ନୂଆଦିଲ୍ଲୀ: ଭାରତୀୟ ମହିଳା କ୍ରିକେଟ୍ ଦଳର ପୂର୍ବତନ ଅଧିନାୟକ ତଥା ବରିଷ୍ଠ ବ୍ୟାଟ୍ସମ୍ୟାନ୍ ମିତାଲି ରାଜ ମହିଳା ଆଇପିଏଲର ପ୍ରଥମ ସଂସ୍କରଣରେ ଖେଳିପାରନ୍ତି। କାରଣ ସେ ନିଜର ଅବସର ପ୍ରତ୍ୟାହାର କରିବାକୁ ସଂକେତ ଦେଇଛନ୍ତି। ୬ ଟି ଦଳକୁ ନେଇ ମହିଳା ଆଇପିଏଲ୍ ଆୟୋଜନ ହୋଇପାରେ, ଯାହା ଆସନ୍ତା ବର୍ଷ ଠାରୁ ଆରମ୍ଭ ହେବ ବୋଲି ଆଶା କରାଯାଉଛି।
ମିତାଲି ଚଳିତ ବର୍ଷ ଜୁନ୍ ରେ ଅବସର ଘୋଷଣା କରିଥିଲେ। ମହିଳା ଆଇପିଏଲର ପ୍ରଥମ ସଂସ୍କରଣରେ ଖେଳିବା ପାଇଁ ସେ ତାଙ୍କର ସମସ୍ତ ବିକଳ୍ପ ଖୋଲା ରଖିଛନ୍ତି। ମିତାଲି କହିଛନ୍ତି ଯେ, “ମୁଁ ସେହି ବିକଳ୍ପକୁ ଖୋଲା ରଖୁଛି। ମୁଁ ଏପର୍ଯ୍ୟନ୍ତ ନିଷ୍ପତ୍ତି ନେଇ ନାହିଁ। ମହିଳା ଆଇପିଏଲ ହେବାକୁ ଆଉ କିଛି ମାସ ଅଛି। ମହିଳା ଆଇପିଏଲର ପ୍ରଥମ ସଂସ୍କରଣରେ ଅଂଶ ହେବା ଭଲ ହେବ।”
ସେ ଯୁବ ଓପନର୍ ଶେଫାଳୀ ବର୍ମାଙ୍କ ବିଷୟରେ କହିଛନ୍ତି ଯେ, “ମୁଁ ତାଙ୍କ ଖେଳର ଜଣେ ବଡ଼ ପ୍ରଶଂସକ ହୋଇସାରିଛି। ସେ ଏମିତି ଏକ ବ୍ୟାଟ୍ସମ୍ୟାନ, ଯିଏକି ଯେକୌଣସି ଦଳ ବିରୁଦ୍ଧରେ ଆକ୍ରମଣାତ୍ମକ ଶୈଳୀରେ ଖେଳିବାର କ୍ଷମତା ରଖିଛନ୍ତି।” ସେ ଆହୁରି ମଧ୍ୟ କହିଛନ୍ତି ଯେ, “ସେ ଭାରତୀୟ ରେଳବାଇ ବିପକ୍ଷରେ ଖେଳୁଥିବାର ମୁଁ ଏକ ଘରୋଇ ମ୍ୟାଚରେ ତାଙ୍କୁ ଦେଖିଥିଲି, ସେତେବେଳେ ସେ ଅର୍ଦ୍ଧଶତକ ହାସଲ କରିଥିଲେ। କିନ୍ତୁ ମୁଁ ତାଙ୍କ ଖେଳର ଏକ ଝଲକ ଦେଖିପାରିଥିଲି, ଯିଏ ତାଙ୍କ ଇନିଂସ ଦ୍ଵାରା ସଂପୂର୍ଣ୍ଣ ମ୍ୟାଚକୁ ବଦଳାଇପାରନ୍ତି।”
ମିତାଲି କହିଛନ୍ତି ଯେ, ଯେତେବେଳେ ସେ ଚ୍ୟାଲେଞ୍ଜର୍ ଟ୍ରଫି (ମହିଳା ଟି -୨୦ ଚ୍ୟାଲେଞ୍ଜ ୨୦୧୯) ର ପ୍ରଥମ ସିଜନରେ ଭେଲୋସିଟି ପାଇଁ ଖେଳିଥିଲେ, ସେତେବେଳେ ସେ ମୋ ଦଳରେ ଥିଲେ ଏବଂ ମୁଁ ଦେଖିଲି ତାଙ୍କ ପାଖରେ ଏପରି ସମ୍ଭାବନା ଅଛି ଯାହା କ୍ୱଚିତ୍ ଦେଖାଯାଏ। ଅବସର ପରେ ସେ ବ୍ୟସ୍ତ ରହିଛନ୍ତି। ଅଭିନେତ୍ରୀ ତାପସୀ ପନ୍ନୁ ତାଙ୍କ ଜୀବନରେ ନିର୍ମିତ ‘ସାବାସ ମିଥୁ’ରେ ଅଭିନୟ କରିଛନ୍ତି।
