ରଙ୍ଗାଚରଣ ପ୍ରଧାନ
ବୁଝିହୁଏନା, ପାଟକୁରା ନିର୍ବାଚନ କାହିଁକି ଏତେ ଗୁରୁତ୍ବପୂର୍ଣ । କାହିଁକି ଏ ସମ୍ବନ୍ଧୀୟ ତମାମ ମିଛ ସତ ଓ ଧାରାବିବରଣୀ ଶୈଳୀରେ ପରିବେଷଣ ହେଉଥିବା ଖବରକୁ ମିଡିଆ ଅଗ୍ରାଧିକାର ଦେଉଛି ? ପାଟକୁରା ନିର୍ବାଚନର ଭୋଟଦାନ ପରେ ପରେ ଭଣ୍ଡବାବା ସାରଥୀ ଜାମିନିରେ ଜେଲ୍ ବାହାରକୁ ଆସିବା ଖବର ବି ଗଣମାଧ୍ୟମ ଓ ସୋସିଆଲ୍ ମିଡିଆରେ ଅତି ଚର୍ଚ୍ଚାର ବିଷୟ ହୋଇଛି ।
ଏଠାରେ ପ୍ରଶ୍ନ ଉଠିପାରେ ଯେ ଲୋକେ ଯେଉଁ ଖବର ଜାଣିବାକୁ ଆଗ୍ରହୀ ମିଡିଆ ସେହି ବିଷୟରେ କହିବ ନା ଯେଉଁ ଖବର ବିଷୟରେ ଜାଣିବା ଲୋକଙ୍କ ପାଇଁ ଅତି ଜରୁରୀ ସେହି ଖବର ବିଷୟରେ କହିବ । ଓଡିଶାରେ ଏ ବିଷୟରେ ବ୍ୟକ୍ତିଗତ ଭାବରେ ମୋର ଏକ ଦୁଃଖଦ ଅନୁଭବ ରହିଛି, ଯେଉଁ ବିଷୟରେ ପାଠକମାନଙ୍କ ମଧ୍ୟରୁ ଅନେକଙ୍କର ଅବଶ୍ୟ ଦ୍ବିମତ ରହିପାରେ । ବିଶ୍ବକପ୍ କ୍ରିକେଟ୍ ଚାଲିଥିବା ବେଳେ ବହୁ ସଂଖ୍ୟକ ଲୋକଙ୍କର ସେ ବିଷୟରେ ନିର୍ଦ୍ଦିଷ୍ଟ ରାୟ ରହୁଥିଲା । ମାତ୍ର ରାୟ ରଖୁଥିବା ଲୋକଙ୍କ ମଧ୍ୟରୁ ଖୁବ୍ କମ୍ ଲୋକ, କ୍ରିକେଟ୍ ର ସମସ୍ତ ନିୟମ ଓ ଖେଳର ବିଭିନ୍ନ ସୁକ୍ଷ୍ମ କଳା କୌଶଳ ବିଷୟରେ ଜାଣନ୍ତି ।
କିଛି ଦିନ ପୁର୍ବେ ରାଜ୍ୟ ବିଧାନସଭାରେ ବଜେଟ ଆଗତ ହେଲା । ଏହି ବାର୍ଷିକ ବଜେଟ୍ ଉପରେ ବି ଅନେକ ଲୋକ ଊଣା ଅଧିକେ ନିଜର ମତାମତ ରଖିଲେ । ମାତ୍ର ସେମାନଙ୍କ ମଧ୍ୟରୁ କେତେଜଣ ବଜେଟ୍ ଓ ଆର୍ଥିକ ସର୍ଭେ ପଢିଥିଲେ ? ଏକଥା ସତ ଯେ ମତାମତ ଦେଉଥିବା ଲୋକମାନେ ସମସ୍ତେ ବଜେଟ ଓ ସର୍ଭେ ପଢନ୍ତୁ ବୋଲି ଆଶା କରିବା ଏକ ଅବାନ୍ତର