ନୂଆଦିଲ୍ଲୀ: ୨୦୨୬ ଟି ୨୦ ବିଶ୍ୱକପ୍ ଏବେ ଏପରି ଏକ ପର୍ଯ୍ୟାୟରେ ପହଞ୍ଚିଛି ଯେଉଁଠାରେ ପ୍ରତ୍ୟେକ ମ୍ୟାଚ୍ ଗୋଟିଏ ଦଳ ପାଇଁ ‘ଜୀବନଦାନ’ କିମ୍ବା ‘ବିଦାୟ’ ହୋଇପାରେ। ନେପାଳ, ଓମାନ ଏବଂ ନାମିବିୟା ଟୁର୍ଣ୍ଣାମେଣ୍ଟର ଲିଗ୍ ପର୍ଯ୍ୟାୟ ମଧ୍ୟଭାଗରୁ ବାଦ ପଡ଼ିସାରିଛନ୍ତି। ଏହା ପରେ, ପାକିସ୍ତାନ ସମେତ ବର୍ତ୍ତମାନ ପାଞ୍ଚଟି ଦଳ ଅଛନ୍ତି, ଯେଉଁମାନଙ୍କର ସୁପର ୮ରେ ସ୍ଥାନ ସମ୍ପୂର୍ଣ୍ଣ ଭାବରେ ସେମାନଙ୍କର ଆଗାମୀ ମ୍ୟାଚ୍ର ଫଳାଫଳ ଉପରେ ନିର୍ଭର କରେ।
ପାକିସ୍ତାନ ପାଇଁ ଶେଷ ସୁଯୋଗ
ଭାରତ ବିପକ୍ଷରେ ଲଜ୍ଜାଜନକ ପରାଜୟ ପାକିସ୍ତାନର ସ୍ଥିତିକୁ ଅତ୍ୟନ୍ତ କଷ୍ଟକର କରିଦେଇଛି। ଏହି ପରାଜୟ କେବଳ ପଏଣ୍ଟ ଟେବୁଲ୍ ନୁହେଁ ବରଂ ଦଳର ନେଟ୍ ରନ୍ ରେଟ୍କୁ ମଧ୍ୟ ପ୍ରଭାବିତ କରିଛି। ବର୍ତ୍ତମାନ ଗ୍ରୁପ୍ A ରେ ତୃତୀୟ ସ୍ଥାନରେ ଥିବା ପାକିସ୍ତାନର ପରବର୍ତ୍ତୀ ମ୍ୟାଚ୍ ଅତ୍ୟନ୍ତ ଗୁରୁତ୍ୱପୂର୍ଣ୍ଣ। ଯଦି ଦଳ ତା’ର ଶେଷ ଲିଗ୍ ମ୍ୟାଚ୍ ଜିତିବାରେ ବିଫଳ ହୁଏ, ତେବେ ସେମାନଙ୍କର ଟୁର୍ଣ୍ଣାମେଣ୍ଟ୍ ଶେଷ ହୋଇପାରେ। ଏହି ମ୍ୟାଚ୍ ସେମାନଙ୍କ ପାଇଁ କର ବା ମର ପରିସ୍ଥିତି ପାଲଟିଛି।
ନେଦରଲ୍ୟାଣ୍ଡ୍ ପାଇଁ କଠିନ ଚ୍ୟାଲେଞ୍ଜ:
ଗ୍ରୁପ୍ A ରେ ଦ୍ୱିତୀୟ ଦଳ ନେଦରଲ୍ୟାଣ୍ଡ୍ ମଧ୍ୟ ବିପଦରୁ ବାହାରି ନାହିଁ। ସେମାନଙ୍କର ପରବର୍ତ୍ତୀ ମ୍ୟାଚ୍ ଏକ ଶକ୍ତିଶାଳୀ ଭାରତୀୟ ଦଳ ବିପକ୍ଷରେ ଯାହା ଲଗାତାର ବିଜୟ ସହିତ ଉତ୍କୃଷ୍ଟ ଫର୍ମରେ ଅଛି। ତେଣୁ ନେଦରଲ୍ୟାଣ୍ଡ ପାଇଁ ବିଜୟ ସହଜ ହେବ ନାହିଁ। ଯଦି ସେମାନେ ଏହି ମ୍ୟାଚ୍ ହାରିଯାଆନ୍ତି, ତେବେ ସେମାନେ ସୁପର-୮ ଦୌଡ଼ରୁ ପ୍ରାୟତଃ ବାଦ ପଡ଼ିଯିବେ।
