ତ୍ରୀ ଜେଲରେ ରହି ସରକାର ଚଳାଇ ପାରିବେ ନାହିଁ। ସେ କହିଥିଲେ ଯେ ଯେତେବେଳେ ସମ୍ବିଧାନ ତିଆରି ହୋଇଥିଲା, ସେତେବେଳେ ସମ୍ବିଧାନ ପ୍ରଣେତାମାନେ କଳ୍ପନା କରିନଥିଲେ ଯେ କୌଣସି ମୁଖ୍ୟମନ୍ତ୍ରୀ ଜେଲ୍ ଯିବେ ଏବଂ ମୁଖ୍ୟମନ୍ତ୍ରୀ ହୋଇ ରହିବେ।
ସେ କହିଥିଲେ ଯେ ଆମେ ଆମର ନୈତିକ ମୂଲ୍ୟବୋଧର ସ୍ତରକୁ ତଳକୁ ଖସିଯିବାକୁ ଦେବା ଉଚିତ ନୁହେଁ। ଏହି ଆଇନ ନୈତିକ ମୂଲ୍ୟବୋଧର ସ୍ତରକୁ ଏକ ଆଧାର ଦେବ ଏବଂ ନିଶ୍ଚିତ ଭାବରେ ଆମ ଗଣତନ୍ତ୍ରକୁ ମଜବୁତ କରିବ। ସେ କହିଥିଲେ ଯେ ଆମର ନ୍ୟାୟାଳୟଗୁଡ଼ିକ ସମ୍ବେଦନଶୀଳ ଏବଂ ଯେତେବେଳେ କେହି ନିଜର ପଦବୀ ହରାଇପାରନ୍ତି, ସେତେବେଳେ ନିଶ୍ଚିତ ଭାବେ ନ୍ୟାୟାଳୟ ନିର୍ଦ୍ଧାରିତ ସମୟସୀମା ମଧ୍ୟରେ ଜାମିନ ଉପରେ ନିଷ୍ପତ୍ତି ନେବେ।
କେନ୍ଦ୍ର ଗୃହ ମନ୍ତ୍ରୀ କହିଛନ୍ତି ଯେ ମୁଖ୍ୟ ବିରୋଧୀ ଦଳ ପ୍ରତିହିଂସା ବିଷୟରେ କହିବା ଉପଯୁକ୍ତ ନୁହେଁ। ସେ କହିଛନ୍ତି ଯେ ବିରୋଧୀ ସରକାର ସମୟରେ ଅତି କମରେ ୧୨ଟି ମାମଲାରେ ଅଦାଲତଙ୍କ ନିର୍ଦ୍ଦେଶ ପରେ ସିବିଆଇ ତଦନ୍ତ କରାଯାଇଥିଲା ଏବଂ ଅନେକ ଲୋକ ଫଶି ଯାଇଥିଲେ। ସେ କହିଛନ୍ତି ଯେ ପ୍ରସ୍ତାବିତ ଆଇନ ଉପରେ ଜେପିସି ଗଠନ ନିଷ୍ପତ୍ତି ପରେ ମଧ୍ୟ ଯଦି କୌଣସି ଦଳ ଏହାକୁ ବର୍ଜନ କରନ୍ତି, ତେବେ ସରକାରଙ୍କ ସମ୍ମୁଖରେ ଅନ୍ୟ କୌଣସି ବିକଳ୍ପ ଉପଲବ୍ଧ ନାହିଁ। ଶ୍ରୀ ଶାହ କହିଥିଲେ ଯେ ଏହି ବିଲ୍ ଗୁରୁତ୍ୱପୂର୍ଣ୍ଣ ଏବଂ ସମସ୍ତ ଦଳର ସଦସ୍ୟଙ୍କ ସହ ପରାମର୍ଶ କରିବା ପରେ ଜେପିସି ଆଗରେ ଏକ ବିଚାରଯୋଗ୍ୟ ମତାମତ ରଖିବା ଉଚିତ।
ସେ କହିଥିଲେ ଯେ ସରକାର ବିରୋଧୀ ଦଳକୁ ନିଜର ମତ ଉପସ୍ଥାପନ କରିବା ପାଇଁ ସୁଯୋଗ ଦେଉଛନ୍ତି, କିନ୍ତୁ ଲାଗୁଛି ଯେ ବିରୋଧୀ ଦଳ ନିଜର ମତ ଉପସ୍ଥାପନ କରିବାକୁ ଚାହୁଁନାହାନ୍ତି, ଏବଂ ଦେଶର ଲୋକମାନେ ଏହାର ସାକ୍ଷୀ ହେଉଛନ୍ତି। ଗୃହ ମନ୍ତ୍ରୀ କହିଥିଲେ ଯେ ଯଦି କେହି ଦୁର୍ନୀତିରେ ବୁଡ଼ି ରହିବେ, ତେବେ ତାଙ୍କୁ ଗିରଫ କରାଯିବ, ଜେଲ୍ ଯିବାକୁ ପଡ଼ିବ ଏବଂ ଇସ୍ତଫା ମଧ୍ୟ ଦେବାକୁ ପଡ଼ିବ।
