ନୂଆଦିଲ୍ଲୀ: ୱେଷ୍ଟଇଣ୍ଡିଜ୍ ବିପକ୍ଷରେ ଖେଳାଯାଇଥିବା ତିନି ମ୍ୟାଚ୍ ବିଶିଷ୍ଟ ସିରିଜର ଦ୍ୱିତୀୟ ମ୍ୟାଚ୍ ରେ ଭାରତୀୟ ଦଳ ଦୁଇଟି ୱିକେଟ୍ ରେ ବିଜୟ ଲାଭ କରିଛି। ଏହା ସହ ଟିମ୍ ଇଣ୍ଡିଆ ବର୍ତ୍ତମାନ ସିରିଜରେ ୨-୦ ଅଗ୍ରଣୀ ହାସଲ କରିଛି। କଷ୍ଟସାଧ୍ୟ ମ୍ୟାଚକୁ ଟିମ ଇଣ୍ଡିଆ ଜିତିଥିବାରୁ ଦଳର ଅଧିନାୟକ ଶିଖର ଧାୱନ ବହୁତ ଖୁସି ଅଛନ୍ତି। ଏହା ସହ ଶିଖର ଧାୱନ ଟିମ୍ ଇଣ୍ଡିଆର ବିଜୟର ରହସ୍ୟ ପ୍ରକାଶ କରିଛନ୍ତି।
ଦଳର ବିଜୟକୁ ଏକ ଶ୍ରେଷ୍ଠ ବିଜୟ ବୋଲି ଶିଖର ଧାୱନ କହିଛନ୍ତି। ଅଧିନାୟକ କହିଛନ୍ତି ଯେ, ଆମର ପ୍ରଦର୍ଶନ ବହୁତ ଭଲ ଥିଲା। ଖେଳାଳିମାନେ ଆଶା ଛାଡି ନଥିଲେ ଏବଂ ଏହା ଏକ ଦମଦାର ଥିଲା। ଆୟର, ସଞ୍ଜୁ ଏବଂ ଅକ୍ସର ସମସ୍ତେ ଚମତ୍କାର ବ୍ୟାଟିଂ କରିଥିଲେ। ଆବେଶ ଖାନ ଡେବ୍ୟୁ ମ୍ୟାଚରେ ବ୍ୟାଟିଂ କରିବାକୁ ଆସିଥିଲେ ଏବଂ ୧୦ ରନର ମୂଲ୍ୟବାନ ଅବଦାନ ଦେଇଥିଲେ।
ଏହି ବିଜୟ ପାଇଁ ଧୱନ ଆଇପିଏଲକୁ ଶ୍ରେୟ ଦେଇଛନ୍ତି। ସେ କହିଛନ୍ତି ଯେ, ଆଇପିଏଲ ଧନ୍ୟବାଦ। ବର୍ତ୍ତମାନ ଏହି ଖେଳାଳିମାନେ ବଡ଼ ମଞ୍ଚରେ ପ୍ରଦର୍ଶନ କରୁଛନ୍ତି। ୱେଷ୍ଟଇଣ୍ଡିଜ୍ ବୋଲିଂ ବହୁତ ଭଲ ଥିଲା। ତାଙ୍କର ମଧ୍ୟ ଭଲ ଆରମ୍ଭ ହୋଇଥିଲା। ହୋପ ଏବଂ ପୁରାନଙ୍କ ବ୍ୟାଟିଂ ଉତ୍କୃଷ୍ଟ ଥିଲା। କିନ୍ତୁ ଆମେ ବିଶ୍ୱାସ କରିଥିଲୁ ଯେ, ଯଦି ସେମାନେ ଏହା କରିପାରିବେ, ତେବେ ଆମେ କାହିଁକି କରିପାରିବୁ ନାହିଁ।
ଧାୱନ ଆହୁରି କହିଛନ୍ତି ଯେ, “ଆମର ଆରମ୍ଭ ଟିକିଏ ମନ୍ଥର ଥିଲା। ଶୁବମାନ କିନ୍ତୁ ଆମକୁ ମ୍ୟାଚରେ ରଖିଥିଲେ। ଆୟର ଏବଂ ସଞ୍ଜୁଙ୍କ ସହଭାଗିତା ଏକ ବଡ଼ ପାର୍ଥକ୍ୟ ବୋଲି ପ୍ରମାଣିତ ହେଲା। ଆମର ଖେଳାଳିମାନେ ଏବେ ମଧ୍ୟ ଆଗକୁ ବଢୁଛନ୍ତି। ”
ଉଲ୍ଲେଖ ଯୋଗ୍ୟ ଯେ, ୩୧୨ ରନ୍ର କଠିନ ଲକ୍ଷ୍ୟକୁ ପିଛା କରି ଟିମ୍ ଇଣ୍ଡିଆ ୭୯ ରନ୍ ପାଇଁ ତିନୋଟି ୱିକେଟ୍ ହରାଇଥିଲା। ତେବେ ଆୟର୍, ସଞ୍ଜୁ ଏବଂ ଅକ୍ସର ପଟେଲଙ୍କ ଅର୍ଦ୍ଧଶତକ ଯୋଗୁଁ ଟିମ୍ ଇଣ୍ଡିଆ ୪୯.୪ ଓଭରରେ ୮ ୱିକେଟ୍ ହରାଇ ଏହି ଲକ୍ଷ୍ୟ ହାସଲ କରିବାରେ ସଫଳ ହୋଇଥିଲା। ଅକ୍ସର ପଟେଲ ଧୂଆଁଧାର ପାଳି ଖେଳିଥିଲେ। ସେ ୩୫ ଟି ବଲରେ ୩ ଟି ଚୌକା ଏବଂ ୫ ଟି ଚକା ସହାୟତାରେ ୬୪ ରନ ସଂଗ୍ରହ କରିଥିଲେ। ଯାହା ଟିମ ଇଣ୍ଡିଆକୁ ବିଜୟ କରିବାରେ ସମ୍ଭବ ହୋଇପାରିଥିଲା।