ପ୍ରସ୍ତାବ । ଅଧିକ ଜାଣିବା ଶୁଣିବା ମହଲରେ ମଧ୍ୟ ଅନେକଙ୍କର ଭିନ୍ନ ଭିନ୍ନ ସ୍ବତନ୍ତ୍ର ଜ୍ଞାନ ଓ ତଥ୍ୟ ସଂଗ୍ରହର କ୍ଷେତ୍ର ରହିଛି ଯେଉଁଠାରେ ସେମାନେ କଠିନ ପରିଶ୍ରମ କରନ୍ତି । କିନ୍ତୁ ତଥାପି ମୁଁ କହିବି ଯେ ବଜେଟ ଓ ସର୍ଭେ ପୁସ୍ତକର ମୌଳିକ ତଥ୍ୟ ପଢି ସେ ବିଷୟରେ ନିବନ୍ଧ ଓ ଭାଷଣ ଦେବା ଲୋକଙ୍କ ସଂଖ୍ୟା ଓଡିଶାରେ ହାତଗଣତି । ପ୍ରତିବର୍ଷ ବଜେଟ ବିଷୟରେ ଶ୍ରୀଯୁକ୍ତ ପଞ୍ଚାନନ କାନୁନଗୋ ଓ ଶ୍ରୀଯୁକ୍ତ ସନ୍ତୋଷ ମହାପାତ୍ର ନିଜର ବ୍ୟାଖ୍ୟା ବିଭିନ୍ନ ସଭାସମିତିରେ ଓ ନିବନ୍ଧ ମାଧ୍ୟମରେ ଦେଇ ଆସୁଛନ୍ତି । ସେମାନଙ୍କ ବ୍ୟତୀତ ଅବଶ୍ୟ ଆହୁରି ଅନେକ ଥିବେ । ତଥାପି ମୋ ଭଳି ଦିନରାତି ଖବରରେ ବୁଡି ରହୁଥିବା ଓ ଅର୍ଥନୀତି ବିଷୟରେ ଆଗ୍ରହ ରଖୁଥିବା ଜଣେ ଲୋକର ନଜରରେ ତାହା ପଡିନାହିଁ । ଆହୁରି ଅନେକ ଅଛନ୍ତି ଯେଉଁମାନେ ଏସବୁ ବ୍ୟାଖ୍ୟା ପଢି ନିଜର ବ୍ୟାଖ୍ୟା ଦିଅନ୍ତି । ମୁଁ ଏବେ ଏକଥା ଲେଖି ଆପଣଙ୍କୁ ହୁଏତ ଦୁଃଖିତ କରିପାରେ ଯେ ସାଢେ ୪ କୋଟି ଜନସଂଖ୍ୟାର ରାଜ୍ୟ ଓଡିଶାରେ ଯେତିକି ବିଜ୍ଞ ବ୍ୟକ୍ତି ବଜେଟକୁ ପୁଙ୍ଖାନୁପୁଙ୍ଖ ପଢି ତାହାର ବ୍ୟାଖ୍ୟା କରନ୍ତେ ଓ ଲୋକମାନଙ୍କୁ ସେ ବିଷୟରେ ବୁଝାନ୍ତେ ତାହା ହେଉନାହିଁ ।
ହୁଏତ ଏମିତି ବି ହୋଇପାରେ ଯେ ସେସବୁ ବ୍ୟାଖ୍ୟା ଓ ତର୍ଜମାକୁ ସ୍ଥାନ ଦେବା ପାଇଁ ଗଣମାଧ୍ୟମରେ ଯଥେଷ୍ଟ ସ୍ଥାନ ଓ ସୁଯୋଗ ରହୁନାହିଁ ।
ସର୍ବଭାରତୀୟ ସ୍ତରରେ କିନ୍ତୁ କେନ୍ଦ୍ରୀୟ ବଜେଟ ବିଷୟରେ କହିବା ପାଇଁ ଶହ ଶହ ନିପୁଣ