ଆୟର୍ଲାଣ୍ଡର ସମସ୍ୟା, ଜିମ୍ବାୱେର ବଡ ସୁଯୋଗ:
ଗ୍ରୁପ୍ B ରେ ଆୟର୍ଲାଣ୍ଡର ସ୍ଥିତି ବହୁତ ଦୁର୍ବଳ ରହିଛି। ତିନୋଟି ମ୍ୟାଚ୍ ରେ ମାତ୍ର ଗୋଟିଏ ବିଜୟ ସହିତ ଦଳ ପଏଣ୍ଟ ଟେବୁଲରେ ପଛରେ ପଡ଼ିଯାଇଛି। ବର୍ତ୍ତମାନ ସେମାନଙ୍କୁ ସେମାନଙ୍କର ବାକି ମ୍ୟାଚ୍ ଜିତିବାକୁ ପଡିବ। ସେହିଭଳି ଜିମ୍ବାୱେର ସ୍ଥିତି ବହୁତ ଭଲ ଅଛି। ଦଳ ୨ ଟି ମ୍ୟାଚରୁ ୨ ଟି ବିଜୟ ସହିତ ଗ୍ରୁପ୍ B ରେ ଶ୍ରୀଲଙ୍କା ପରେ ଦ୍ଵିତୀୟ ସ୍ଥାନରେ ଅଛି। ବର୍ତ୍ତମାନ ଜିମ୍ବାୱେ କୁ ସୁପର-୮ ଯୋଗ୍ୟତା ପାଇଁ ଆଉ ଗୋଟିଏ ବିଜୟ ଆବଶ୍ୟକ। ଯାହାଫଳରେ ଅଷ୍ଟ୍ରେଲିଆର ବିଶ୍ଵକପ ଅଭିଯାନ ଶେଷ ହୋଇଯିବ।
ଆଫଗାନିସ୍ତାନର ସମ୍ଭାବନା କମ:
ଗତ ସଂସ୍କରଣରେ ସେମିଫାଇନାଲରେ ପହଞ୍ଚିଥିବା ଆଫଗାନିସ୍ତାନ ଦଳ ଏଥର ଆଶାନୁରୂପ ପ୍ରଦର୍ଶନ କରିନାହିଁ। ପ୍ରାରମ୍ଭିକ ମ୍ୟାଚ୍ରେ ପରାଜୟ ସୁପର-୮ ପାଇଁ ସେମାନଙ୍କର ପଥକୁ କଷ୍ଟକର କରିଦେଇଛି। ଏବେ ଦଳ ପାଇଁ ନ୍ୟୁଜିଲ୍ୟାଣ୍ଡର ଫଳାଫଳ ଉପରେ ନିର୍ଭର କରିବା ସହିତ ନିଜର ଶେଷ ମ୍ୟାଚକୁ ବଡ ବ୍ୟବଧାନରେ ଜିତିବା ଆବଶ୍ୟକ। ଯଦି ଆଜି କାନାଡା ବିପକ୍ଷରେ ନ୍ୟୁଜିଲ୍ୟାଣ୍ଡ ବିଜୟ ଲାଭ କରେ, ତେବେ ଆଫଗାନିସ୍ତାନର ବିଶ୍ଵକପ ଯାତ୍ରା ଲିଗ ପର୍ଯ୍ୟାୟରେ ଶେଷ ହୋଇଯିବ।