Delhi Car Blast Update:ଦିଲ୍ଲୀ ଲାଲକିଲ୍ଲା ନିକଟରେ ହୋଇଥିବା ଆତ୍ମଘାତି କାର ବିସ୍ପୋରଣ ସାରା ଦେଶକୁ ଦୋହଲାଇ ଦେଇଛି। ଏହି ବିସ୍ପୋରଣ ଏତେ ଭୟଙ୍କର ଥିଲା ଯେ, ତାହା ଦୁଇ କିଲୋମିଟର ପର୍ଯ୍ୟନ୍ତ ସବୁକିଛି ଦୋହଲାଇ ଦେଇଥିଲା। ଏହି ବିସ୍ପୋରଣ ପରେ ତଦନ୍ତକାରୀ ସଂସ୍ଥା ଏନଆଇଏ ବିଭିନ୍ନ ଦିଗକୁ ତଦନ୍ତ କରି ଏହାର ସୁରାକ ପାଇସାରିଛି। ଏହି ବିସ୍ଫୋରଣର ଅନ୍ୟତମ ସନ୍ଦିଗ୍ଧ ମୁଜାମିଲ ସକିଲ ସହିତ ଓଡିଶାର ଜଣେ ଜମାତି ସଂପର୍କରେ ଥିଲେ ବୋଲି ଜଣାପଡିଛି।
ସେମାନଙ୍କୁ ତଦନ୍ତକାରୀ ସଂସ୍ଥା ପଚରାଉଚୁରା ଆରମ୍ଭ କରିଛି। ଏଥିରେ ଜଣାପଡିଛି ଯେ, ଏମାନେ ସକିଲ ସହିତ ହ୍ବାଟସପ ଚାଟିଂ କରିଥିଲେ। ହେଲେ ସେମାନେ ପରବର୍ତ୍ତି ସମୟରେ ତାହାକୁ ଡିଲିଟ କରିଦେଇଛନ୍ତି। ଯାହାକୁ ନେଇ ତଦନ୍ତକାରୀ ସଂସ୍ଥାର ସନ୍ଦେହ ବୃଦ୍ଧି ପାଇଛି। ତେବେ ସେମାନେ କିଏ ସେ ନେଇ ଏନଆଇଏ କୌଣସି ସୂଚନା ପ୍ରଦାନ କରି ନାହିଁ। ଏ ସଂପର୍କରେ ଜାତୀୟ ଗଣମାଧ୍ୟମରେ ଖବର ପ୍ରକାଶ ପାଇଛି। ଏଥିରେ ଓଡିଶା, ତାମିଲନାଡୁ, ଜମ୍ମୁକାଶ୍ମୀର ଓ ହରିୟାନର ଜଣେ ଲେଖାଏଁ ଚାରିଜଣଙ୍କୁ ପଚରାଉଚୁରା ଜାରୀ ରହିଛି। ଏହି ଖବର ଜଣାପଡିବା ପରେ ଓଡିଶାରେ ସୁରକ୍ଷା ବ୍ୟବସ୍ଥା କଡାକଡି କରାଯାଇଛି।