ନୂଆଦିଲ୍ଲୀ: ଭାରତୀୟ ଦଳ ମହିଳା ଏକଦିବସୀୟ ବିଶ୍ୱକପ୍ 2025 ର ସେମିଫାଇନାଲ୍ ରେ ସ୍ଥାନ ସୁରକ୍ଷିତ କରିଛି। ଆଜି ଡିୱାଇ ପାଟିଲ ଷ୍ଟାଡିୟମରେ ନ୍ୟୁଜିଲାଣ୍ଡ ବିପକ୍ଷରେ ଖେଳାଯାଇଥିବା ମ୍ୟାଚ୍ ରେ ଟିମ୍ ଇଣ୍ଡିଆ ଡିଏଲଏସ୍ ଅଧୀନରେ ପ୍ରତିପକ୍ଷକୁ 53 ରନରେ ପରାସ୍ତ କରିଛି। ଓପନର ସ୍ମୃତି ମନ୍ଧାନା ଏବଂ ପ୍ରତୀକା ରାୱଲ ଶତକ ହାସଲ କରି ଦଳର ବିଜୟରେ ଗୁରୁତ୍ୱପୂର୍ଣ୍ଣ ଅବଦାନ ରଖିଥିଲେ।
ପ୍ରତୀକା 134 ବଲ୍ ରେ 13 ଚୌକା ଏବଂ 2 ଛକା ସହାୟତାରେ 122 ରନ କରିଥିଲେ। ମନ୍ଧାନା 95 ବଲ୍ ରେ 10 ଚୌକା ଏବଂ 4 ଛକା ସହିତ 109 ରନ କରିଥିଲେ। ଉଭୟ ପ୍ରଥମ ୱିକେଟ୍ ପାଇଁ (201 ବଲ୍) 212 ରନର ଭାଗୀଦାରି କରିଥିଲେ, ଯାହା ଦଳକୁ 49 ଓଭରରେ 340 ରନର ବିଶାଳ ସ୍କୋରରେ ପହଞ୍ଚିବାରେ ସାହାଯ୍ୟ କରିଥିଲା।
ବର୍ଷା ବାଧାପ୍ରାପ୍ତ ମ୍ୟାଚରେ ନ୍ୟୁଜିଲାଣ୍ଡ ଦଳକୁ 44 ଓଭରରେ 325 ରନ ଟାର୍ଗେଟ ଥିଲା। ଯାହା ସେମାନେ 8 ୱିକେଟ ହରାଇ ନିର୍ଦ୍ଧାରିତ 44 ଓଭରରେ 271 ରନ କରିପାରିଥିଲା। ଯାହାଫଳରେ ନ୍ୟୁଜିଲାଣ୍ଡ ଦଳ 53 (DLS) ରନରେ ଭାରତଠାରୁ ପରାସ୍ତ ହୋଇଥିଲା।