ବିଶେଷଜ୍ଞ ରହିଛନ୍ତି ଏବଂ ସମ୍ବାଦପତ୍ର ଓ ଇଣ୍ଟରନେଟ୍ ନିଉଜ୍ ପୋର୍ଟାଲଗୁଡିକରେ ସେ ବିଷୟରେ ମାସ ମାସ ଧରି ଥୁଣ୍ଟିନାଣ୍ଟି କରି ଆଲୋଚନା ହୁଏ । ମାତ୍ର ଆମ ଟିଭି ଚାନେଲଗୁଡିକରେ ବଜେଟ ଆଲୋଚନା କେବଳ ଗୋଟିଏ ସନ୍ଧ୍ୟାରେ ସୀମିତ ରୁହେ । କେନ୍ଦ୍ରୀୟ ବଜେଟ ସହ ତୁଳନା କଲେ ଏପରିକି ଆନୁପାତିକ ଦୄଷ୍ଟିରୁ ମଧ୍ୟ ତାହା ବହୁତ କମ୍ ।
ଅଭିଯୋଗ ଆସିପାରେ ଯେ ଅର୍ଥନୀତି ଏକ ଶୁଷ୍କ ବିଷୟ ଏବଂ ସେ ବିଷୟରେ ସାମାନ୍ୟ ଅଧିକ ଆଲୋଚନା ଦର୍ଶକ କିମ୍ବା ପାଠକଙ୍କୁ ଗଣମାଧ୍ୟମଠାରୁ ଦୁରେଇ ଦେବ । ମାତ୍ର ଏହି ଅଭିଯୋଗ ଭିତରେ ଲୁଚିରହିଛି ଆଉ ଏକ କଥା । ତାହା ହେଲା ଅର୍ଥନୈତିକ ବିତର୍କ ପ୍ରତି ଦର୍ଶକ ଓ ପାଠକଙ୍କ ମଧ୍ୟରେ ଆଗ୍ରହ ସୄଷ୍ଟି କରିବାରେ ସେମାନଙ୍କର ବିଫଳତା । ପାଖାପାଖି ଏକ ଡଜନ ହେବ ଖବର ଚାନେଲ ଓ ସମ୍ବାଦପତ୍ର ରୋମାଞ୍ଚ ଓ ଚାଞ୍ଚଲ୍ୟର ଉପଭୋକ୍ତାଙ୍କର ସେହି ଏକମାତ୍ର ବଜାରକୁ ନିଜ ହାତରେ ଗଢିଛନ୍ତି ଓ ତାହାରି ଉପରେ ନିର୍ଭର କରି ଆସୁଛନ୍ତି ।
ଓଡିଶା ଭଳି ଆର୍ଥିକ ଦୄଷ୍ଟିରୁ ଅନଗ୍ରସର ରାଜ୍ୟରେ ଅର୍ଥନୀତି ଓ ଅନ୍ୟାନ୍ୟ ମହତ୍ବପୂର୍ଣ ବିଷୟକୁ ନେଇ ଯେତିକି ଗଭୀରତା ସହ ଆଲୋଚନା ହେବା କଥା ତାହା ହେଉନାହିଁ । ଅର୍ଥନୀତିର ଗୁଢ ତଥ୍ୟକୁ ନେଇ ରାଜନୈତିକ ଦଳ ଓ ନେତାଙ୍କୁ ଯେତିକି ପ୍ରଶ୍ନବାଣର ସମ୍ମୂଖୀନ କରାଇବା କଥା ତାହା ସେମାନେ କରୁ ନାହାନ୍ତି । ଦୁଇ ବର୍ଷ ପୁର୍ବେ ବୈଜୟନ୍ତ ପଣ୍ଡା ବିମୁଦ୍ରୀକରଣକୁ ସମର୍ଥନ କରି ଲେଖିଥିଲେ । ଏ ବିଷୟରେ ଅଧିକ ବୁଝାଇ କହିବାକୁ ଓଡିଶାର କୌଣସି ଗଣମାଧ୍ୟମ ସଂସ୍ଥା ତାଙ୍କୁ କାଠଗଡାରେ ଠିଆ କଲା ନାହିଁ । ଅପରାଜିତା