ନୂଆଦିଲ୍ଲୀ: ସଂସଦର ବଜେଟ ଅଧିବେଶନ ସମୟରେ ଆଜି ଲୋକସଭାରେ ଏକ ଅସାଧାରଣ ପରିସ୍ଥିତି ଦେଖାଦେଇଥିଲା। ୨୦୦୪ ପରେ ପ୍ରଥମ ଥର ପାଇଁ ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କ ଅଭିଭାଷଣ ଉପରେ ପ୍ରଧାନମନ୍ତ୍ରୀଙ୍କ ଉତ୍ତର ବିନା ଧନ୍ୟବାଦ ପ୍ରସ୍ତାବ ଗୃହୀତ ହୋଇଥିଲା। ନିରନ୍ତର ହଟ୍ଟଗୋଳ ଏବଂ ବିରୋଧୀଙ୍କ ବିରୋଧ ମଧ୍ୟରେ ବାଚସ୍ପତି ଏହି ପ୍ରସ୍ତାବକୁ ସ୍ୱର ଭୋଟ ଦ୍ୱାରା ଅନୁମୋଦନ କରିଥିଲେ।
ବୁଧବାର ରାଷ୍ଟ୍ରପତିଙ୍କ ଅଭିଭାଷଣ ଉପରେ ଧନ୍ୟବାଦ ପ୍ରସ୍ତାବର ଉତ୍ତର ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଦେବାର କାର୍ଯ୍ୟକ୍ରମ ଥିଲା। କିନ୍ତୁ ବିରୋଧୀ ସାଂସଦମାନଙ୍କ ନିରନ୍ତର ସ୍ଲୋଗାନ ଏବଂ ବାଧା ସୃଷ୍ଟି ହେବାରୁ ବାଚସ୍ପତି ଲୋକସଭାକୁ ମୁଲତବୀ କରିଥିଲେ।
ହଟ୍ଟାଗୋଳ ମଧ୍ୟରେ ସ୍ୱର ଭୋଟ ଦ୍ୱାରା ପ୍ରସ୍ତାବ ଗୃହୀତ
ଲୋକସଭା ବାଚସ୍ପତି ଓମ୍ ବିର୍ଲା ଜାନୁଆରୀ ୨୮ ତାରିଖରେ ସଂସଦର ମିଳିତ ଅଧିବେଶନରେ ରାଷ୍ଟ୍ରପତିଙ୍କ ଅଭିଭାଷଣ ଉପରେ ଧନ୍ୟବାଦ ପ୍ରସ୍ତାବ ପାଠ କରିଥିଲେ। ବିରୋଧୀଙ୍କ ହଟ୍ଟଗୋଳ ମଧ୍ୟରେ ଏହା ସ୍ୱର ଭୋଟ ଦ୍ୱାରା ଗୃହୀତ ହୋଇଥିଲା।
ବିରୋଧୀଙ୍କ ବିରୋଧ ଜାରି, ଗୃହ ମୁଲତବୀ
ବିରୋଧୀଙ୍କ ବିରୋଧ ପ୍ରଦର୍ଶନ ଥମିବାର କୌଣସି ସଙ୍କେତ ନମିଳିବାରୁ ବାଚସ୍ପତି ଗୃହକୁ ଅପରାହ୍ନ ୨ଟା ପର୍ଯ୍ୟନ୍ତ ମୁଲତବୀ ରଖିଥିଲେ। ଗୁରୁବାର ଦିନ ପୂର୍ବାହ୍ନ ୧୧ଟାରେ ଆରମ୍ଭ ହୋଇଥିବା କାର୍ଯ୍ୟବାହୀକୁ ମଧ୍ୟ କିଛି ସମୟ ପରେ ମୁଲତବୀ ରଖିବାକୁ ପଡିଲା।
ରାହୁଲ ଗାନ୍ଧୀଙ୍କୁ କହିବାକୁ ଅନୁମତି ନଦେବା ପ୍ରସଙ୍ଗ
ବିରୋଧୀ ଦଳର ନେତା ରାହୁଲ ଗାନ୍ଧୀଙ୍କୁ ଲୋକସଭାରେ କହିବାକୁ ସୁଯୋଗ ନଦେବା ପ୍ରସଙ୍ଗ ଉଠାଇଥିଲେ। ବିରୋଧୀ ଦଳ ଅଭିଯୋଗ କରିଛି ଯେ, ସରକାର ରାହୁଲ ଗାନ୍ଧୀଙ୍କୁ ଗୃହରେ କହିବାରୁ ବାରଣ କରିଥିଲେ ଏବଂ ତାଙ୍କୁ ପୂର୍ବତନ ସେନା ମୁଖ୍ୟ ଏମଏମ ନରଭାଣେଙ୍କ ୨୦୨୦ ଚୀନ ସୀମା ଅଚଳାବସ୍ଥା ସହିତ ଜଡିତ ଅପ୍ରକାଶିତ ପୁସ୍ତକକୁ ଉଦ୍ଧୃତ କରିବାକୁ ଅନୁମତି ଦେଇ ନଥିଲେ।
ଆଠ ଜଣ କଂଗ୍ରେସ ସାଂସଦଙ୍କୁ ନିଲମ୍ବିତ
ଅନୁଶାସନହୀନତା ପାଇଁ ବଜେଟ ଅଧିବେଶନର ଅବଶିଷ୍ଟ ସମୟ ପାଇଁ ଆଠ ଜଣ କଂଗ୍ରେସ ସାଂସଦଙ୍କୁ ନିଲମ୍ବିତ କରାଯିବା ପରେ ସରକାର ଏବଂ ବିରୋଧୀ ଦଳ ମଧ୍ୟରେ ବିବାଦ ଆହୁରି ବଢ଼ିଥିଲା।
୨୦୦୪ରେ କ’ଣ ଘଟିଥିଲା?
୨୦୦୪ରେ ସମାନ ଘଟଣା ଘଟିଥିଲା। ସେହି ସମୟରେ ବିଜେପି ରାଷ୍ଟ୍ରପତିଙ୍କ ଅଭିଭାଷଣ ଉପରେ ଧନ୍ୟବାଦ ପ୍ରସ୍ତାବର ଉତ୍ତର ଦେବାରୁ ତତ୍କାଳୀନ ପ୍ରଧାନମନ୍ତ୍ରୀ ମନମୋହନ ସିଂହଙ୍କୁ ବାରଣ କରିଥିଲା। କଂଗ୍ରେସ ନେତା ଜୟରାମ ରମେଶ ସୋସିଆଲ ମିଡିଆରେ ଏକ ଭିଡିଓ ସେୟାର କରିଛନ୍ତି, ଯେଉଁଥିରେ ମନମୋହନ ସିଂହ ୧୦ ମାର୍ଚ୍ଚ ୨୦୦୫ରେ ତାଙ୍କ ଭାଷଣରେ ୧୦ ଜୁନ୍ ୨୦୦୪ର ଘଟଣାର ଉଲ୍ଲେଖ କରିଛନ୍ତି, ଯେତେବେଳେ ତାଙ୍କୁ ପ୍ରତିକ୍ରିୟା ଦେବାର ସୁଯୋଗ ମିଳିନଥିଲା।