ନୂଆଦିଲ୍ଲୀ: ଭାରତର ଟି-୨୦ ଏବଂ ଦିନିକିଆ ଦଳ ପରେ ରୋହିତ ଶର୍ମା ବର୍ତ୍ତମାନ ଟେଷ୍ଟ ମ୍ୟାଚରେ ମଧ୍ୟ ଅଧିନାୟକ ହେବେ। ଭାରତ ଏବଂ ଶ୍ରୀଲଙ୍କା ମଧ୍ୟରେ ହେବାକୁ ଥିବା ଟେଷ୍ଟ ସିରିଜ ପାଇଁ ତାଙ୍କୁ ଅଧିନାୟକ କରାଯାଇଛି। ବିରାଟ କୋହଲିଙ୍କ ଟେଷ୍ଟ ମ୍ୟାଚର ଅଧିନାୟକତ୍ୱ ଛାଡିବା ପରେ ପ୍ରଶଂସକଙ୍କ ମନରେ ଏକ ପ୍ରଶ୍ନ ରହିଥିଲା ଯେ ଭାରତର ପରବର୍ତ୍ତୀ ଟେଷ୍ଟ ଅଧିନାୟକ କିଏ ହେବେ, ଏବେ ସମସ୍ତେ ଏହାର ଉତ୍ତର ପାଇଛନ୍ତି। ରୋହିତଙ୍କ ପୂର୍ବରୁ କେ.ଏଲ୍ ରାହୁଲ ମଧ୍ୟ କିଛି ମ୍ୟାଚ୍ରେ ଅଧିନାୟକତ୍ୱ କରିଥିଲେ।
ଟିମ୍ ଇଣ୍ଡିଆର ମୁଖ୍ୟ ଚୟନକର୍ତ୍ତା ଚେତନ ଶର୍ମା ଏକ ସାମ୍ବାଦିକ ସମ୍ମିଳନୀ କରିଛନ୍ତି। ଏଥିରେ ଶ୍ରୀଲଙ୍କା ବିପକ୍ଷ ଆଗାମୀ ଟେଷ୍ଟ ସିରିଜ ପାଇଁ ରୋହିତ ଶର୍ମାଙ୍କୁ ଅଧିନାୟକ କରାଯାଇଛି ବୋଲି ଘୋଷଣା କରାଯାଇଛି। ଚେତନ କହିଛନ୍ତି ଯେ, ଜଣେ ଅଧିନାୟକ ଭାବରେ ଆମେ ରୋହିତଙ୍କୁ ସର୍ବାଧିକ ସମୟ ଦେବାକୁ ଚାହୁଁଛୁ। ଟେଷ୍ଟ ଅଧିନାୟକଙ୍କ ପସନ୍ଦ ବିଷୟରେ ପଚରାଯାଇଥିବା ପ୍ରଶ୍ନରେ ସେ କହିଛନ୍ତି ଯେ, ରୋହିତ ଏକ ସ୍ପଷ୍ଟ ପସନ୍ଦ। ଅନ୍ୟ କାହାର ନାମ ବିଷୟରେ କୌଣସି ଆଲୋଚନା ହୋଇନଥିଲା।
ଶ୍ରୀଲଙ୍କା ବିପକ୍ଷ ଟେଷ୍ଟ ଦଳରେ ଭାରତର ବରିଷ୍ଠ ଖେଳାଳି ଚେତେଶ୍ୱର ପୂଜାରା ଏବଂ ଅଜିଙ୍କ୍ୟ ରାହାଣେ ସ୍ଥାନ ପାଇ ନାହାଁନ୍ତି। ଏହି ଉଭୟ ଖେଳାଳି ଦୀର୍ଘ ସମୟ ଧରି ଖରାପ ଫର୍ମରେ ଚାଲୁଥିଲେ। ଏଥିପାଇଁ ଉଭୟଙ୍କୁ କ୍ରମାଗତ ସମାଲୋଚନା କରାଯାଇଛି। ଦକ୍ଷିଣ ଆଫ୍ରିକା ଗସ୍ତରେ ମଧ୍ୟ ରାହାଣେ ଏବଂ ପୂଜାରା ଭଲ ପ୍ରଦର୍ଶନ କରିନଥିଲେ। ଯାହା ପରେ ଟିମ୍ ଇଣ୍ଡିଆରେ ସେମାନଙ୍କ ଉପସ୍ଥିତିକୁ ନେଇ ପ୍ରଶ୍ନ ଉଠିଥିଲା। ଏହି ଉଭୟ ଖେଳାଳି ବର୍ତ୍ତମାନ ରଣଜୀ ଟ୍ରଫିରେ ଖେଳୁଛନ୍ତି।
ଟେଷ୍ଟ ଦଳ: ରୋହିତ ଶର୍ମା (ଅଧିନାୟକ), ପ୍ରିୟାଙ୍କ ପଞ୍ଚଲ, ମୟଙ୍କ ଅଗ୍ରୱାଲ, ବିରାଟ କୋହଲି, ଶ୍ରେୟାସ ଆୟର, ହନୁମା ବିହାରୀ, ଶୁଭମାନ ଗିଲ, ଋଷଭ ପନ୍ତ (ଡବ୍ଲୁ.କେ), କେ.ଏସ୍ ଭରତ, ଆର ଜାଡେଜା, ଜୟନ୍ତ ଯାଦବ, ଆର ଅଶ୍ୱିନ, କୁଲଦୀପ ଯାଦବ, ସୌରଭ କୁମାର , ମୋ ସିରାଜ, ଉମେଶ ଯାଦବ, ମୋହମ୍ମଦ୍ ଶାମି, ଜସପ୍ରୀତ ବୁମ୍ରା (ଉପ ଅଧିନାୟକ)।
ଟି-୨୦ ଦଳ: ରୋହିତ ଶର୍ମା (ଅଧିନାୟକ), ରିତୁରାଜ ଗାଇକୱାଡ, ଶ୍ରେୟାସ ଆୟର, ସୂର୍ଯ୍ୟ କୁମାର ଯାଦବ, ସଞ୍ଜୁ ସାମସନ, ଇଶାନ କିଶନ (ଡବ୍ଲୁ.କେ), ଭେଙ୍କଟେଶ ଆୟର, ଦୀପକ ଚହର, ଦୀପକ ହୁଡା, ଆର ଜାଡେଜା, ୟୁଜଭେନ୍ଦ୍ର ଚହଲ, ରବି ବିଷ୍ଣୁ, କୁଲଦୀପ ଯାଦବ, ସିରାଜ, ଭୂବନେଶ୍ୱର କୁମାର, ହର୍ଷଲ ପଟେଲ, ଜସପ୍ରୀତ ବୁମ୍ରା (ଉପ-ଅଧିନାୟକ), ଆଭେଶ ଖାନ।