ନୂଆଦିଲ୍ଲୀ: ଇଂଲଣ୍ଡ ବିପକ୍ଷ ତିନି ମ୍ୟାଚ୍ ବିଶିଷ୍ଟ ଦିନିକିଆ ସିରିଜରେ ଟିମ୍ ଇଣ୍ଡିଆ ୨-୧ରେ ଜିତିଛି। ତେବେ ତୃତୀୟ ଦିନିକିଆରେ ଭାରତ ପାଇଁ ୨୫୯ ରନ୍ର ଟାର୍ଗେଟକୁ ପିଛା କରିବା ସହଜ ନଥିଲା। ମାତ୍ର ୭୨ ରନ ସ୍କୋରରେ ଭାରତ ୪ ୱିକେଟ ହରାଇଥିଲା। କେବଳ ଏତିକି ନୁହେଁ, ବିଶ୍ୱର ଶ୍ରେଷ୍ଠ ବ୍ୟାଟ୍ସମ୍ୟାନ୍ ବିରାଟ କୋହଲିଙ୍କ ଖରାପ ପର୍ଯ୍ୟାୟ ତୃତୀୟ ଦିନିକିଆରେ ମଧ୍ୟ ଜାରି ରହିଥିଲା। ଏହି ମ୍ୟାଚରେ ବିରାଟ କୋହଲି କେବଳ ୧୭ ରନର ଇନିଂସ ଖେଳିପାରିଥିଲେ।
ଇଂଲଣ୍ଡ ବିପକ୍ଷ ଟେଷ୍ଟ, ଟି-୨୦ ଏବଂ ଦିନିକିଆର ୬ ଟି ଇନିଂସରେ ବିରାଟ କୋହଲି ଗୋଟିଏ ଅର୍ଦ୍ଧଶତକ ହାସଲ କରିପାରି ନଥିଲେ। ଇଂଲଣ୍ଡ ଗସ୍ତରେ ଖେଳାଯାଇଥିବା ୬ ଟି ଇନିଂସରେ ବିରାଟ କୋହଲି ମାତ୍ର ୭୬ ରନ୍ ସ୍କୋର କରିପାରିଥିଲେ। ଆଶା କରାଯାଉଥିଲା ଯେ, ବିରାଟ କୋହଲିଙ୍କ ବ୍ୟାଟ୍ ନିଶ୍ଚିତ ଭାବେ ଦିନିକିଆ ଫର୍ମାଟରେ କାମ କରିବ। କିନ୍ତୁ ଦ୍ୱିତୀୟ ଓ ତୃତୀୟ ଦିନିକିଆରେ ବିରାଟ କୋହଲି ପ୍ରଶଂସକଙ୍କୁ ନିରାଶ କରିଥିଲେ।
ପ୍ରାୟ ଦୁଇ ବର୍ଷ ଧରି ବିରାଟ କୋହଲିଙ୍କ ଖରାପ ଫର୍ମ ଚାଲିଛି। ନଭେମ୍ବର ୨୦୧୯ରେ ବିରାଟ କୋହଲି ଅନ୍ତର୍ଜାତୀୟ କ୍ରିକେଟରେ ନିଜର ଶେଷ ଶତକ ହାସଲ କରିଥିଲେ। ଏହା ସହିତ ବିରାଟ କୋହଲିଙ୍କ ହାରାହାରି କ୍ରମାଗତ ଭାବରେ ତିନୋଟି ଫର୍ମାଟରେ ହ୍ରାସ ପାଉଛି। ବିରାଟ କୋହଲି ଆଉ ଟେଷ୍ଟ ଏବଂ ଟି-୨୦ କ୍ରିକେଟର ଶ୍ରେଷ୍ଠ ୧୦ ବ୍ୟାଟ୍ସମ୍ୟାନ୍ ତାଲିକାରେ ଅନ୍ତର୍ଭୁକ୍ତ ନୁହଁନ୍ତି।
ବିରାଟ କୋହଲିଙ୍କ ଖରାପ ଫର୍ମ ଯୋଗୁଁ ତାଙ୍କ ଦଳରେ ରହିବା ନେଇ ମଧ୍ୟ ପ୍ରଶ୍ନ ଉଠିଛି। ୱେଷ୍ଟଇଣ୍ଡିଜ୍ ବିପକ୍ଷ ପାଞ୍ଚ ମ୍ୟାଚ୍ ବିଶିଷ୍ଟ ଟି-୨୦ ସିରିଜରୁ ବିରାଟ କୋହଲିଙ୍କୁ ବିସିସିଆଇ ବିଶ୍ରାମ ଦେଇଛି। ବିଶ୍ୱାସ କରାଯାଏ ଯେ, ବିରାଟ କୋହଲି ଏସିଆ କପରେ ଦଳକୁ ଫେରିପାରନ୍ତି। ଚଳିତ ବର୍ଷର ଟି-୨୦ ବିଶ୍ୱକପରେ ବିରାଟ କୋହଲି ଦଳର ଯୋଜନାର ଅଂଶ ବୋଲି ଟିମ୍ ଇଣ୍ଡିଆର ଅଧିନାୟକ ରୋହିତ ଶର୍ମା ସ୍ପଷ୍ଟ କରିସାରିଛନ୍ତି।