ନୂଆଦିଲ୍ଲୀ: କେନ୍ଦ୍ର ଗୃହ ଏବଂ ସମବାୟ ମନ୍ତ୍ରୀ ଅମିତ ଶାହ କେନ୍ଦ୍ର ଶାସିତ ଅଞ୍ଚଳ ଜାମ୍ମୁ-କାଶ୍ମୀରରେ ବିକାଶ ପ୍ରକଳ୍ପର ଅଗ୍ରଗତିର ଆକଳନ କରିବା ପାଇଁ ଆଜି ଜାମ୍ମୁଠାରେ ଏକ ସମୀକ୍ଷା ବୈଠକରେ ଅଧ୍ୟକ୍ଷତା କରିଛନ୍ତି। ଏହି ବୈଠକରେ କେନ୍ଦ୍ର ଗୃହ ମନ୍ତ୍ରୀ ଅମିତ ଶାହ ସଡ଼କ ଭିତ୍ତିଭୂମି, ଶକ୍ତି, ଶିଳ୍ପ, ପର୍ଯ୍ୟଟନ, ୪ଜି ଏବଂ ଅପ୍ଟିକାଲ ଫାଇବର ସଂଯୋଗ ଭଳି ପ୍ରମୁଖ କ୍ଷେତ୍ରର ବିସ୍ତୃତ ସମୀକ୍ଷା କରିଥିଲେ। ଏହି ବୈଠକରେ ଜାମ୍ମୁ-କାଶ୍ମୀରର ଉପରାଜ୍ୟପାଳ ମନୋଜ ସିହ୍ନା, ମୁଖ୍ୟମନ୍ତ୍ରୀ ଓମାର ଅବଦୁଲ୍ଲା, କେନ୍ଦ୍ର ଗୃହ ସଚିବ ଏବଂ ଉଭୟ କେନ୍ଦ୍ର ସରକାର ଏବଂ ଜାମ୍ମୁ-କାଶ୍ମୀର ସରକାରଙ୍କ ବରିଷ୍ଠ ଅଧିକାରୀମାନେ ଯୋଗ ଦେଇଥିଲେ।
କେନ୍ଦ୍ର ଗୃହମନ୍ତ୍ରୀ କହିଛନ୍ତି ଯେ, ପ୍ରଧାନମନ୍ତ୍ରୀଙ୍କ ନେତୃତ୍ୱରେ ଭାରତ ସରକାର ଏକ ବିକଶିତ ଏବଂ ସମୃଦ୍ଧ ଜାମ୍ମୁ-କାଶ୍ମୀର ଗଠନ ପାଇଁ ସଂକଳ୍ପବଦ୍ଧ। ସେ କହିଥିଲେ ବିକାଶକୁ ତ୍ୱରାନ୍ୱିତ କରିବା ଲାଗି ମୋଦୀ ସରକାରଙ୍କ ନିରନ୍ତର ଏବଂ ଉତ୍ସର୍ଗୀକୃତ ପ୍ରୟାସ କାରଣରୁ ଜାମ୍ମୁ-କାଶ୍ମୀରରେ ବିକାଶମୂଳକ ପ୍ରକଳ୍ପଗୁଡ଼ିକ ଅଭୂତପୂର୍ବ ପ୍ରଗତି ହାସଲ କରିଛନ୍ତି। ଜାମ୍ମୁ-କାଶ୍ମୀରକୁ ନିଜର ଜଳବିଦ୍ୟୁତ ପ୍ରକଳ୍ପର ସମ୍ପୂର୍ଣ୍ଣ ସାମର୍ଥ୍ୟକୁ ବିକଶିତ କରିବାର ଆବଶ୍ୟକତା ରହିଛି। ସେ କହିଥିଲେ ଯେ ସରକାରଙ୍କ କଲ୍ୟାଣକାରୀ ଯୋଜନାର ୧୦୦ ପ୍ରତିଶତ ପରିପୂର୍ଣ୍ଣତା ହାସଲ କରିବା ଏବଂ ସମସ୍ତ ବିକାଶ ପ୍ରକଳ୍ପର ଲାଭ ଯେପରି ଉଦ୍ଦିଷ୍ଟ ହିତାଧିକାରୀଙ୍କ ନିକଟରେ ପହଞ୍ଚିବ ତାହା ସୁନିଶ୍ଚିତ କରିବା ଉପରେ ସ୍ୱତନ୍ତ୍ର ଧ୍ୟାନ ଦିଆଯିବା ଉଚିତ।
ଶ୍ରୀ ଶାହ କହିଥିଲେ ଯେ, ଜାମ୍ମୁ-କାଶ୍ମୀର ପରିଦର୍ଶନ ପାଇଁ ସାରା ଦେଶରୁ ଆସୁଥିବା ପର୍ଯ୍ୟଟକମାନଙ୍କ ଉତ୍ସାହ ହ୍ରାସ ପାଇନାହିଁ। ସେ କହିଥିଲେ ଯେ ଜାମ୍ମୁ-କାଶ୍ମୀରର ପର୍ଯ୍ୟଟନ ସ୍ଥଳୀଗୁଡ଼ିକ ଦେଶର ଅନ୍ୟ ରାଜ୍ୟଗୁଡ଼ିକରେ ବ୍ୟାପକ ବିପ୍ପଣନ କରିବାର ଆବଶ୍ୟକତା ରହିଛି, ଯାହାଦ୍ୱାରା ଏଠାରେ ଉପଲବ୍ଧ ପର୍ଯ୍ୟଟନ ସମ୍ଭାବନାର ଅନ୍ୱେଷଣ କରାଯାଇପାରିବ। ସେ କହିଥିଲେ ଯେ, ଜାମ୍ମୁ-କାଶ୍ମୀରରେ ନୂତନ ପର୍ଯ୍ୟଟନ ସ୍ଥଳୀର ବିକାଶ ପାଇଁ ଭାରତ ସରକାର ସମସ୍ତ ସମ୍ଭାବ୍ୟ ସହାୟତା ପ୍ରଦାନ କରିବେ।
