ବ୍ରିସବେନ: ଆଜି ଭାରତ-ଅଷ୍ଟ୍ରେଲିଆ ମଧ୍ୟରେ ଚତୁର୍ଥ ତଥା ଅନ୍ତିମ ଟେଷ୍ଟର ପ୍ରଥମ ଦିନର ଖେଳ ଶେଷ ହୋଇଛି। ଅଷ୍ଟ୍ରେଲିଆ ପ୍ରଥମେ ବ୍ୟାଟିଂ କରି ୫ ୱିକେଟ ହରାଇ ୨୭୪ ରନ କରିଛି। ଅଷ୍ଟ୍ରେଲିଆ ପକ୍ଷରୁ ଲାବୁସେନ ୧୦୮ ରନର ଶତକୀୟ ପାଳି ଖେଳିଛନ୍ତି।
ପୂର୍ବରୁ ଅଷ୍ଟ୍ରେଲିଆର ପ୍ରାରମ୍ଭିକ ଯୋଡି ଡ଼େଭିଡ ୱାର୍ନର ଏବଂ ମାର୍କସ ହ୍ୟାରିସ ବ୍ୟାଟିଂରେ ବିଫଳ ହୋଇଥିଲେ ମଧ୍ୟ ମାର୍ନସ ଲାବୁସେନ ଓ ଷ୍ଟିଭ ସ୍ମିଥ ଖେଳକୁ ଆଗକୁ ବଢାଇଥିଲେ। କିନ୍ତୁ ସ୍ମିଥ ମାତ୍ର ୩୬ ରନରେ ୱାସିଙ୍ଗଟନ ସୁନ୍ଦରଙ୍କ ବଲରେ ଆଉଟ ହୋଇ ଅଷ୍ଟ୍ରେଲିଆର ସମସ୍ୟା ବଢାଇଥିଲେ। ସ୍ମିଥଙ୍କ ପରେ ମାଥ୍ଵୀ ୱାଡ଼େ ବ୍ୟାଟିଂ କରିବାକୁ ଆସିଥିଲେ। ଲାବୁସେନ ଏବଂ ୱାଡେଙ୍କ ଯୋଡି ଚା’ ପାନ ବିରତି ପର୍ଯ୍ୟନ୍ତ ଖେଳି ଦଳର ସ୍ଥିତିକୁ ମଜବୁଜ କରିଥିଲେ।
କିନ୍ତୁ ବିରତି ପରେ ୱାଡେ ଟି ନଟରାଜନଙ୍କ ବଲରେ ଆଉଟ ହୋଇଯାଇଥିଲେ ଏବଂ ତାପରେ ଲାବୁସେନ ମଧ୍ୟ ନଟରାଜନଙ୍କ ବଲରେ ଆଉଟ ହୋଇ ପ୍ୟାଭିଲିଆନ ଫେରିଥିଲେ। ଏହାପରେ କ୍ୟାମେରନ ଗ୍ରୀନ ଏବଂ ଟିମ ପେନଙ୍କ ଯୋଡି ଦିନର ଶେଷ ପର୍ଯ୍ୟନ୍ତ ଖେଳି ଦଳର ସ୍କୋରକୁ ୨୭୪ ରନରେ ପହଞ୍ଚାଇଥିଲେ। ଭାରତ ପାଇଁ ଆଜି ଦୁଇଜଣ ବୋଲର ପଦାର୍ପଣ କରିଥିଲେ। ଦ୍ରୁତ ବୋଲର ଟି ନଟରାଜନ ଏବଂ ୱାସିଙ୍ଗଟନ ସୁନ୍ଦର ଆଜିର ମ୍ୟାଚରେ ପଦାର୍ପଣ କରିଥିଲେ। ନଟରାଜନ ୨ ଟି ୱିକେଟ ନେଇଥିବା ବେଳେ ମହମ୍ମଦ ସିରାଜ, ୱାସିଙ୍ଗଟନ ସୁନ୍ଦର ଏବଂ ଶ୍ରାଦ୍ଧୁଳ ଠାକୁର ୧ ଟି ଲେଖାଏଁ ୱିକେଟ ଅକ୍ତିଆର କରିଥିଲେ।