ନୂଆଦିଲ୍ଲୀ: ଅନ୍ତର୍ଜାତୀୟ କ୍ରିକେଟରେ ଦୀର୍ଘ ଦିନ ଧରି ଫର୍ମ ବାହାରେ ରହିଥିବା ଚେତେଶ୍ୱର ପୂଜାରା କାଉଣ୍ଟି କ୍ରିକେଟ୍ ରେ ଚମତ୍କାର ପ୍ରଦର୍ଶନ କରୁଛନ୍ତି। କାଉଣ୍ଟି ଚାମ୍ପିଅନସିପ୍ ଡିଭିଜନ୍-୨ରେ ସସେକ୍ସ ପାଇଁ ଖେଳିବାବେଳେ ସେ ମିଡଲ୍ସେକ୍ସ ବିପକ୍ଷରେ ଏକ ଶତକ ହାସଲ କରିଛନ୍ତି। କାଉଣ୍ଟି କ୍ରିକେଟ୍ ରେ ତାଙ୍କର ଏହା କ୍ରମାଗତ ଚତୁର୍ଥ ଶତକ। ଏହାପୂର୍ବରୁ ସେ ଡର୍ବିସାୟର, ୱର୍କେଷ୍ଟେରେଶର୍ ଏବଂ ଡୁରୁମ୍ ବିପକ୍ଷରେ ଶତକ ହାସଲ କରିଛନ୍ତି। କାଉଣ୍ଟି ଚାମ୍ପିଅନସିପ୍ ର ଏହି ସିଜିନରେ ପୂଜାରାର ଚାରି ଶତକ ମଧ୍ୟରୁ ଦୁଇଟି ଦ୍ଵିଶତକ ମଧ୍ୟ ଅନ୍ତର୍ଭୁକ୍ତ।
ଭେଟେରାନ ଖେଳାଳି ପୂଜାରା ଏଥର ଆଇପିଏଲ ମେଗା ନିଲାମରେ କୌଣସି କ୍ରେତା ପାଇଲେ ନାହିଁ। ଏହାର କାରଣ ହେଉଛି ସେ ଦୀର୍ଘ ସମୟ ଧରି ବଡ ଇନିଂସ ଖେଳିବାକୁ ସକ୍ଷମ ହୋଇନଥିଲେ। ସେ ଜାନୁଆରୀ ୨୦୧୯ ରେ ଅନ୍ତର୍ଜାତୀୟ କ୍ରିକେଟ୍ ରେ ଶେଷ ଶତକ ହାସଲ କରିଥିଲେ। ଅଷ୍ଟ୍ରେଲିଆ ବିପକ୍ଷ ସିଡନୀ ଟେଷ୍ଟରେ ସେ ଏହି ଶତକ ସ୍କୋର କରିଥିଲେ। ୨୦୨୦ ମସିହା ଆରମ୍ଭରୁ ଟେଷ୍ଟ କ୍ରିକେଟରେ ସେ ହାରାହାରି ୨୬.୨୯ ରନ୍ ସ୍କୋର କରିବାରେ ସକ୍ଷମ ହୋଇଛନ୍ତି।
ଡିସେମ୍ବର-ଜାନୁଆରୀରେ ଦକ୍ଷିଣ ଆଫ୍ରିକା ବିପକ୍ଷ ଟେଷ୍ଟ ସିରିଜରେ ସେ ବିଫଳ ହୋଇଥିଲେ। ସେ ହାରାହାରି ୨୦.୬୬ ରେ ତିନୋଟି ଟେଷ୍ଟ ମ୍ୟାଚର ୬ ଇନିଂସରେ ୧୨୪ ରନ୍ ସ୍କୋର କରିବାରେ ସକ୍ଷମ ହୋଇଥିଲେ। ଖରାପ ଫର୍ମ ହେତୁ ତାଙ୍କୁ ଶ୍ରୀଲଙ୍କା ବିପକ୍ଷ ଟେଷ୍ଟ ସିରିଜରୁ ବାଦ ଦିଆଯାଇଥିଲା। ପୁନର୍ବାର ଫର୍ମକୁ ଆସିବା ପାଇଁ ତାଙ୍କୁ ଘରୋଇ ଟୁର୍ନାମେଣ୍ଟ ରଣଜୀ ଟ୍ରଫି ଖେଳିବାକୁ ପରାମର୍ଶ ଦିଆଯାଇଥିଲା। କିନ୍ତୁ ସେଥିରେ ମଧ୍ୟ ପୂଜାରା କିଛି ବିଶେଷ ପ୍ରଦର୍ଶନ କରିପାରିନଥିଲେ।
ଏହି ସିଜିନରେ ପୂଜାରା ଡର୍ବିସାୟର୍ ବିପକ୍ଷରେ ଏକ ଦ୍ଵିଶତକ ହାସଲ କରିଥିଲେ। କାଉଣ୍ଟି କ୍ରିକେଟ୍ ରେ ଏହି ସଂଖ୍ୟାରେ ପହଞ୍ଚିବାରେ ସେ ଦ୍ୱିତୀୟ ଖେଳାଳି। ତାଙ୍କ ପୂର୍ବରୁ କେବଳ ଭାରତର ପୂର୍ବତନ ଅଧିନାୟକ ମହମ୍ମଦ ଅଜହରୁଦ୍ଦିନ ୧୯୯୧ ଏବଂ ୧୯୯୫ ରେ କାଉଣ୍ଟି କ୍ରିକେଟରେ ଦ୍ୱିଶତକ ହାସଲ କରିଥିଲେ।