କେନ୍ଦ୍ର ଗୃହମନ୍ତ୍ରୀ କହିଥିଲେ ଯେ, ଯୁବପିଢ଼ିଙ୍କୁ ବିକାଶ ସହିତ ଯୋଡ଼ିବା ପାଇଁ କ୍ରୀଡ଼ା ଭିତ୍ତିଭୂମିର ବିକାଶ ଏବଂ କ୍ରୀଡ଼ା ଏକାଡେମୀ ପ୍ରତିଷ୍ଠା ଉପରେ ଧ୍ୟାନ ଦିଆଯିବା ଉଚିତ। ଏହି ପରିପ୍ରେକ୍ଷୀରେ, ବିଭିନ୍ନ କ୍ରୀଡ଼ା ସଂସ୍ଥା ସହିତ ଯୋଡ଼ି ହୋଇ ପାଖାପାଖି ୨୦୦ କୋଟି ଟଙ୍କାର ନିବେଶ ସୁନିଶ୍ଚିତ କରିବା ଲାଗି ପ୍ରୟାସ କରାଯିବ। ଶ୍ରୀ ଶାହ ଏହା ମଧ୍ୟ କହିଥିଲେ ଯେ ଜାତୀୟ ଦୁଗ୍ଧ ବିକାଶ ବୋର୍ଡ (ଏନ. ଡି. ଡି. ବି.) ଜରିଆରେ ଜାମ୍ମୁ-କାଶ୍ମୀରରେ ଦୁଗ୍ଧ କ୍ଷେତ୍ରକୁ ପ୍ରୋତ୍ସାହନ ଦେବା ଲାଗି ପ୍ରୟାସ କରାଯିବା ଉଚିତ।
ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ସ୍ୱରୂପ, ଜାମ୍ମୁ-କାଶ୍ମୀରକୁ ଆର୍ଥିକ ବର୍ଷ ୨୦୨୫-୨୬ରେ ପ୍ରଥମ ଥର ପାଇଁ ପୁଞ୍ଜି ନିବେଶ ଲାଗି ରାଜ୍ୟଗୁଡ଼ିକୁ ସ୍ୱତନ୍ତ୍ର ସହାୟତା (ଏସ୍. ଏ. ଏସ୍. ସି. ଆଇ.) ଯୋଜନା ଅଧୀନରେ ଅଣାଯାଇଛି, ଯାହାଦ୍ୱାରା ପୁଞ୍ଜି ପ୍ରକଳ୍ପଗୁଡ଼ିକ ପାଇଁ ୫୦ ବର୍ଷର ସୁଧ-ମୁକ୍ତ ଋଣ ଉପଲବ୍ଧ ହୋଇପାରିବ। ଗୃହମନ୍ତ୍ରୀ ରେଖାଙ୍କିତ କରିଥିଲେ ଯେ ସୁଦୃଢ଼ ଆର୍ଥିକ ଶୃଙ୍ଖଳା ସମୟକ୍ରମେ କେନ୍ଦ୍ରଶାସିତ ଅଞ୍ଚଳର ଆର୍ଥିକ ନିଅଣ୍ଟକୁ ସ୍ଥିର କରିବାରେ ସହାୟକ ହେବ।
ଅମିତ ଶାହ କହିଥିଲେ ଯେ ସ୍ୱାଧୀନତାର ୧୦୦ ବର୍ଷ ପୂରଣ ଅବସରରେ ୨୦୪୭ ମସିହା ସୁଦ୍ଧା ଭାରତ ନିରନ୍ତର ଭାବେ ବିକଶିତ ଭାରତ ଲକ୍ଷ୍ୟ ଆଡକୁ ଅଗ୍ରସର ହେଉଛି ଏବଂ ଏହି ଲକ୍ଷ୍ୟ ହାସଲ ଦିଗରେ ଭାରତ ସରକାର ଜାମ୍ମୁ-କାଶ୍ମୀରକୁ ପୂର୍ଣ୍ଣ ସମର୍ଥନ ଜାରି ରଖିବେ। କେନ୍ଦ୍ର ଗୃହମନ୍ତ୍ରୀଙ୍କ ଗସ୍ତ ଜାମ୍ମୁ-କାଶ୍ମୀରର ବିକାଶ, ଶାନ୍ତି ଏବଂ ସୁରକ୍ଷାକୁ ଏକ ପ୍ରମୁଖ ଜାତୀୟ ପ୍ରାଥମିକତା ଦେବା ଲାଗି ଭାରତ ସରକାରଙ୍କ ଦୃଢ଼ ସଙ୍କଳ୍ପ ଉପରେ ଆଲୋକପାତ କରିଛି।