ଷଢଙ୍ଗୀ ବାରମ୍ବାର କହିଲେ ଯେ ସେ ପ୍ରଧାନମନ୍ତ୍ରୀଙ୍କଠାରୁ ପ୍ରେରଣା ପାଇ ରାଜନୀତିରେ ଯୋଗ ଦେଇଛନ୍ତି । ମୋଦୀ ସରକାରଙ୍କ ବିଭିନ୍ନ ବିଫଳତାକୁ ନେଇ ତାଙ୍କ ଦ୍ବାରା ଦାବୀ କରାଯାଉଥିବା ପ୍ରେରଣାକୁ କେହି ଆହ୍ବାନ କଲେ ନାହିଁ । ଓଡିଶାର ସ୍ବାସ୍ଥ୍ୟ କ୍ଷେତ୍ରରେ ଦେଖା ଦେଇଥିବା ଦୁରବସ୍ଥାକୁ ନେଇ ବିତର୍କ କେବଳ ଦୁଇ ଦଳ ମଧ୍ୟରେ ବାଦୀପାଲାରେ ହଜିଯାଏ । ବିତର୍କରେ ଭାଗ ନେବାବେଳେ ଖାରବେଳ ସ୍ବାଇଁଙ୍କର ମତକୁ ଆପ୍ତବାକ୍ୟ ବୋଲି ଧରି ନିଆଯାଏ । ଆହୁରୀ ଅନେକ ଗଣମାଧ୍ୟମ ସଂସ୍ଥା ଅଛନ୍ତି ଯେଉଁଠାରେ ରାଜ୍ୟସରକାରଙ୍କ ପ୍ରେସ୍ ନୋଟକୁ ମଧ୍ୟ କମା ଓ ପୁର୍ଣଛେଦ ସହ ଖବର ଆକାରରେ ପରିବେଷଣ କରାଯାଏ ।
ସଫଳ ଗଣତନ୍ତ୍ର ଓ ସନ୍ତୁଳିତ ଆର୍ଥିକ ବିକାଶ ପାଇଁ ସର୍ବ ପ୍ରଥମ ଆବଶ୍ୟକତା ହେଉଛି ସୂଚନା । ବିଭିନ୍ନ ସରକାର ସୂଚନାକୁ ଚପେଇ ରଖିବା ପାଇଁ ଚେଷ୍ଟିତ ହେବାରେ ହୁଏତ ଖୁବ୍ କମ୍ ଲୋକ ଆଶ୍ଚର୍ଯ୍ୟ ହେବେ । ମାତ୍ର ଗଣମାଧ୍ୟମ ଦ୍ବାରା ଏପରିକି ସାଧାରଣ ଭାବେ ଉପଲବ୍ଧ ସୂଚନାକୁ ବି ଗୁରୁତ୍ବ ନ ଦେବା ଦୁର୍ଭାଗ୍ୟପୁର୍ଣ ଓ ଏହା ଏକ ଜବାବଦେହି ରାଜନୈତିକ ବାତାବରଣର ପରିପନ୍ଥୀ ।
ଆଜି ଯେତେବେଳେ କେନ୍ଦ୍ର ସରକାର ସୂଚନା ଅଧିକାର ଆଇନରେ ସଂଶୋଧନ କରି ସୁଚନା କମିଶନଙ୍କର ଥାର୍ଡ ଅମ୍ପାୟାର କରିବାକୁ ହେବାକୁ ଯାଉଛନ୍ତି ସେତେବେଳେ ଓଡିଶାରେ ପାଟକୁରା ନିର୍ବାଚନ ଓ ସାରଥୀ ଜେଲରୁ ଖଲାସ ହେବା ଭଳି ମନୋରଞ୍ଜନଧର୍ମୀ ଓ କୌତୁହଳପ୍ରଦ ଖବର ଚର୍ଚ୍ଚାର ଶୀର୍ଷରେ ରହିବାରେ ଆଶ୍ଚର୍ଯ୍ୟ ହେବାର କିଛି ନାହିଁ ।