ଭୁବନେଶ୍ୱର: ପୁରୁଷ ପ୍ରାଧାନ୍ୟ ସମାଜରେ ନାରୀ ସାହିତ୍ୟିକମାନଙ୍କ ସଂଖ୍ୟା କମ୍। ନାରୀ ବିଭିନ୍ନ ସାଂସାରିକ ଜଞ୍ଜାଳ ମଧ୍ୟରେ ଫସିରହି ଅନ୍ୟମାନଙ୍କୁ ସୁଖୀ କରୁଥିଲେ ମଧ୍ୟ ନିଜେ ଅବହେଳାର ଶିକାର ହୋଇଥାଏ। ପୁରୁଷମାନେ ପାଉଥିବା ସମସ୍ତ ସୁବିଧା ଯଦି ମହିଳାମାନେ ପାଆନ୍ତି, ତେବେ ସାହିତ୍ୟିକାଙ୍କ ସଂଖ୍ୟାରେ ପରିବର୍ତ୍ତନ ଘଟିପାରନ୍ତା। ବର୍ତ୍ତମାନ ସମୟରେ ନାରୀମାନେ ବିଭିନ୍ନ କ୍ଷେତ୍ରରେ ନିଜକୁ ପ୍ରତିପାଦିତ କରିବା ପାଇଁ ଯଥା ସମ୍ଭବ ଚେଷ୍ଟା କରୁଛନ୍ତି। ସାହିତ୍ୟିକା ତଥା ସମ୍ବାଦ ସାହିତ୍ୟଘରର ରାଜ୍ୟ ସଂଯୋଜିକା ଶୁଭଶ୍ରୀ ଲେଙ୍କାଙ୍କ କବିତା ସଂକଳନ ‘ଛାଇର ଛବି’ ପୁସ୍ତକର ପାଠକାର୍ପଣ ଅବସରରେ ଅତିଥିମାନେ ଏଭଳି କହିଛନ୍ତି।
ହୋଟେଲ ସ୍ବସ୍ତି ପ୍ରିମିୟମ୍ରେ ଆୟୋଜିତ ଏହି ସମାରୋହରେ ମୁଖ୍ୟ ଅତିଥି ଭାବେ ଯୋଗଦେଇ ଆନ୍ତର୍ଜାତିକ ଖ୍ୟାତିସମ୍ପନ୍ନ ଲେଖିକା ତସଲିମା ନସରିନ୍ କହିଲେ, ସାହିତ୍ୟ ସର୍ଜନା କ୍ଷେତ୍ରରେ ନାରୀମାନେ ସ୍ବତନ୍ତ୍ର ସ୍ଥାନ ଗ୍ରହଣ କରିଲେ ଆମ ସାହିତ୍ୟ ସମୃଦ୍ଧ ହୋଇପାରିବ। ଏଥିପାଇଁ ନିଜର ଅଧିକାରକୁ ସାବ୍ୟସ୍ତ କରିବାକୁ ହେବ। ଏହି ଅବସରରେ ଲେଖିକା ଶ୍ରୀମତୀ ଲେଙ୍କାର କବିତା ‘ଆଜି ଆକାଶରେ ଜହ୍ନ ନାହିଁ’ର ବଙ୍ଗଳା ଅନୁବାଦ ପାଠ କରିଥିଲେ।
ଆନ୍ତର୍ଜାତିକ ଖ୍ୟାତିସମ୍ପନ୍ନ ଅଭିନେତ୍ରୀ ଦୀପ୍ତି ନାଭାଲ ଆମ ଦେଶର ବିପର୍ଯ୍ୟସ୍ତ ମହିଳା ସୁରକ୍ଷା ପ୍ରସଙ୍ଗ ବାବଦରେ ଅଧିକରୁ ଅଧିକ ଆଲୋଚନା କରିବା ପାଇଁ ଆହ୍ବାନ ଦେଇଥିଲେ।
ଆନ୍ତର୍ଜାତିକ ଖ୍ୟାତିସମ୍ପନ୍ନ ଅଭିନେତ୍ରୀ ଦୀପ୍ତି ନାଭାଲ ଆମ ଦେଶର ବିପର୍ଯ୍ୟସ୍ତ ମହିଳା ସୁରକ୍ଷା ପ୍ରସଙ୍ଗ ବାବଦରେ ଅଧିକରୁ ଅଧିକ ଆଲୋଚନା କରିବା ପାଇଁ ଆହ୍ବାନ ଦେଇଥିଲେ।
ଇଷ୍ଟର୍ଣ୍ଣ ମିଡିଆ ଲିମିଟେଡ୍ର ଅଧ୍ୟକ୍ଷ ସୌମ୍ୟରଂଜନ ପଟ୍ଟନାୟକ ସଭାରେ ସଭାପତିତ୍ବ କରି କହିଲେ, ପୁରୁଷ ଓ ମହିଳା ଆଦୌ ସମାନ ନୁହନ୍ତି। ମହିଳାମାନେ ପୁରୁଷମାନଙ୍କଠାରୁ ବହୁତ ଊର୍ଦ୍ଧ୍ବରେ। ନାରୀମାନେ ନିଜକୁ ବିଭିନ୍ନ କ୍ଷେତ୍ରରେ ପାରଦର୍ଶିତା ହାସଲ କରୁଛନ୍ତି। ଏଣୁ ନିଜକୁ ଛୋଟ ବୋଲି ଭାବିବାର ମାନସିକତାକୁ ପରିବର୍ତ୍ତନ କରିବା ଦରକାର।
ସମ୍ମାନିତ ଅତିଥି ବିଶିଷ୍ଟ ଚିତ୍ରଶିଳ୍ପୀ ସୂର୍ଯ୍ୟସ୍ନାତା ମହାନ୍ତି ପୁସ୍ତକର ପାଠକାଦୃତି କାମନା କରିବା ସହିତ ଲେଖିକାଙ୍କ ୩୦ ବର୍ଷର ସାରସ୍ବତ ଯାତ୍ରାର ସାର୍ଥକତା ସମ୍ପର୍କରେ ମତ ଦେଇଥିଲେ। ଲେଖିକା ଶ୍ରୀମତୀ ଲେଙ୍କା ଲେଖକୀୟ ଅଭିବ୍ୟକ୍ତି ବର୍ଣ୍ଣନା କରିବା ସହିତ ନାରୀକବିର ସ୍ବାଧୀନତା ସମ୍ପର୍କରେ ବକ୍ତବ୍ୟ ରଖିଥିଲେ। ଅଧ୍ୟାପକ ମୃତ୍ୟୁଞ୍ଜୟ ରଥ କାର୍ଯ୍ୟକ୍ରମ ସଞ୍ଚାଳନ କରିଥିଲେ।