ନୂଆଦିଲ୍ଲୀ: ଅଷ୍ଟ୍ରେଲିଆ ବିପକ୍ଷରେ ଦ୍ୱିତୀୟ ଟି-୨୦ରେ ହାରିବା ଏବଂ ସିରିଜରେ ୧-୦ ପଛରେ ପଡ଼ିବା ପରେ ଭାରତୀୟ ଦଳ ଉପରେ ଅନେକ ପ୍ରଶ୍ନ ଉଠିଛି। ଅଧିକାଂଶ ପୂର୍ବତନ ଖେଳାଳି ଭାରତୀୟ ଏକାଦଶର ମିଶ୍ରଣକୁ ନେଇ ଚିନ୍ତିତ ଥିଲେ। କେହି ବୁଝିପାରି ନଥିଲେ ଯେ, ପେସର ଅର୍ଶଦୀପ ସିଂହଙ୍କୁ କାହିଁକି ସାଇଡ୍ ଲାଇନ୍ କରାଯାଇଥିଲା ଏବଂ MCGରେ ଅନୁକୂଳ ପରିସ୍ଥିତିରେ ଦୁଇ ସ୍ପିନରଙ୍କୁ ଖେଳାଯାଇଥିଲା। ଭାରତୀୟ ବିଶେଷଜ୍ଞମାନେ ପୂର୍ବରୁ ପ୍ରଶ୍ନ ଉଠାଇଥିବାବେଳେ ପୂର୍ବତନ କଙ୍ଗାରୁ ଅଧିନାୟକ ଆରୋନ ଫିଞ୍ଚ ମଧ୍ୟ ବୁଝିପାରୁ ନଥିଲେ ଯେ ଅର୍ଶଦୀପ ସିଂହଙ୍କୁ କାହିଁକି ସାମିଲ କରାଯାଇ ନାହିଁ। ଆରୋନ ଫିଞ୍ଚ ଜିଓଷ୍ଟାରରେ କହିଛନ୍ତି ଯେ, “ଯଦି ବାମହାତୀ ଦ୍ରୁତ ବୋଲର ଅର୍ଶଦୀପ ସିଂହ ରବିବାର ହୋବାର୍ଟରେ ତୃତୀୟ ମ୍ୟାଚ୍ ପାଇଁ ପ୍ଲେଇଂ ଇଲେଭେନକୁ ଫେରିବେ ନାହିଁ ତେବେ ମୁଁ ବହୁତ ଆଶ୍ଚର୍ଯ୍ୟ ହେବି। ଅର୍ଶଦୀପ ସିଂହ ଦଳରେ ରହିବା ଉଚିତ।”
ସେ କହିଛନ୍ତି ଯେ, “ଟି-୨୦ କ୍ରିକେଟ ବିଷୟରେ ମୁଁ ଗୋଟିଏ କଥା ଶିଖିଛି ଯେ, ଯେତେବେଳେ ଆପଣ ବହୁତ ବ୍ୟାଟସମ୍ୟାନଙ୍କ ସହିତ ଖେଳନ୍ତି, କେତେକ ସମୟରେ ଦାୟିତ୍ୱ ହ୍ରାସ ପାଏ। ବ୍ୟାଟସମ୍ୟାନମାନେ ଭାବନ୍ତି ଯେ, ଅନ୍ୟ କେହି କାମ କରିବେ। କିନ୍ତୁ ଯଦି ଆପଣ ଜଣେ ବ୍ୟାଟସମ୍ୟାନଙ୍କୁ କମ୍ ଖେଳାନ୍ତି, ତେବେ ସମସ୍ତଙ୍କ ଉପରେ ଗୁରୁତ୍ଵ ବଢିଯାଏ। ଭାରତର ଧ୍ୟାନ ସ୍ପଷ୍ଟ ଭାବରେ ବିଶ୍ୱକପ୍ ଉପରେ ରହିଛି, ଏବଂ ଏହି ସିରିଜ୍ ସେହି ଟୁର୍ଣ୍ଣାମେଣ୍ଟ ଜିତିବା ପାଇଁ ସଠିକ୍ ମିଶ୍ରଣ ଖୋଜିବା ପ୍ରକ୍ରିୟାର ଏକ ଅଂଶ।”
ଦ୍ୱିତୀୟ ମ୍ୟାଚ୍ ରେ ଭାରତର ବୋଲିଂ ବିଷୟରେ ଫିଞ୍ଚ୍ କହିଛନ୍ତି ଯେ, “ଯଦି ଆଉ କିଛି ରନ କରାଯାଇଥାନ୍ତା, ତେବେ ଚାପ ଭିନ୍ନ ହୋଇଥାନ୍ତା। ବୁମରାହଙ୍କ ପ୍ରଥମ ଓଭର ପ୍ରକୃତରେ ଭଲ ଥିଲା ଏବଂ ସେ ଅଷ୍ଟ୍ରେଲୀୟ ଓପନରମାନଙ୍କୁ ଟିକେ ଅସୁବିଧାରେ ପକାଇଥିଲେ। ବୋଲରମାନଙ୍କ ପାଇଁ ବୋର୍ଡରେ ପର୍ଯ୍ୟାପ୍ତ ରନ ନଥିଲା। ଏହି ଟାର୍ଗେଟ ଯଥେଷ୍ଟ ନଥିଲା। କିଛି ଅତିରିକ୍ତ ରନ ମ୍ୟାଚ୍ କୁ ଅଧିକ ଆକର୍ଷଣୀୟ କରିପାରିଥାନ୍ତା।”