ଶ୍ରୀ ଅମିତ ଶାହ କହିଥିଲେ ଯେ ବିରୋଧୀ ଦଳ ତାଙ୍କୁ ନୈତିକତା ଶିକ୍ଷାଇବା ଉଚିତ୍ ନୁହେଁ। ଶ୍ରୀ ଶାହ କହିଥିଲେ ଯେ ଯେତେବେଳେ ତାଙ୍କୁ ଅଭିଯୁକ୍ତ କରାଯାଇଥିଲା ଏବଂ ସିବିଆଇ ତାଙ୍କୁ ସମନ ପଠାଇଥିଲା, ତା’ ପରଦିନ ହିଁ ସେ ଇସ୍ତଫା ଦେଇଥିଲେ। ମାମଲା ଚାଲିଲା ଏବଂ ରାୟ ମଧ୍ୟ ଆସିଲା ଯେ ସେ ସମ୍ପୂର୍ଣ୍ଣ ନିର୍ଦ୍ଦୋଷ। ସେ କହିଥିଲେ ଯେ ଏହି ରାୟରେ କୁହାଯାଇଛି ଯେ, ଏହା ସମ୍ପୂର୍ଣ୍ଣ ଭାବେ ରାଜନୈତିକ ପ୍ରତିଶୋଧର ମାମଲା ଏବଂ ଏହି ମାମଲାରେ ତାଙ୍କର କୌଣସି ସମ୍ପୃକ୍ତି ନାହିଁ।
ଶ୍ରୀ ଶାହ କହିଥିଲେ ଯେ ତାଙ୍କୁ ସନ୍ଦେହ ଆଧାରରେ ଦୋଷମୁକ୍ତ କରାଯାଇ ନାହିଁ, କିନ୍ତୁ ତାଙ୍କ ବିରୋଧରେ ଥିବା ମାମଲା ଖାରଜ କରିଦିଆଯାଇଛି। ଶ୍ରୀ ଶାହ କହିଥିଲେ ଯେ ତାଙ୍କୁ ୯୬ତମ ଦିନରେ ଜାମିନ ପ୍ରଦାନ କରାଯାଇଥିଲା, ତଥାପି ସେ ଗୃହମନ୍ତ୍ରୀ ହେବା ପାଇଁ ଶପଥ ଗ୍ରହଣ କରିନଥିଲେ। କେବଳ ଏତିକି ନୁହେଁ, ତାଙ୍କ ବିରୋଧରେ ଥିବା ସମସ୍ତ ଅଭିଯୋଗ ଖାରଜ ନହେବା ପର୍ଯ୍ୟନ୍ତ ସେ କୌଣସି ସାମ୍ବିଧାନିକ ପଦବୀ ପାଇଁ ଶପଥ ନେଇ ନଥିଲେ।
ଶ୍ରୀ ଅମିତ ଶାହ କହିଥିଲେ ଯେ ନୈତିକତାର ମାନଦଣ୍ଡ ନିର୍ବାଚନୀ ବିଜୟ କିମ୍ବା ପରାଜୟ ସହିତ ଜଡିତ ନୁହେଁ; ବରଂ ଏହା ସୂର୍ଯ୍ୟ ଏବଂ ଚନ୍ଦ୍ରଙ୍କ ପରି ସର୍ବଦା ସ୍ଥିର ରହିଥାଏ। ସେ କହିଥିଲେ ଯେ ଆମର ସମସ୍ତ ସହଯୋଗୀ ଏହି ଆଇନ ସହ ସମ୍ପୂର୍ଣ୍ଣ ସହମତ। ଶ୍ରୀ ଶାହ କହିଥିଲେ ଯେ ସଂସଦ କିପରି କାର୍ଯ୍ୟ କରିବ ତାହା କେବଳ ଶାସକ ଦଳ ନିଷ୍ପତ୍ତି ନେଉନି। ଯଦି ବିରୋଧୀ କୌଣସି ବିଲ୍ କିମ୍ବା ସାମ୍ବିଧାନିକ ସଂଶୋଧନ ପାଇଁ ଏକ ସୁସ୍ଥ ପରିବେଶ ସୃଷ୍ଟି କରନ୍ତି ନାହିଁ, ତେବେ ଦେଶର ଲୋକମାନେ ଏସବୁ ଦେଖୁଛନ୍ତି। ସେ ଆତ୍ମବିଶ୍ୱାସ ବ୍ୟକ୍ତ କରିଥିଲେ ଯେ ଏହି ବିଲ୍ ପାରିତ ହେବ ଏବଂ ବିରୋଧୀ ଦଳରେ ଅନେକ ଲୋକ ରହିବେ ଯେଉଁମାନେ ନୈତିକତା ଆଧାରରେ ଏହାକୁ ସମର୍ଥନ କରିବେ।